{idkey=7693b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5849-mike-eman-avp-nos-tey-pa-sirbi-y-traha-pa-boso-pa-henter-pueblo-di-aruba%3FItemid%3D101][title=Mike+Eman+%28AVP%29%3A+%E2%80%9CNos+tey+pa+sirbi+y+traha+pa+boso%2C+pa+henter+pueblo+di+Aruba%E2%80%9D][desc=]}
Lider di AVP Mike Eman na Angochi    

ORANJESTAD – Diaranson anochi lider di AVP y algun candidato tabatin un exitoso encuentro den e bario di Angochi hunto cu lidernan di e bario manera Juan Werleman y su nieta Jerritza y un grupo di boluntario di e bario di Santa Cruz.

Den e encuentro aki, e lider di AVP, Mike Eman, a bisa cu e motibo pakico partido AVP a binta creciendo ta simpel. “Un partido no por crece si e no ta haya personanan di otro partido. Locual cu a sosode e ultimo añanan ta cu a mantene un liña cu cada bes a gana curason y confiansa di mas persona di diferente partido cu a para mira con cosnan den nan mesun partido no a desaroya manera e idealnan poni. Nan a mira un partido cu kizas nan a pensa no ta comparti e idealnan ey, pero poco-poco a cuminsa reconoce den partido AVP idealnan noble, di servicio pa pueblo, pa haci sacrificacio pa Aruba progresa. Pesey e lider a reconoce presencia di un ex candidato di MEP, esta Gerick Croes. E hoben aki ta studiando na Universidad, preparando su mes pa aki 4 aña e ta bek den politica.  

Lider di AVP den su discurso a enfatisa cu den campaña nan no ta yega pidi voto di e ciudadanonan. AVP ta mustra kico nan a haci ultimo 4 añanan y ta puntra kico mas e pueblo kier mira wordo realisa pa pueblo di Aruba. “E voto nos mester di dje pa gana eleccion, pero ora nos drenta casnan tin un diferencia grandi cu Gobernacionnan anterior y kisas hasta di partido AVP mes. Nos no a bishita cas ora di eleccion so. Cuatro aña largo mi a cana tur siman den barionan di Aruba, pa wak kico pueblo mester,” e lider a splica e publico presente. “Nos tey pa sirbi boso, AVP of MEP.”

Pa demostra esaki, Eman a duna un presentacion unda cu a keda ilustra tur e proyectonan cu a wordo realisa den e ultimo 4 añanan, manera finalisacion reconstruccion Caya Grandi cu e tram, un cambio den e infrastructura cu introduccion di e caminda di 4 via di aeropuerto te na Pos Chiquito, mudamento di haf y diferente otro mas. Pero tambe a papia di e plataforma di Dialogo Social cu a introduci desde 2009 unda cu ta haci un consulta cu stakeholdernan riba temanan grandi, sin lubida Town Hall Meeting. “Nos a scucha y traha gopi. Pero tin asina hopi mas pa haci y pesey mi ta para aki.”

E publico a haya un presentacion di con e situacion tabata antes y con e situacion ta awo, unda cu e cambio ta visibel. Un di e personanan presente, Tony Geerman, a expresa “locual nos ta wak ta un Aruba mas bunita cu nunca pa tur hende por disfruta di dje.” Esaki, e lider di AVP, ta algo cu mester pone un y tur pensa pa no cay den e situacion di antes, unda cu tabatin placa, pero no tabata uze na beneficio di e pueblo. “E desaroyo di awe, entre otro di MFA-nan, tabatin den pasado pero den Vondellaan y di un doño: papa y tanchi cu tabata huurnan cu Gobierno pa miyones di florin. Placa cu por a wordo uza pa pone troittoir of traha MFA. Aruba hamas por cay bek den man di e hendenan cu a coy placa di pueblo y uze pa nan mes.”

Na final el a bisa e publico cu su Gobiernonan a traha plan di diferente proyecto y a ehecuta nan. “Nan no a keda 30 aña den lachi.” Manera e hospital cu tin 17 sala di emergencia, y no mester warda 3 ora mas pa wordo atendi, y esnan cu ta warda no ta mira personanan gravemente herida ta yega pa nan wordo atendi. Pa tur e motibonan, e lider di AVP ta haya cu e partido mester haya e chens pa sigui cu e trabounan aki na bienestar di pueblo.

Expresionnan haci den e articulo aki no necesariamente ta refleha opinion di ArenaPoliti.co