{idkey=1371b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6417-eromil-bakmeyer-por-bo-voto-ta-conta-part-iii%3FItemid%3D101][title=Eromil+Bakmeyer+%28POR%29%3A+Bo+voto+ta+conta%21+Part+III][desc=]}
“Un voto pa un partido nobo, NO ta un voto perdi” 

Hopi biaha por tende e argumento cu si bo vota pa un partido nobo of chiquito, esaki ta un voto perdi. Esaki no ta berdad segun sr. Bakmeyer. Aruba a sa di crece di un isla chiquito y orguyoso, pa un isla grandi den su logronan y respeta den Caribe y den mundo henter. Asina tambe un partido nobo manera POR lo sa di crece cu e sosten di nos hendenan orguyoso y respeta cu tin e isla aki na pecho. Hunto nos POR! 

UN VOTO PA UN PARTIDO NOBO NO TA UN VOTO PERDI 
Niun partido aki na Aruba, ni na cualkier otro lugar na mundo a nace mes ora grandi y exitoso. Tur partido tabata tin nan comienso humilde. Un ehempel ta partido AVP cu na 1949 tabata tin 6.257 voto, a cai na 1977 te na 1.209 voto y a jega na 26.476 voto na 2013. Tambe partido MEP, cu por cierto a nace for di partido AVP, tabata tin su ups and down durante su añanan di existencia y a lucha pa crece.

Sr. Bakmeyer ta elabora, bisando cu partido POR tin e ventaha cu nos partido a wordo establece den un tempo moderno y den un tempo caminda Aruba ta cla pa tuma un rumbo diferente. Door di e technologia di awendia, POR no tin cu depende di e ‘word of mouth’ pa difundi su mensahe, vision y plan di gobernacion, pero por jega directamente na e pueblo via di e medionan social. Esaki ta hasi cu na tur skina di Aruba e mensahe di cambio ta drentando nos hogarnan, locual ta pone cu e famia di POR ja a crece grandemente den nos comunidad, prome cu e election mes a tuma luga ainda.

Mas y mas hende ta uniendo nan mes na e partido nobo, cu ta cla pa acerca e retonan di nos comunidad a base di analisis, factibilidad, racionalidad y cu un mente habri. Tambe POR ta para pa enfoke riba innovacion, renovacion y transformacion riba tur nivel, inclusivemente ariba nivel politico.

Nos mester cambia e manera cu nos ta hasi politica na Aruba y bin cu un manera collaborativo y participativo pa goberna e pais aki. POR ta para pa integridad, caminda nos kier ta transparente, critico y auto-critico riba tur nivel y caminda cu gobernacion ta den contacto estrecho y directo cu comunidad.

Pesei partido POR tin tur e confiansa cu nos lo wordo sosteni door di un gran cantidad di hende na Aruba y lo sali como un partido grandi y victorioso den e election di dia 22 di September venidero.


UN VOTO PA UN CANDIDATO NOBO SIGUR TIN VALOR
Ami, Eromil Bakmeyer, como un candidato nobo den politica, tin hopi bentaha tambe y un voto pa mi sigur lo tin su valor. Como un professional den e ramo di salubridad y cu un passion personal pa nos muchanan y hobennan y tambe pa nos grandinan, mi ta drenta politico cu hopi experiencia. Mi ta trece mi experiencia invaluable for di mi estudio, mi experiencianan di trabao den e ramo di salubridad na Hulanda y Aruba, mi experiencia cu mi pacientnan, mi experiencia cu actividadnan voluntario pa comunidad y cu mi propio experiencianan como cuidadano. Esaki ta pone cu mi por bin cu feedback y ideanan nobo y innovativo basa riba e realidad cu nos ta biba aden y e caminda cu nos mester tuma pa mehoracion. Tambe mi no a bin mara na ningun interes commercial, monetario of politico. Segun sr. Bakmeyer tur e factornan aki ta hasi cu e ta drenta politica cu hopi motivacion pa traha pa pueblo y pa pueblo so!

Expresionnan haci den e articulo aki no necesariamente ta refleha opinion di ArenaPoliti.co