{idkey=1120b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5542-red-rueda-di-prensa-di-4-mei-2017%3FItemid%3D101][title=ReD%3A+Rueda+di+prensa+di+4+mei+2017][desc=E+siman+aki+dialuna+dia+1+di+mei+nos+a+celebra+dia+di+obrero.+Partido+ReD+Democratico+cu+ta+conoci+como+e+%C3%BAnico+partido+cu+te+awor+de+facto+a+para+frenta+den+laira+pa+defende+tur+derecho+ancra+den+e+Tratado+Europeo+di+Derechonan+Humano%2C+cual+Reino+Hulandes+tambe+a+ratifica%2C+di+tur+ciudadano+sin+excepci%C3%B3n%2C+ariba+e+pida+baranca+aki%2C+kier+a+yama+pabien+na+e+clase+trahador.+Partido+ReD+Democratico+ta+duna+un+danki+inmenso+cu+no+tin+palabra+cu+un+significaci%C3%B3n+suficientemente+profundo+pa+expresa+e]}E siman aki dialuna dia 1 di mei nos a celebra dia di obrero. Partido ReD Democratico cu ta conoci como e único partido cu te awor de facto a para frenta den laira pa defende tur derecho ancra den e Tratado Europeo di Derechonan Humano, cual Reino Hulandes tambe a ratifica, di tur ciudadano sin excepción, ariba e pida baranca aki, kier a yama pabien na e clase trahador. Partido ReD Democratico ta duna un danki inmenso cu no tin palabra cu un significación suficientemente profundo pa expresa e sentimiento di gratitud y aprecio cu nos ta sinti pa cu e pueblo trahador di e país aki. Ta solamente cu e sudor di nos obreronan (lesa: tur trahador en general) e país aki a sa di bai dilanti den tempo bon y sobrevivi den tempo malo.

Y ta ken anto ta tur esnan cu a traha y hiba e país aki dilanti? Esaki ta e pueblo Arubano kende ta consisti di Arubianonan naci aki, decendiente di indjannan cu tawata biba aki y tambe stranheronan kende nan a kolonisa e pida baranca aki y haci di Aruba nan cas, y tur otro stranheronan cu a sigui imigra pa Aruba den e siglo nan cu a sigui desde siglo diesshete. Nos ta papia tambe di stranheronan cu den e ultimo añanan y ultimo tres décadanan a bin pa establece y traha na nos isla. Orguyosamente nos ta yama nos mes Arubiano paso ta aki nos a nace, nos lombrishi ta dera bou di e suela aki y nos lenga Papiamento no solamente ta nos idioma pero tambe nos identidad. Hopi di nos siendo yiu nan di stranhero, nos no ta stranhero mas ariba e baranca aki manera nos antepasadonan si tawata ta. Esaki ta importante pa menciona solamente pa recorda tur hende cu e isla aki ta nos cu ta traha pa hib’e dilanti. Lo mas importante ta cu nos ta stim’e y cu nos ta comparti nos sentimiento patriótico únicamente cu e isla chiquito aki.

Pero e trahador mes no ta sinti su mes sigur pa masha tempo caba. Su derechonan laboral aunque nan ta ancra den nos código civil ta wordo trapa. Nan ta confronta un sinfín di problema na pia di trabao e.o. falta di seguridad riba tereno di trabou tanto pa e obrero, e maestro, e enfermera etc. E leynan di seguridad ariba tereno di trabou mester ta vigente y mester hiba un control riguroso si nan ta ser aplica y respeta. Si no ta asina mester tin sanción pa proteha e trahador primeramente. Tin incertidumbre si e siman aki of e quincena aki of e luna ta bai cobra salario of no. Esnan cu kier habri negoshi mester por garantisa te na un cierto nivel cu nan por paga e salarionan tambe. Salario minimo a bira salario general casi sin importa bo preparación mientras ta exigi lo máximo di e trahador. Studiantenan cu a bai afo y bin bek cu un diploma no ta traha den e sector cu nan a haya un financiamento pa studia pe. E persona special no ta haya trabou mes of e ta haya e trabou a base di su curiculum por escrito y ora e presenta y su futuro dunador di trabou tuma nota cu e ta  den un rolstoel e ta wordo descualifica y nenga trabou. E trahador ta wordo abusa na ordo di dia, tanto e trahador Arubiano como esun stranhero y tanto di parti di e dunador di trabou Arubiano y esun stranhero tambe. Niun of masha poco defensa tin di parti di Departamento di Labor, pio ainda pa trahadornan cu no ta afilia na niun sindicato. No ta nada straño cu entre sector publico y sector priva tin un desbalance enorme den beneficio y salarionan. Cu permiso di estadia y trabou ta wordo haci negoshi na grandi sin worry cu ta trata cu hende. Ta hopi problema laboral a keda sin resolve durante ocho aña di e gobernación actual y ta sclama pa mehoracion di e bida di e obrero. Partido ReD Democratico ta conciente cu eynan tin un tarea grandi ta spera nos. 

Papiando di Arubiano, hopi hende no ta na altura cu tin mas di 400 mucha y hoben sin status legal na nos isla. Hopi a nace akinan y ta sinti nan mes Arubiano. E siman aki a start cu un projecto pa legitima nan status. Partido ReD Democratico hamas por ta contra, pero pa duna nan e derecho aki como un fabor di gobierno cu ta mal usa su poder y ta hunga política den tempo di campaña cu estado civil y legal di hende, ta totalmente no acceptabel.

E siman aki tambe nos a mira comerciantenan bin masalmente dilanti cu nan inquietud enorme pa cu locual a resta di comercio den caya Betico Croes. Ta un lastima pa scucha cu tanto e embeyecimento di caya grandi, como e tram, como parkeermeters y klem no a yuda net nada pa nan por competi cu e shoppingmallsnan. Al contrario, caya grandi ta prácticamente morto. 53 negoshi a sera y mas di 400 trahador a keda sin trabao. Ta yena nos cu tristesa cu dia 1 di mei a pasa y no tawata tin nada di celebra pa trahadornan di caya grandi. Claramente por papia di un inversion miyonario cu placa di pueblo hunto cu un planificación deplorabel ya cu nunca a haci un estudio di impacto económico y comercial, cu no a realisa su metanan. Pasobra no a scucha e comerciante ni e pueblo. Ta un soño priva di un Prome Minister e tawata. 

ReD Democratico kier sinta cu expertonan pa studia con pa draai e efecto negativo aki y trece bida bek den nos caya grandi caminda pueblo, comerciante y turista por yega anytime pa  topa, haci compras y windowshop manera antes.

Expresionnan haci den e articulo aki no necesariamente ta refleha opinion di ArenaPoliti.co