{idkey=1874b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5716-mep-con-ta-posibel-cu-rene-herde-den-su-ignorancia-no-ta-mira-tur-e-proyectonan-ehecuta-durante-2002-2009%3FItemid%3D101][title=MEP%3A+Con+ta+posibel+cu+Rene+Herde+den+su+ignorancia+no+ta+mira+tur+e+proyectonan+ehecuta+durante+2002-2009%3F][desc=]}
No tin ciego mas cu no kier mira……..  

Despues cu MEP a denuncia e forma con Gabinete Eman a derocha 3 biyon florin extra cu nan a haya na entrada durante e ultimo 7 añanan y cu te ainda nan no por responsabilisa nan mes pa cu e suma biyonario aki, awor ta parlamentario Rene Herde kier bolter cos y den su ignorancia a haya ta bon di puntra “Unda e placa a bay?” cu a ser genera durante e 8 añanan di gobernacion di MEP. Pero ta parce cu Rene Herde no a biba na Aruba durante e periodo di 2002 pa 2009, ya cu manera tur defensor ciega di AVP e no ta mira tur e proyectonan cu a ser ehecuta durante e periodo menciona. Ta pesey partido MEP un biaha mas ta resumi parti di tur e logronan aki, ya cu ta conoci caba cu ora AVP dilanti porta di eleccion conta su mentiranan 1000 biaha, e pueblo ta capaz di bolbe kere e mentiranan aki.

Construccion Casnan social 
Hecho ta cu Gabinete Oduber – mescos cu den pasado cu a construi tur e casnan social den Noord, Tarabana, Madiki, Rooi Congo, Village, Esso Heights - a percura pa construi casnan social na Bushiri (190 cas), Cura Cabay (120 cas), Seroe Patrishi (30 cas), Jaburibari (60 cas), Palisiaweg (50 cas) durante e periodo cu Rene Herde ta papia di dje. Sinembargo lo ta bon pa su persona splica pueblo cuanto ta e casnan social cu Gabinete Eman a construi durante e ultimo 7 añanan. NINGUN!

Construccion di Scolnan
Gobierno di MEP a construi un gran cantidad di scolnan nobo, esta Colegio EPI, Scol Preparatorio Conrado Coronel, Scol Basico Conrado Coronel, Scol Preparatorio na Sabana Basora, Scol Basico na Kudawecha, 11 klas extra pa Maria College. Tambe a renoba/expande e siguiente scolnan: Paulusschool, Commandeur Pieter Boerschool, Graf van Zinzendorfschool, Maria Regina School, Colegio SN, Sagrado Curason, Aloysiusschool, Colegio Laura Wernet-Paskel, Sin Jan kleuterschool, ex-Mater Dei school, Rosario College, Maria College.

Construccion Facilidadnan deportivo 
Un gran cantidad di facilidad deportivo a ser construi y renoba durante 2002-2009: Compleho Deportivo Frans Figaroa, Sporthotel, Parke Deportivo y Recreativo Jaburibari, Facilidad deportivo Simeon Antonio, Centro deportivo Jara, Parke di baseball ex-Winstonveld, Stadion di Lifida, Little Leaugue Ball Park, Parke recreativo Esso Heights.

Construccion di otro proyectonan 
Otro edificionan cu a ser construi tabata di Belasting/Finansa na Camacuri, DOW y DIP na Sabana Blanco, ATA, Centro Medico SN, Centrale di Setar den Hendrikstraat, SVB na San Nicolas, Teleshopnan den tur districto, Parke di Molina, Centro di Cuido pa Anciano na Palisiaweg, Warda di Polis na Noord, Centro di Husticia na Santa Cruz, edificio di APFA, Compleho Ecury, Busstacion Arubus, Area Comercial Arubus, Centro Hadicurari.

Esakinan ta solamente un parti chikito di tur e logro y proyectonan ehecuta durante e periodo di 2002-2009 y pa cual Rene Herde a puntra “Unda e placa a bay?”. Awor partido MEP y pueblo ta ansioso pa sa si Rene Herde – fuera di tur e klinkers, asfalt, embeyecimento di algun bario y e proyectonan PPP cu tur mester wordo paga ainda -  por produci un lista similar di proyectonan cu su gobierno a ehecuta durante e ultimo 7 añanan. Pueblo kier sa porfin na kico a malgasta y derocha e 3 biyon florin EXTRA na entrada! 

Expresionnan haci den e articulo aki no necesariamente ta refleha opinion di ArenaPoliti.co