Gabinete Mike Eman sigur a demostra di ta un gobierno cu no por a maneha nos finanzas publico. Nan a destrui nos pais financieramente y economicamente. Awe comercio ta sangrando y pueblo ta bibando den miseria a consequencia di e maneho di Mike Eman y su gobierno. Na e momentonan aki comercio y nos pueblo ta bibando den momentonan di intercidumbre. Tur hende ta sperando mas medida pero nos tin un gobierno cu no kier duna pueblo claridad kiko ainda falta. Gobierno a paga un commission miyones di florin cu a wordo lidera pa professor Willem Vermeend pa prepara e siguente medida cu ta ABB di 7% pa pueblo. Cu esaki gobierno ta confirma cu BBO ta bira 7%. Una vez e medida aki bin e lo bai causa hopi problema pa e cartera di pueblo. Prijsnan lo conoce un aumento drastico y si pone esaki banda di tur e medidanan cu ja caba gobierno a introduci nos por conclui cu gobierno kier caba cu e clase media.
Nos mester recorda e pueblo aki kiko Mike Eman a priminti nos pueblo. Su promesa tawata ta cu e lo elimina BBO, e lo reduce tarifa di coriente cu 25% y lo mehora poder de compra. Awe ningun famia no a bai dilanti den posicion financiero. Awe Mike Eman no solamente no a elimina BBO sino ja caba a aumenta esaki na 3.5% y na caminda pa 7%.
Nos pais awor aki mester claridad, nos mester wordo informa kiko ta spera nos pa e proximo anjanan aki. Gobierno ta keda ganja y troce e berdad y malifnorma nos pueblo. Nan no kier ta transparente y no kier pa ningun hende sa kiko ta bai pasa. Esaki ta crea un intercidumbre enorme pa comerciantenan pasobra ningin comerciante sa kiko falta pa bin y esaki ta pone cu tur hende ta wantando tur clase di inversionan. Un gobierno manera esun di Mike Eman a perde tur clase di credibilidad y tambe tur nocion di realidad. Segun promer minister ta bibando den un mundo di su propio fantasia sin ningun clase di nocion di realidad kiko realmente ta pasando cu nos pais caminda famianan ta bibando den miseria y den angustia. E ta bruhando henter un pais y creando confusion. E ta hibando un maneho di flip flop. Mescos cu e lo elimina BBO, awe BBO ta na 3.5%.
Nos pais a ser gobernanan pa hendenan cu ta ganja, cu no por papia berdad cu no kier soluciona probleman real di nos pais. Loke nos ta lamenta cu ainda gobierno NO kier reconoce e situacion y e problema cu nan a hinka nos pais aden. Awe ainda nan ta keda isa cu e situacion ta bon. E pregunta ta masha facil y simple, si en realidad e situacion ta bon manera Mike Eman ta pretende dikon tin tanto medida, dikon a aumenta prima di AOV, prima di AZV, aumenta BBO na 3.5%, cobra pa recohe sushi, aumenta grondbelasting, bin cu car rental tax y asina nos por keda menciona un serie di medida contra nos pueblo. Nos pueblo ta esun cu ta wordo castiga pa e gobierno aki cu no tin ningun intencion di para nan fiesta. Nan intencion ta pa sigui fiesta cu placa di pueblo y laga pueblo sigui paga pa e fiesta. Un promer minister cu su gastonan di personal ta na 12 miyon florin pa anja, gastonan di voorlichting en promotie na 2 miyon florin y gastonan di viahamento na 1 miyon florin nunca por resolve e problemanan di nos pais. Al contrario un hende asina no tin gevoel pasobra e placa cu e ta gasta no ta di dje, ta placa di pueblo e ta. Un gobierno inhumano y irresponsabel so ta crea debe pa nos futuro generacionan.

Expresionnan haci den e articulo aki no necesariamente ta refleha opinion di ArenaPoliti.co