Nos ta den un crisis nacional bao di e regimen berde. Mas di 3000 meter di awa lo wordo corta e siman aki. Nos pais a wordo destrui na man di Gabinete Mike Eman I y II. 
Nos digno pueblo ta pasando den hopi dolor. Biba sin awa ta un dolor, biba sin coriente ta un dolor, tin poco placa pa cumpra cuminda ta un dolor, biba den un cas di huur ta un dolor tur luna y biba sin futuro ta un dolor mas grandi aun. Nos yiunan no por practica deporte tampoco arte, bida na Aruba a bira impagabel cu e maneho burdugo di Mike Eman y AVP. Esaki no ta e Aruba cu varios generacion a traha p’e. Nos ta den un pleno explosion social anto ta tempo pa nos para lanta y defende nos Autonomia di un gobierno totalmente inepto. Tur nos companianan di estado ta den rood y departamentonan di gobierno ta na werki. Na Green Corridor tin hopi abuso laboral contra nos hendenan local. Nos hubentud no por haya trabao, pero varios otro nacionalidad ta trahando ilegalmente y no ta paga belasting ni primanan tampoco. Abuso di marca mayor so nos hendenan ta wanta bao di gobierno di Mike Eman. 

Nos pueblo no por wanta mas medida, tampoco ahustacion manera Mike Eman ta yam’e. Den luna di januari tin hala di medida cu e Parlamentarionan di AVP lo aproba y buta nos pueblo den mas decadencia Social Economico. Gobierno ta sigui gasta na un manera iresponsabel fondonan publico. Fin di aña 2016 a bolbe gasta miles y miles di florin di Refineria di Aruba. Ta gasta tur placa di e traspaso di Valero. Nos hendenan keto bay ta sin trabao pero ta gasta y fix tur dealnan contra tur regla di bon gobernacion. Gobierno aki tin cu bay cas y AVP no por bolbe nunca mas. Entre 1986-1988 un desaster, entre 1994-2001 otro desaster y awo di 2009-2017 un desaster total. Miseria ta locual nos ta bibando den 2017. Solo el pueblo, Salva el pueblo. Mas vale morir de pie, que vivir de rodillas.

Expresionnan haci den e articulo aki no necesariamente ta refleha opinion di ArenaPoliti.co