STA. CRUZ – “E decision di sra Lopez-Tromp tabata di spera, pasobra ningun hende muher lo acepta tur locual cu e mester a tolera den e partido AVP”, lider di MEP Evelyn Wever-Croes a duna di conoce. Sra. Marisol Lopez-Tromp a duna di conose cu Mike Eman no a atende cu e asunto di agresion den Parlamento. Esey nos ta custuma cun’e di Eman, pasobra Mike Eman ta conosi cu ta scohe pa nunca enfrenta problemanan. E ta scohe pa biaha pa representa Hulanda rond di hente rmundo, basta e no ta na Aruba pa atende cu problemanan di nos pais, y ni di su partido. Mike Eman ta lubida cu pueblo no a eligi’e como lider pa hunga di “loopjongen” pa Hulanda, sino pa goberna nos pais. Mike Eman a bolbe faya, pasobra atrobe e ta duna balor na tur otro cos, menos na abuso contra hende muher. Marisol Lopez-Tromp a bisa cu den partido AVP el’a wordo maltrata na tur forma, maltrato verbal, hopi insulto y palabra malo, y maltrato fisico. Ningun di e abusonan aki Mike Eman a atende cun’e.

DECLARACION DI JEFFREY KELLY 
Locual a hala mi atencion ta e declaracion di Jeffrey Kelly despues di e conferencia di prensa di sra. Lopez-Tromp. Lo e tabata tin mas credibilidad si el’a duna su declaracion mesora ora e incidente a tuma lugar, y no warda pa sra. Lopez-Tromp papia, pa despues e papia. Mi a respeta su decision di no papia riba e topico aki tanten cu e caso ta bou di investigacion, pero e ora dicon el’a core papia awe? Ta di lamenta con Mike Eman ta pone presion riba hende pa hasi su trabou sushi p’e, pero no ta cambia nada na e situacion pasobra Jeffrey Kelly ta admiti cu sr. Dammers a agredi sra. Lopez-Tromp, y sra. Lopez-Tromp a menciona mas abuso cu e y su casa mester pasa den e partido y nos tur por a wak esaki.

3 POSICION CLAVE CU MIKE EMAN KIER INFLUENCIA 
Ora un prome minister kier tin man liber pa hasi y deshasi na su antoho, e tin di tene cuenta cu 3 posicion clave den nos pais. E prome ta e minister di finansas, cu ta strob’e di malgasta placa y di cumpra voto. Mike Eman a core cu un minister di finansas caba, Juan David Yrausquin, y awor kier core cu un otro, Angel Bermudez, pa asina e tin man liber cu placa di pueblo.
E di dos ta e presidente di parlamento, y no ta combini Mike Eman tin un presidente cu ta vota contra su leynan y su maneho, of cu ta demasiado critico. Wak kiko el’a hasi? Pone su hendenan maltrata e presidente pa purba kit’e. E di tres ta e posicion di gobernador, cu nos tur sa, cu Mike Eman kier un di su hendenan riba e posicion ey, pa e por hasi y deshasi mas ainda.
Poco poco Mike Eman kier influencia tur e posicionnan ey.

Nos a drenta un etapa nobo awor, un etapa cu AVP tin 12 asiento so den Parlamento. Di parti di nos fraccion, mi por segura un y tur cu nos lo sigi lucha contra e mal gobierno di Mike Eman. Nos ta poco mas serca awor di e momento cu solo ta sali pa nos tur” segun Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co