"Nos a bisa semper cu e desaroyo di Aruba mester ta uno duradero. Nos no kier actividadnan pa djis un par di aña of cu ta daña medio ambiente den forma cu ta causa nos problema pa hopi aña den futuro. Na mes un momento nos kier actividad economico, trabou y entrada pa hopi hende y pa hopi aña. Pesey nos a bisa cu mester haci tur lo posibel pa habri e refineria atrobe, manera AVP a haci na 2011. Pero, si no por logra habri e refineria, nos mester crea otro actividad, manera turismo. Esey ta loke nos a pone den e mocion cu a wordo aproba den Parlamento na mei e aña aki tambe." Esey ta un di e declaracionnan di Rene Herde di AVP den conferencia di prensa diahuebs 20 di augustus.

STABILIDAD
Un refineria ta crea hopi trabou tecnico cu ta paga bon. E ta crea mas actividad economico rond di e refineria y e ta crea mas entrada pa nos pais. Pesey nos kier habri e refineria. Pero realidad ta tambe cu e refineria a resulta di ta un industria instabiel den e ultimo 30 aña. E refineria a sera cuatro biaha den e tempo aki, lagando hopi hende sin trabou pa tempo largo. Turismo di otro banda a resulta di ta un industria stabiel. Den e ultimo 30 aña ta crece so turismo a crece. Tanto den cantidad como den calidad y ela crea hopi cupo di trabou. For di e punto di bista ey, turismo ta duna mas stabilidad. Mas stabilidad di trabou, di entrada y desaroyo nobo.

DURADERO
Nos kier un desaroyo duradero pariba di brug. Un desaroyo cu no ta causa tanto daño na naturalesa y medio ambiente. Riba e punto aki, tambe turismo ta mas limpi y duradero cu e refineria. Pero apesar di e impacto economico di e refineria, no por nenga cu e ta malo pa medio ambiente y salud di nos hendenan. Ta e cosnan aki ta haci cu nos mester discuti y balansa tur aspecto den cuadro di e discucion y desicionnan riba reapertura di e refeneria. Pa AVP na final di dia, ta e desaroyo di San Nicolas y di Aruba ta loke ta conta.

Expresionnan haci den e articulo aki no necesariamente ta refleha opinion di ArenaPoliti.co