{idkey=6280b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5803-elton-lioe-a-tjam-abo-di-unda-e-174-330-florin-ta-sali-pa-paga-un-otro-consultant-stranhero%3FItemid%3D101][title=Elton+Lioe-A-Tjam+%28ABO%29%3A+Di+unda+e+174.330+florin+ta+sali%2C+pa+paga+un+otro+%E2%80%98consultant%E2%80%99+stranhero%3F][desc=]}
Parce cu e miyones cu ya ta wordo gasta na campaña y campañado pa molestia pueblo na nan cas tur bendita dia, no ta suficiente. Awo gobierno ta bay molestia pueblo tambe riba computer, tablet y celular. Recientemente pueblo por a tuma nota di un ‘Ministeriële Beschikking (MB)’ di 13 maart 2017 y un ‘Agreement’ di 26 april 2017, firma pa e prome minister, unda e la compromete e pueblo pa bay uza servicionan di un ‘consultant’ stranhero, pa ‘informa’ pueblo via ‘social media’. Wel manera tin stipula den e prome punto di dicho MB ‘..het bevorderen van TRANSPARANTIE’, nos ta pidi transparencia pa lo siguiente. 

Den dicho MB, ta wordo menciona un periodo di duracion di 1 maart 2017 te 31 december 2017 (Decision I). Pero den e ‘Agreement’ cu e ‘consultant’, ta papia di 16 maart 2017 te 30 september 2017. 

Den dicho MB, tin ‘dat voor afname van de diensten een maximum wordt gesteld van US$ 2.000 per maand’ (Decision III). Pero den e ‘Agreement’, tin ’Client’s charge for the matters will be a monthly fee of US$ 14,900. Pues loke e ‘consultant’ ta bay cobra, en realidad ta 745% mas cu tin para den e MB. Pues e prome minister a regala e ‘consultant’ 174.330 florin pa 6,5 luna di trabou. E ‘Agreement’ aki ta surpasa 100.000 florin y segun articulo 25 di e Comptabiliteitsverordening (AB 1989 no 72 (CV)), esaki mester a bay anto via un ‘openbare aanbesteding’.

Den dicho MB, tin cu ‘..afgezien wordt van het houden van onderhandse aanbesteding (Decision II). Articulo 26 CV, ta splica ki ora un ‘onderhandse aanbesteding’ por y cua procedura mester wordo uza. Den e MB aki, e prome minister a scoge pa no uza ni un ‘openbare of onderhandse aanbesteding’. Pa situacionnan asina, articulo 26 lid 3,4 CV mester wordo aplica. Pero ningun caminda den e MB aki, e prome minister a splica dicon un ‘openbare of onderhandse aanbesteding’ no tabata posibel. Tampoco tin e ‘beschikking’ unda hunto cu e minister di Finansas e otorgamento publico di e proyecto aki a wordo determina como ‘ondoelmatig’. Den e MB aki, tampoco e prome minister a comproba suficientemente, segun articulo 26, lid 4 CV, dicon a scoge pa no uza un ‘openbare of onderhandse aanbesteding’.

Pues conforme articulo 31, lid 3 sub b CV, e MB di 13 maart 2017 di 174.330 florin ta ‘NIETIG’. Y esey ta encera automaticamente cu e prome minister a bolbe comete un acto contra ley momento cu e la firma e ‘Agreement’ cu e ‘consultant’. Y den e caso cu e ‘consultant’ a cobra caba, hasta un delito.

Ta bon pa pueblo sa cu no solamente na Merca tabata tin manipulacion di eleccion via internet y ‘social media’. Durante e ultimo eleccion na Colombia, sr. Andrés Fernando Sepúlveda a splica: ‘Que ayudó a manipular las elecciones de nueve países de Latinoamérica mediante el robo de datos, la instalación de programas malignos (‘malware’) y la creación de burlas en las redes sociales (Critica.com.pa, 18 januari 2016)’. Pa esaki, e la wordo condena na 10 aña di prizon. E ex-presidente Álvaro Uribe di Colombia a splica ki impacto y consecuencia e manipulacion esaki tabata tin como consecuencia pa e pais: ‘Más evidente que hacker hace parte de maniobra político-judicial para inhabilitarnos moralmente mientras entregaban el país al terrorismo (El Espectador, 15 januari 2017)’. Pues un maniobra politico, cu a wordo haci intencional pa algun politico, pa kibra e moralidad di e electorado pa asina e corupcion y entreguismo pa un cierto clase politico, por sigui!

Si ta asina bon e isla aki a wordo goberna, anto dicon mester gasta tanto placa na campaña, manipulacion y intimidacion? Pueblo, bo tabata sa cu e prome minister tin 695.600 florin, e minister di Energia tin 1.337.100 florin y gobierno en su totalidad tin 3.3 miyon florin di bo placa e aña aki pa paga ‘consultants’ pa decora mal gobernacion y corupcion? Increibel pa mira cuanto placa di pueblo, ta wordo mal gasta, y na forma ilegal, pa trata di tapa bagamunderia y corupcion.

Den e investigacion penal Ibis, den cual entre otro, minister Paul Croes ta wordo sospecha di ‘ambtelijke corruptie’, maluso di su funcion, ‘mensensmokkel’ y labamento di placa, Ministerio Publico tambe a haci uzo di ‘social media’. Wel e lo ta bon si Ministerio Publico percura pa e mesun medio social cu e tambe ta uza, cuminsa un investigacion pa asina e keda liber di infiltracion cu e solo meta pa manipula e resultado di eleccion. Siman pasa, CAft a confirma cu gobierno a gasta den e prome tres lunanan mas placa, pa cual e la haya autorisacion. Pues di unda e 174.330 florin ta sali, pa paga un otro ‘consultant’ stranhero?

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co