{idkey=8438b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6506-rene-herde-avp-ganamento-y-fake-news-di-oposicion-no-ta-cambia-realidad%3FItemid%3D101][title=Rene+Herd%C3%A9+%28AVP%29%3A+Ga%C3%B1amento+y+%E2%80%9Cfake+news%E2%80%9D+di+oposicion+no+ta+cambia+realidad][desc=]}
“Nan intencion no ta pa hiba un debate publico riba idea y plannan pa nos pais. Nan intencion no ta pa contribui na desaroyo positivo di nos pais. Nan intencion ta pa haci tur cos, hasta si ta ilegal, incorecto, anti-democratico of destructivo, pa purba gana eleccion. Anto gana eleccion no ta cu intencion di goberna nos pais pa miho. E ta djis pa co’i poder! Con otro bo por splica e sin fin di gañamento, trocemento di berdad, “fake news”, storianan increibel y “noticianan fabrica” di oposicion? E bon noticia ta cu tur e gañamento aki no ta cambia e realidad di progreso di Aruba cu AVP.” Asina Rene Herdé a bisa den e conferencia di prensa. Rene Herdé a toca e tema di e asina yama “noticianan” cu oposicion ta publica tur dia riba FaceBook y den algun corant. Enbez di bisa Pueblo kico nan lo haci den gobierno si nan gana eleccion, nan ta pasa TUR nan tempo ta inventa e gañamento aki. Ata aki algun ehempel di e gañamento y “fake news” di oposicion.

FAKE NEWS 
Dos ehempel di e “fake news” y gañamento di oposicion ta cu hopi hende chines cu no tin derecho di vota, lo a haya carchi di vota y cu gobierno lo bay nombra candidatonan di AVP den posicionnan di director.
Rene Herdé a splica: “For di e tempo cu a gara hende di MEP ta vota shete biaha (7) den un eleccion y cu a gara hende ta vota pa hende cu ya a muri, a cambia ley di eleccion na Aruba. Awor niun hende cu no tin nacionalidad Hulandes y cu no ta inscirbi na Aruba, NO POR VOTA! Ta solamente hende cu nacionalidad Hulandes y cu ta biba y ta inscribi na Aruba, ta haya carchi di vota di Censo! Si cualkier hende presenta pa vota cu carchi di otro hende of cu purba vota sin cu e tin derecho di voto, e ta core riesgo di bay sera! E ultimo hendenan cu a purba haci esaki tabata hende di MEP. Ta pesey a cambia e ley y haci’e MEP-proof!”

Pa loke ta e storia di nombramento di candidatonan di AVP den posicionnan halto, Rene Herdé a sigui splica esaki: “Ocho aña largo AVP por a nombra su hendenan den gobierno, manera cu MEP si a haci añanan y decadanan largo! Ta pesey pueblo ta bisa cu e aparato di gobierno ta yena cu hendenan di MEP. Ta pesey e ex-lider di MEP a bisa cu hasta ora MEP no ta den gobierno, nan ta goberna. Pasobra MEP a hinca asina hopi hende di MEP riba base POLITICO den aparato di gobierno. Anto awor MEP y POR ta critica cu ta bay nombra hende den e aparato! Si pa ocho aña largo no a haci’e Bo ta kere cu awor den porta di eleccion ta bay haci’e? Bou candidatonan di AVP tin hopi hende sumamente capacita pa ocupa funcionnan halto. Esey ta sin duda. Pero e no ta e forma di nombra hende!”

Cu e dos ehempelnan ey Rene Herdé a ilustra e cantidad grandi di gañamento y “fake news” di oposicion! E realidad ta cu riba plannan pa futuro, pa soluciona retonan cu nos pais tin, niun di e partidonan a of por presenta plannan cu ta comparabel cu di AVP. Pa nan gaña ta mas facil cu goberna!

Expresionnan haci den e articulo aki no necesariamente ta refleha opinion di ArenaPoliti.co