{idkey=7666b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5898-evelyn-wever-croes-mep-e-problema-di-dump-mester-wordo-soluciona%3FItemid%3D101][title=Evelyn+Wever-Croes+%28MEP%29%3A+E+problema+di+dump+mester+wordo+soluciona][desc=]}
Fin di siman cu a pasa, lider di MEP, sra Evelyn Wever-Croes, hunto cu un grupo di campañador, a bishita e bario di Cas Paloma. Desde cu Partido MEP a anuncia apertura di campaña pa Eleccion 2017, sra Croes ta bishitando ciudadanonan tur dia y den tur fin di siman e ta sali cu su ekipo campañando di cas pa cas pa hiba nos mensahe con Partido MEP lo cambia rumbo di nos pais. Sra Croes ta elabora mas riba su bishita den bario di Cas Paloma.

“Habitantenan di bario di Cas Paloma a ricibi nos den nan bario y hogarnan cu brasa habri. Mi a tuma tempo pa scucha e preocupacionnan cu ta biba den nan y a tuma nota tambe di e sugerencianan cu nan tin. Mi lo tene cuenta cu tur e preocupacionnan aki den nos programa pa gobernacion.

E molester di mas grandi cu e habitantenan di Cas Paloma ta bibando cu ne pa un tempo largo caba, ta e molester cu dump ta trece. Hopi molester di e huma y musca causa door di e sero halto di sushi. Te hasta nan ta experimenta molester di e trucknan grandi cu ta pasa cerca di nan propiedad.

Nos a splica nan e solucion di MEP pa remedia e situacion aki.

1. Paga e candela candela di dump y percura pa e no cende mas. Prome cu 2009, MEP a logra esaki caba y nos lo bolbe haci’e. Tubonan necesario lo wordo poni pa asina e gas sali sin cu esaki causa explosionnan bou di e sero. Y di e manera aki caba cu e candela y e molester di e huma.
2. Sushi cu ta drenta dump diariamente lo mester wordo procesa e mesun dia. Si esaki kiermeen cu mester inverti placa pa drecha e planta pa procesa e sushi, nos lo haci esaki di inmediato pa tin e solucion pa e sushi cu ta drenta tur dia.
3. Cuminsa baha e sero di sushi poco poco te ora cu e lugar ta cumpli cu e exigencianan internacional y no ta causa molester mas pa e bario.

E tema di maneho di sushi na Aruba ta un tema cu no a haya ningun atencion di e gobierno actual. MEP tin un vision realistico con pa atende cu e problematica aki. Nos lo percura pa e sushi wordo procesa, recicla y re-uza pa asina nos bin cu un maneho sostenibel riba e tereno di sushi.

Nos lo bin cu campañanan di conscientisacion pa cada ciudadano atende miho cu e sushi di cas. Separa esaki, re-uza loke por wordo uza y recicla. Asina nos por tin un solucion duradero, structural y sostenibel riba e maneho di sushi. E solucionnan aki a cay riba bon tera cerca e habitantenan di Cas Paloma”.

Sra Wever-Croes ta expresa cu pa su persona y Partido MEP, Aruba ta prioridad.

“Mi compromiso cu Aruba henter ta pa pone e hende central atrobe. MEP ta e solucion pa trece mehoracion pa nos tur. Hunto nos lo logra esaki. MEP lo ta drentando tur skina di Aruba cu nos mensahe di cambio”.

Sigui nos riba nos pagina di Facebook pa bo por keda informa di tur nos eventonan.

Expresionnan haci den e articulo aki no necesariamente ta refleha opinion di ArenaPoliti.co