{idkey=1181b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5711-dangui-oduber-mep-e-ley-cu-e-cambionan-di-e-kiesverordening-ta-cla-pa-wordo-trata-den-parlamento%3FItemid%3D101][title=Dangui+Oduber+%28MEP%29%3A+E+Ley+cu+e+cambionan+di+e+kiesverordening+ta+CLA+pa+wordo+trata+den+parlamento%21][desc=]}
For di anja pasa a cuminsa encamina e process pa trece cambionan den e kiesverordening, esta e manera con un miembro di parlamento ta wordo escohi y finalmente ta drenta parlamento. Nunca den historia di pais Aruba e cambionan aki a wordo haci. Esaki ta promer biaha cu ta entrega un ley di iniciativa pa cambia e kiesverordening. E cambio di mas grandi den e ley aki ta esnsera cu un politico ta bin na remarke pa drenta parlamento di Aruba a base di e cantdidad di voto cu e ricibi durante eleccion y no a base di sequencia di number manera cu e ta na e momentonan aki. E ley a wordo entrega for di luna di maart 2017 y despues esaki a wordo manda pa Raad van Advies. Una vez cu parlamento a ricibi e sugerencianan di Raad van Advies mi persona hunto cu nos lider Evelyne Wever Croes cu tambe a firma e ley aki, a haci e cambionan necesario manera cu Raad van Advies a sugeri.

Na e momentonan aki tur cos ta cla pa e ley aki wordo trata. No por ta existi NINGUN excusa of motibo pa presidente di parlamento keda sin yama e reunion aki. Mi ta spera di por conta cu sosten y cooperacion di presidente di parlamento sra Mervin Wyatt Ras pa yama e reunion aki pa asina nos por yega na un votacion. Pueblo kier mira cual ta e parlamentario cu ta bai CONTRA deseo di pueblo. E cambionan cu a wordo haci ta lo mas husto cu un politico por haci y esaki ta e fundeshi di un democracia. Un democracia ta funciona a bse di mayoria y di mesun manera un miembro di parlamento mestr wordo escohi. No por ta asina cu tin miembro di parlamento tin 47 voto y ta yama su mes representante di pueblo. Ora bo ta yama bo mes representante di pueblo ta pasobra realmente bo ta representa voz di pueblo den parlamento. E cambionan aki ta elimina por completo e fenomeno di politiconan sin voto ta drenta parlamento. 

E momento di berdad a yega pa parlamentarionan di AVP pa wak si nan ta para pa cambiona progrsivo cu ta na biniestar di nos democracia. Esnan cu tin deseo di vota contra e ley aki lo wordo huzga pa e pueblo dia 22 september pasobra nan ta bai linja recta contra deseo di un pueblo.

Nos ta spera cu pa otro siman caba e reunion publico aki wordo yama y nos ta haci invitacion na henter nos pueblo pa bin atende e reunion aki pa nan mes por ta testigo kendenan ta bai contra deseo di nan.

Nos a cumpli cu nos meta di entrega e concepto di ley aki, nos a contesta Raad van Advies ma liher cu nos tawata por y awor tur cos ta den man di presidente di parlamento. E presidente di parlamento, desde awe tin net 30 dia pa yama e reunion publico aki pa nos por yega na un votacion y mi tin pleno confianza cu e lo cumpli cu esaki!

Expresionnan haci den e articulo aki no necesariamente ta refleha opinion di ArenaPoliti.co