Perspectiva Independiente without background 001

‘Un moratorio real riba mas hotel’

Booshi05
Na 2013 partido UPP (Union Patriotico Progresista) tabata na fabor di algun boutique hotel nobo na Aruba. Recientemente e lider di UPP, sr. Candelario ‘Booshi’ Wever, a expresa un pensamento diferente riba e tema aki. UPP no ta na fabor pa Aruba haya mas hotel, tampoco boutique hotels. ArenaPoliti.co a aserca sr. Wever pa un splicacion.

Sr. Wever: “Aruba su economia na e momentonan aki nos por considera como un economia monocultural. E sector petrolero, despues di hopi tempo no tin su nificacion pa Aruba mas, manera e tabata antes. Sector di servicio ta depende hopi di loke ta pasa den e otro dos sectornan. UPP ta kere cu banda di a yega momento pa nos no sigui haci nos pais mas dependiente di un solo sector, nos mester mira e otro circunstancianan cu nos pais ta aden. Esakinan ta entre otro e capacidad di carga di nos pais y e calidad di e turismo cu nos kier ofrece.”
Ta tempo pa Aruba temporisa e proyectonan di construccion den e sector aki por medio di un moratorio real.”
Sr. Wever ta splica cu ora ta trata di construccion y operacion di hotelnan nobo mester pensa mas leu cu solamente ‘realisa mas hotel na Aruba’. Booshi Wever: “Cada proyecto nobo cu keda realisa, sea grandi of chikito, 9 di 10 trahadornan lo mester wordo importa. Tanto den e proceso di realisacion/construccion y despues ora di operacion di e hotelnan aki. Ta tempo pa Aruba temporisa e proyectonan di construccion den e sector aki por medio di un moratorio real. Tambe nos mester bira consciente y critico riba e espacio cu nos ta uzando pa cada desaroyo nobo di un hotel. Mester mas tereno, cu a bira scars, mientras pa e 9 trahadonan di cada 10 cu mester busca, mester traha cas pa nan biba aden. Esaki tambe ta rekeri mas tereno y recursonan tanto natural como medionan financiero pa crea mas caretera, mas transporte, mas scolnan, mas AZV, you name it. E famoso capacidad di carga aki entre otro presenta pa Camara di Comercio, cu den añanan 2005/2009 tabata asina na discusion, cu e gobierno actual a disparce for di mesa.
Aruba no por sigui wordo castiga cu mas proyectonan, cu na prome luga no ta agrega na e producto, sino mas bien ta laga e producto deteriora.”
UPP ta kere cu den e prome 100 dianan di un siguiente gobernacion lo mester bin un cumbre nacional riba e topico aki. Aruba no por sigui wordo castiga cu mas proyectonan, cu na prome luga no ta agrega na e producto, sino mas bien ta laga e producto deteriora. Ya caba Aruba den ultimo tempo a bin ta conoce un caida den nos turismo, pa cual Aruba no mester di mas di e mesun cos, sino di mehora e calidad di turismo. Di e modo aki nos por garantisa mas ingreso pa nos pais.”
170726 beach hotel
ArenaPoliti.co a puntra sr. Wever con turismo por sigui desaroya y mehora pa keda competitvo, sin construi mas hotel.

Segun e lider di UPP, “ta tempo pa nos aki na Aruba bay traha na e calidad di e producto turismo cu nos ta ofrece. Loke nos a bin ta creando ta un turismo di masa, cu all inclusive, y negoshinan di mesun tipo, sin ta bin cu un diversificacion turistico di nos isla.”

Instituto di Calidad
Sr. Wever ta splica cu UPP kier enfoca riba calidad por medio di introducion di un Instituto di Calidad: “UPP ta opta pa bin cu un Instituto di Calidad como parti di Universidad di Aruba. Mester bin un maneho di calidad pa hotel y restaurantnan, pa tur esnan cu tin di haber cu turismo, incluso tiendanan. E mesun instituto aki lo mester bay na inspecciona y controla hotel y restaurantnan, den un asina yama programa di strea. Esaki tambe ta conta pa otro operadornan di empresa turistico.
UPP ta opta pa bin cu un Instituto di Calidad como parti di Universidad di Aruba.”
Tambe e calidad di nos beachnan, nos infrastructura y limpieza di nos isla mester ta parti di e programa aki. Aruba mester bay basa su mes riba calidad na luga di cantidad. Mientras cu esnan cu ta traha den turismo mester haya e educacion necesario, di tur nos aspectonan cultural, sociologico y historico di nos pais, pa asina nos por sirbi e turista na un miho forma. E turismo di siglo 21 ta un turismo cu sigur tin su otro exigencianan cu esnan cu tabata bin pa simplemente placer, casino y sosega.”

Incentivo pa upgrade hotelnan existente 
Banda di un Instituto di Calidad, sr. Wever ta di opinion cu gobierno por stimula upgrades di hotelnan existente. Booshi Wever: “Enbes di construi hotelnan nobo, nos por mehora e calidad di nos hotelnan existente. Gobierno por encurasha esaki por medio di incentivonan fiscal.” Segun sr. Wever, esaki por complementa e enfoke riba calidad enbes di masa.

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.