{idkey=8900b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5838-jacky-van-putten-por-jacky-a-contami-no-tin-trabou-pa-mi-yiu%3FItemid%3D101][title=Jacky+van+Putten+%28POR%29%3A+Jacky+a+contami%3A+%E2%80%9CNo+tin+trabou+pa+mi+yiu%E2%80%9D][desc=]}
Fin di siman cu a pasa un bes mas partido POR a subi caya pa asina trece nos Plan di Accion cerca e pueblo. Pa mustranan kico nos intencionnan ta y mas cu tur cos scucha nan precupacion y kico nan lo kier mira den e proximo gobierno. Nos a bay den bario di Bubali y aki mi a topa un dama, mama  trahador cu semper su bida a traha pa mantene su famia y no a depende di ningun hende. Mi nomber ta Jacky! Mi di no ami ta Jacky. E señora aki a habri porta pa nos y kier a expresa su dificuldad y frustracion cu e sistema laboral cu nos tin. Especialmente  pa hobennan cu a termina nan estudio y kier cuminsa traha. El a splicami di su situacion personal na unda su yiu a caba EPB den techiek y a bati na porta di tantisimo dunador di trabou y ningun a brinde e oportunidad, simplemente pasobra e no tin experencia. Dunadornan di trabou kier personanan cu ya tin aña di experencia. E pregunta ta con e hoben aki por drenta e mercado laboral pa haya experencia si ora e sali di scol nan no ta dune e oportunidad. E señora a sigui splicaca cu ta duel e pasobra e pober no tin entrada y kier traha y mester depende riba e recursonan di dje siendo cu e ta capaz y tin un boluntad. Jacky ta traha na un hotel pa hopi aña y aki e ta continua splica cu nan tabatin un necesidad pa un pool attendant y mas cu 20 hoben a aplica pa e posicion aki. 

Den reunion cu mi coleganan di E Forsa Nobo nan tambe a expresa cu esaki ta un preocupacion grandi di hopi mama y tatanan di famia. No tur mucha por of kier bay studia afo, hopi ta termina EPB den diferente ramo y ta encontra portanan cera pa nan. No tin oportunidad pa traha y para riba nan mesun pia. Como politico, pasobra mi no ta gobernante, canando den pueblo,e ta habri mi wowonan tur dia . Aunke mi a traha 34 aña den deporte, den KIA, cu hoben y adulto, esnan cu limitacion fisicio y mental, pacientnan cu cancer, bo stul den airco ta ponebo lubida e lucha di cada famia pa provee y tin un dak riba nan cabes. Mas e experencianan aki ta confirma e posicion di POR pa atende cu nos hobennan, nos futuro. Mi persona den ramo di deporte lo percura cu e voz den e bario wordo scucha pa medio di centronan deportivo, musica y arte.

Den e proximo gobernacion cu E Forsa Nobo mester sondia e posibilidad pa e hobennan aki haya e oportunidad pa acumula experencia. Nos mester percura cu nan añanan di scol no bay perdi y incorporanan di biaha den e Mercado Laboral pa asina nan no ni pensa pa tuma e caminda ekiboca. Si companianan miyonario na Aruba ta haya tax holiday pa 10 aña y yen di excepcion pa asina nan bin establece, por pensa riba un reduccion fiscal pa esnan cu apoya un programa di intregacion pa alumnonan local cu ta drenta Mercado Laboral cu papel sin experencia. Tambe por pensa den direccion di permiso di trabou di stranhero. Por ehemplo un compania mester emplea un percentage di studiantenan cu a termina nan estudio pa bin na remarke pa  trahador stranhero. Contesta no lo tin pa tur precupacion, pero como gobernante mester tin boluntad pa trece e solucion pa asina alivia e peso riba nos comunidad.  Busca voto ta un cos, atende y resolve ta tur cos.

Pa cualkier pregunta of sugerencia por haci esaki via mi Facebookpage @jacquelineponsonvanputten / website jackypor.com

Expresionnan haci den e articulo aki no necesariamente ta refleha opinion di ArenaPoliti.co