Representante permanente di Reino pa Nacionnan Uni Karel van Oosterom 

ORANJESTAD - Embahador di Nacionnan Uni y representante permanente di Reino pa Nacionnan Uni, Karel van Oosterom, ta na Aruba relaciona cu e conferencia P3A cu Nacionnan Uni en conhunto cu Reino y Aruba a organisa aki. Dialuna merdia el a haci un bishita cerca Prome Minister Mike Eman. Nan conoce otro di e varios encuentro cu Eman a haci como miembro di delegacion di Reino y tambe como ordador durante cumbrenan di Nacionnan Uni. Van Oosterom ta pa prome biaha na Aruba y a namora di e isla asina cu su avion a mishi tera. Pa loke ta e importancia di su presencia na Aruba den calidad di representante permanente di Reino na e conferencia el a bisa cu ta bon pa splica cu Prome Minister Eman ta un di su cuatro hefenan politico.

"Esey ta nifica cu banda di e gobierno na Den Haag, mi ta sirbi e Prome Minister di Aruba tambe. Den e ultimo añanan tabatin algun cambio den Reino y siman pasa a celebra e di 30 aña di Status Aparte di Aruba.Si nos mira con na luna di september ultimo cuatro Minister President di Reino tabata presente na New York, incluso nos Rey y Reina, anto esaki ta muestra palpabel con Reino ta hinca den otro y para p'e." Van Oosterom a bisa cu na New York (UN) nan ta papia hopi riba desaroyo duradero, con logra esey y kico 2030 ta trece y nifica pa tur hende. "Hunto nos a palabra pa bin cu metanan duradero, e asina yama Sustainable Development Goals (SDG). Nacionnan Uni a organisa un conferencia grandi riba e metanan duradero aki na Aruba den relacion cu nacionnan isleño (SIDS). Durante e tres dianan di e conferencia UN ta bay ilustra di ki manera por envolvi sector priva den e proceso di desaroyo."

E representante permanente di Reino ta bisa cu pa logra e metanan aki mester envolvi henter  comunidad. "Na Aruba nos tin algun bunita ehempel pa ilustra con haci esaki den practica.  E panelnan solar na aeropuerto ta un ehempel. Mescos cu mi tur e otro miembro di delegacionnan cu ta bin Aruba pa e conferencia ta mira e tremendo proyecto aki y keda encanta. Esaki ta con energia sostenibel ta traha."

Cu Nacionnan Uni a scoge Aruba pa organisa e evento ta pa motibo cu Aruba tin un vision grandi riba tereno di sostenibilidad. "Mundo ta wak den direccion di Aruba con como un SIDS (nacion isleño) ta percura con den practica e hendenan por gana mas. Di ki forma ta laga e economia draai y na mes momento percura pa medio ambiente bay bon. Ehempelnan ta e parke solar, e molinanan di biento, construccion di Green Corridor y otro proyectonan."

Karel van Oosterom ta un di e oradornan na Conferencia P3A y e tema di su discurso ta bay enfoca riba e menasa cu nacionnan isleño ta confrontando y kico Reino tin di ofrece.

Expresionnan haci den e articulo aki no necesariamente ta refleha opinion di ArenaPoliti.co