Spantenbier na hospital y ainda nada di investigacion di corupcion den proyecto? 

ORANJESTAD – Parlamento a haya invitación pa atende e spantenbier na hospital, pero ta puntra su mes ta con a para cu e feitenonderzoek cu parlamento a pidi. Fraccion di MEP casi dos anja pasa a pidi un reunion pa trata e tema aki, pero ainda no por haya e reunion manera pidi. Pesey e lider di MEP, a bolbe mustra con parlamento a faya! Dictadura den parlamento a pone cu pueblo a wordo suta cu medida, y tur esaki por a wordo evita.

Segun e lider di MEP, parlamento por a evita hopi problema y hopi placa di pueblo si a yama e reunion aki na tempo. Pero awor cu a tarda asina tanto ta hasi e mayoria den parlamento complice den e corupcion na hospital!
E proyecto ta hole na corupcion, pa varios motibo, pero e lider di MEP a enfoca riba e aspectonan mas serio cu a tuma lugar den e bidding di e proyecto: (1) A scohe esun cu a ofrece e prijs mas halto, 40 miyon mas halto, (2) A scohe esun cu a claim pa cobra ‘meerwerk’, (3) A scohe esun cu menos experiencia, y menos capacidad. Acaso ta pasobra e compania aki ta un compania amigo di e gobierno aki?
Nos a compronde tambe cu coordinadornan di prome minister a pidi un comision basta grandi den e proyecto. Nos a compronde cu hendenan a cambia nan scoring despues bou di presion. Nos a mira cu a duna e proyecto na esun cu a bid mas halto, esun cu a cobra meerwerk y esun cu menos experiencia. Evelyn Wever-Croes a duna un ehempel: Imaginabo si mi kier traha mi cas y un contratista grandi, por ehempel Albo ta dunami oferta, y un contratista chikito ta dunami oferta. Albo tin hopi mas experiencia cu e otro, ALBO ta duna e prijs mas abou, ALBO ta garantisa cu no tin meerwerk, e otro si ta bisa cu su prijs ta mas halto y e ta exigi 5% pa meerwerk. Imaginabo si mi scohe pa e chikito? Ta loco mi mester ta! Awel esey a pasa akiden. Un locura total. No tin logica. Y pesey nos ta exigi un investigacion. Nos meta ta pa tene un encuesta parlamentario, pero pa por hasi esaki nos mester di informacion. Pesey nos mester pa e minister hasi un investigación, un ‘feiten onderzoek’ di e bidding. Nos a entrega un mocion pa esaki pero ainda no a haya sosten di AVP.

ARUBA MERECE MIHOR
Aruba merece un cuido di salud digno, un servicio medico optimal, y un hospital di calidad. Sigur no un hospital sin sala di operacion. Aruba merece mihor, mucho mihor.
“E pregunta cu ami tin ta dicon e gobierno aki no kier duna nos pueblo un alivio? Dicon e gobierno aki ta castiga nos pueblo di e forma aki? Pasobra pa por paga e EXTRA gastonan di e proyecto, ya cu nan a regala e proyecto na un amigo, mester a suta pueblo cu e health tax di 1% na december y 2% na juni, y luna pasa CAFT a bisa cu mester hise mas ainda! E CAFT cu e fracción di AVP  a aproba dia 27 di augustus, e CAFT cu AVP a bisa no tin medida, siman pasa a bisa cu AVP mester percura pa hisa e BBO y health tax.

NOS KIER ALTERNATIVA, NOS NO KIER MEDIDA
Mike Eman kier medida, nos no! Den e caso aki, por evita medida, si a djis scohe pa esun cu a ofrece mas abou, lo a scapa 40 miyon florin, y nos pueblo no mester a wordo suta cu e medida di health tax. Y pesey nos ta insisti riba e investigación, pasobra e ora nos por brinda e pueblo un alternativa”, segun lider di MEP, Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co