{idkey=9526b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5650-jacky-van-putten-por-no-mas-promesa-bashi%3FItemid%3D101][title=Jacky+van+Putten+%28POR%29%3A+No+mas+promesa+bashi][desc=Dia+22+di+september+2017+e+pueblo+votador+ta+wordo+pidi+pa+un+biaha+mas+bay+urna+electoral+pa+asina+deposita+nan+voto+riba+un+partido+cu+lo+por+bay+representanan+den+e+proximo+gobernacion.+Un+derecho+sagrado+di+cada+ciudadano+di+e+pais+aki%2C+Aruba.+Bo+voto+lo+bay+determina+e+rumbo+cu+nos+pais+lo+bay%2C+e+lo+determina+ki+futuro+nos+y+nos+yiunan+lo+tin.+E+a%C3%B1a+aki+ta+unico+pasobra+nos+tin+e+oportunidad+pa+confronta+cada+partido+y+cada+candidato+cu+loke+nan+lo+kier+bay+implementa+den+nan+proximo+gober]}
Dia 22 di september 2017 e pueblo votador ta wordo pidi pa un biaha mas bay urna electoral pa asina deposita nan voto riba un partido cu lo por bay representanan den e proximo gobernacion. Un derecho sagrado di cada ciudadano di e pais aki, Aruba. Bo voto lo bay determina e rumbo cu nos pais lo bay, e lo determina ki futuro nos y nos yiunan lo tin. E aña aki ta unico pasobra nos tin e oportunidad pa confronta cada partido y cada candidato cu loke nan lo kier bay implementa den nan proximo gobernacion. E ta un momento unico pasobra nos mundo di tecnologia ta brinda cada persona e oportunidad pa acerca e candidato y confronte cu su plan, su promesanan. Mayoria di partido cu lo bay eleccion ta profila nan mes tanto den corant, radio television y internet. Casi tur dia tin programanan radial simultaneamente riba radio y facebook.

Abo como votador tin e oportunidad unico pa kibra e tradicion y uza e oportunidad brinda pa cuestiona e candidato, bo por sintonisa e programa y directamente intercambia bo precupacion y preguntanan cu e candidato. Live bo por puntra pakico e ta para y kico bo lo kier mira den e proximo gobernacion. Nos no tin e limitacion mas cu nos mester warda un debate of ora nan yega bo cas cu yen di pito, bandera y fiesta, pa asina bo expresa bo precupacion. Bo ta doño di bo voto y bo mester ta cla ken ta digno di dje. Nos tradicion di famia , nos tradicion di bario, nos tradicion politico mester wordo cuestiona. Tur partido ta evoluciona, ta cambia, canditatonan ta bay, otro ta bin y asina nan idiologia tambe. Ningun organisacion ta statico, nan ta adapta na e momento y tempo. Esaki tambe ta conta pa e votador. Bo tambe mester cambia y adapta na loke e politica a  bin ta transforma. Politica di 40 aña pasa no ta awe. Politica di promesa, pinta casteel den shelo a pasa pa pasado. Nos mester bira realistico y no kere mas den promesanan bashi. Laga bo opinion wordo scucha y pidi splicacion di e programa di partido y con nan lo bay implemente. Mester por splica e realismo di nan programa. Djis primiti tur sorto di proyeto sin demostra con nan lo bira realidad, ta promesanan bashi cu aña aden y aña afo partidonan tradicional a tapa wowonan di nos votador. Por cambia, por opina sin miedo y por dicidi contra tradicion y promesanan bashi. Abo ta e futuro di Aruba y bo voto ta e yabi pa esaki. Ora bo tende promesanan bashi , cuestiona e partido, no entrega bo voto barata mas, cu un bandera of sticker. Exigi respet pa bo persona y voto. Un obligacion di un gobierno no ta  bo debe cu nan, cumplimento cu un programa realistico alcansabel ta nan mandato na bo. Asina ta NO MAS PROMESA BASHI.

Expresionnan haci den e articulo aki no necesariamente ta refleha opinion di ArenaPoliti.co