{idkey=7477b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5848-arondino-croes-avp-mi-gusta-un-lider-determina-y-persistente-trahando-pa-su-pueblo%3FItemid%3D101][title=Arondino+Croes+%28AVP%29%3A+%E2%80%9CMi+gusta+un+lider+determina+y+persistente+trahando+pa+su+pueblo%E2%80%9D][desc=]}
Arondino Croes na encuentro politico di AVP na Angochi     

ORANJESTAD – Tur dia partido AVP y su candidatonan ta activo rond Aruba den cuadro di e eleccionnan parlamentario pa dia 22 di September awor.

Asina e siman aki AVP tabatin un reunion di contacto na Angochi unda tabata presente lider di AVP Mike Eman, Clarisca Velasquez, Gerlien Croes, Maurits Malmberg  y e candidato nobo cu ta bay wordo presenta den e prome siman di juli, esta Arondino Croes.

Lider Mike Eman a gradici e habitantenan di Angochi cu a bini hunto pa reflexiona riba e tarea importante di determina e futuro di Aruba. Asina e lider a haya importante , pa por sigui cu e bon trabou, fortificando e presencia di partido AVP den Santa Cruz. Asina el a splica cu denter di algun dia lo presenta un candidato cu anteriormente tabata milita den partido MEP. “Pero despues di a haci un evaluacion di e forma con Aruba a desaroya e ultimo añanan. Mientras cu e partido cu a inspir’e, bou liderazgo di Betico Croes, cu tempo a bay ta desviando di e principionan di defunto Betico Croes,el a dicidi di uni su mes na partido AVP.”

Arondino Croes lo presenta su mes oficialmente como candidato di AVP pa Santa Cruz dia 2 di juli awor, pero como cu tabatin un encuentro cu parti di e bario di Angochi a dicidi di informa e publico presente di esaki. “Esaki ta un momento historico, pasobra e confiansa cu mi a haya di Prome Minister y lider di AVP cu a mira e calidadnan di mi persona, ta bunita.”  El a splica cu e proceso pa yega na bira candidato di AVP no tabata uno cortico, ya cu a pasa den un proceso unda nan mester a conoce bon, su ideanan y e mester tambe. “E no ta djis yega pone hende riba lista. E proceso di AVP ta uno largo, hopi serio, un proceso di dialogo cu  a dunami e chens pa mi sintimi na cas. E combersacionnan cu e lider di AVP a impresionami masha hopi. Via dje mi por a siña conoce e partido prome cu mi ta para aki awe nochi.”

Croes a splica cu den e proceso pa conoce e partido AVP, el a participa den diferente tipo di reunion, tanto formal como informal, e forma di traha di e partido manera un team, ta un diferencia enorme. “Esaki ta loke a resalta den e ultimo dos eleccionnan y mi no tin duda cu na september awor e victoria ta garantisa.” El a finalisa bisando cu loke mas a impresion’e ta cu un lider mester tin meta y visionnan . El a conta con el a sinta observa e lider di AVP, sin cu e tabata na altura, pa mira si e por haya su mes den vision y meta di lider di AVP. Y a conclui cu su vision ta hopi nobel, sigur ora cu e ta bisa cu e lo no descansa te ora cu felicidad yega na hogar di Aruba y ta algo cu mester sostene. “E ta algo cu nos mester sostene nos lider di partido 100%. E vision aki lo transcende bay pa eleccion. Tur e proyectonan logra ta dunami gana pa campaña. Mi a experencia un lider cu no ta drumi y esaki mi ta gusta. Hende determina, y persistente, cu hopi gana pa sirbi su pais. Bo ta mira cu e pueblo ta stim’e. Ban sigui yuda nos lider pa dia 22 di september nos tin un victoria aplastante atrobe.”

Expresionnan haci den e articulo aki no necesariamente ta refleha opinion di ArenaPoliti.co