{idkey=8216b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5632-andin-bikker-por-gobierno-ta-riesga-pa-hulanda-impone-riba-aruba-un-integriteit-kamer%3FItemid%3D101][title=Andin+Bikker+%28POR%29%3A+Gobierno+ta+riesga+pa+Hulanda+impone+riba+Aruba+un+Integriteit+Kamer][desc=Segun+Andin+Bikker+di+Partido+POR+e+Forza+Nobo%2C+e+gobierno+aki+ta+riesga+pa+Hulanda+impone+un+decreto+riba+dje+di+introduci+un+Kamer+di+Integridad.+Bikker+a+splica+esaki+despues+cu+den+conferencia+di+prensa+a+bin+un+pregunta+cu+si+POR+ta+evaluando+pa+bay+Openbaar+Ministerie+pa+haci+denuncia+riba+iregularidadnan+di+gobierno+cu+POR+a+constata+y+tin+prueba.+Bikker+a+bisa+cu+seguramente+nan+ta+evalue+pero+e+dimension+ta+bay+un+tiki+mas+leu.+E+dimension+ta+cu+Reino+Hulandes+y+testigo+ta+cu+Sint+Maart]}
Segun Andin Bikker di Partido POR e Forza Nobo, e gobierno aki ta riesga pa Hulanda impone un decreto riba dje di introduci un Kamer di Integridad. Bikker a splica esaki despues cu den conferencia di prensa a bin un pregunta cu si POR ta evaluando pa bay Openbaar Ministerie pa haci denuncia riba iregularidadnan di gobierno cu POR a constata y tin prueba. Bikker a bisa cu seguramente nan ta evalue pero e dimension ta bay un tiki mas leu. E dimension ta cu Reino Hulandes y testigo ta cu Sint Maarten a haya un decreto cu basicamente nan a instrui e gobierno di Sint Maarten y Gobernador pa haci tur posible pa institui un Kamer di integridad.

Un kamer di integridad ta bay mas leu cu solamente un acto ta castigable penal si of no. E ta bay pa loke bo ta sinti den fibra di bo ser como gobernante, si bo ta gobernando corecto si of no. Anto esey ta e nivel cu nos mester yega, pasobra na final di dia Bikker ta kere, cu un sr. Sevinger mester por sinti den e fibra di su ser cu como minister cu tin intencion di goberna bon, no port a posible cu tantisimo biaha den su oficina e ta haya peticionnan sumamente cuestionable y na e momento eynan e ta core firma nan. Bikker a bisa cu su colega Otmar a señala algun di e casonan pero tin mas cu ta bin. Andin a bisa cu ta fresco den su memoria di un persona cu te ainda ta deteni na Merca cu den apenas cuatro dia, den dianan di fiesta, inclusive a haya un pida ampliacion di un tereno erfpacht asina firma den un rato, siendo cu tin miles di ciudadano cu ta wardando riba un pida tereno pa nan construi un cas y cu POR varios biaha a señala cu graficanan cu e propio minister duna nan na Parlamento bao Bikker su peticion, cu e gobierno aki a traha apenas 74 cas cu nan a hereda di su colega di partido sra. Marisol Lopez-Tromp, tempo e tabata den gobernacion. 

Pesey Bikker ta di opinion cu e gobierno aki ta riesgando pa Hulanda impone un decreto riba Pais Aruba pa obliga nan institui un integriteit kamer pa salvaguardia e integridad di pais Aruba. Y esaki despues cu ya caba a impone di un dia pa otro un protocol cu mester a impone CFT cu a haya supervision financiero pa e propio gobernacion di sr. Mike Eman cu no sa con pa ahusta su prioridadnan y goberna e pais aki na un manera financieramente responsable. Esey ta e prome prueba caba cu a wordo imponi riba Pais Aruba door di un decreto. Y e di dos gobierno awor ta riesgando pa nos haya un kamer di integridad riba e gobierno di Pais Aruba. “Ta di lamenta cu un señor Mike Eman pasobra nos ta pone e responsable pasobra na final di dia e ta carga e gabinete, y segun mi desde Juni 2014 e prome decreto cu a bin den su direccion pa loke ta trata e presupuesto cu Hulanda a instrui pasobra e no ta gobernando e pais aki na un manera responsable, di einan basicamente nos a ripara cu sr. Eman tin un politica di avestruz. E no kier tende, no kier scucha, kiermen e mes a admiti pa loke ta trata e caso di sr. Paul Croes, cu ta hopi tempo caba el a haya di diferente skina remarcanan, y el a duna den full un relato for di dia cu a bin investigacion, el a combersa abiertamente riba esaki pero e no a haci nada referente a esaki concretamente”, Bikker a splica.

Expresionnan haci den e articulo aki no necesariamente ta refleha opinion di ArenaPoliti.co