Durente reunion di Parlamento tratando presupuesto 2016 por a tuma nota di un cambio den pensamento di partido AVP pa locual ta trata refineria. MEP ta contento cu AVP a realisa e importancia di reapertura di e refineria y a deshaci di nan pensamento di desmantelacion. AVP asina ta duna contenido y reconocemento tambe na e vision di MEP cual ta ancra den e  programa di partido MEP 2013-2017 skirbi pa ta exacto riba pagina 5. Desde cu Refineria Valero a para operacion di refinamento na maart 2012 esaki a causa un impacto gigantesco riba economia di  Aruba y sigur pa e area di San Nicolas. No obstante cu AVP a usa Valero como e cabay di troya di campaña pa por a crea un percepcion den pueblo, nos mester realisa cu un refineria tin su impacto grandi pa comunidad. AVP na mei 2012 a trata den parlamento e “settlement agreement” di Valero y a regala Valero den esaki 76 miyon florin di e BBO riba exportacion. Ken sa cuanto a bin bek pa campaña 2013! Despues AVP a inicia e campaña di desmantelacion di e refineria. MEP sinembargo semper a keda boga pa un re-apertura. MEP no a sosega y momento cu a bira conoci cu AVP ta acelerando e proceso di desmantelacion den aña 2015 MEP a yama un reunion extraordinario na maart 2015 na su CEDE, unda mesun anochi a tuma un decision y a sali bay manifesta cu su hendenan na e maingate di Valero y a manda un carta pa Houston Texas cu nos lo no tolera un desmantelacion. Mesora a activa un plan y strategia pa logra un solo meta, esta reapertura di refineria.  Parlamentario di MEP sr. Glenbert Croes a activa su contactonan directo cu e hefenan di mas halto di PDVSA y a haci diferente biahe riba propio costo pa Venezuela y a habri e portanan pa un posibel reapertura. Ora bo ta haci algo di curason pa un pueblo esaki ta wordo paga cu bondad. Asina MEP no a drumi ni tampoco a perde e speransa y constantemente a keda bringa cu alma y cuerpo pa un reapertura. Den e ultimo 6 lunanan di aña 2015 por a tuma nota di un cambio radical di AVP unda AVP a bin para banda di MEP esta reconfirmando locual tin skirbi riba pagina 5 di e programa di partido MEP relaciona cu un reapertura di e refineria. Diabierna ultimo por a reconfirma esaki durante discursonan di ministernan den parlamento unda hasta a haci calculacionnan caba di cuanto placa gobierno lo ricibi di e lease agreement di 20 miyon dollar pa aña pro-rata si CITGO firma dia 31 maart y tuma over na april 2016. MEP sigur ta mira esaki como algo hopi positivo, comokiera cu AVP awor si ta compronde e vision di MEP y cu esaki lo significa un spin off effect grandi pa economia di Aruba creando alrededor di 1000 pa 1500 cupo di trabao directo y den futuro rond di 900 cupo di trabao permanente. San Nicolas lo florece atrobe y economia ta haña un bida. Cu pasenshi bo ta gana gloria. San Nicolas lo conoce pronto un desaroyo berdadero atrobe.  

Expresionnan haci den e articulo aki no necesariamente ta refleha opinion di ArenaPoliti.co