{idkey=1837b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F6511-gabinete-me-ii-gobierno-a-firma-mb-nobo-na-beneficio-di-taxista-y-chofernan-di-autobus%3FItemid%3D101][title=Gabinete+ME+II%3A+Gobierno+a+firma+MB+nobo+na+beneficio+di+taxista+y+chofernan+di+autobus][desc=]}
MB anterior cu tabata crea duda pa loke ta traspaso di vergunning a keda elimina   

ORANJESTAD- Diamarsmainta Ministernan Eman y de Meza a anula e MB firma pa e minister anterior di Transporte y a firma un MB nobo cu tin un miho base legal pa taxista y chofer di autobus. Eman a splica cu prome cu a yega na e decision aki a reuni cu organisacionnan cu ta representa transporte publico na Aruba. Entra nan esnan di taxista, autobus y Arubus. Un topico cu semper a bin dilanti como preocupacion y deseo ta pa mehora transporte publico. Tambe pa sigura e posicion legal di esnan cu tin un vergunning di taxi of di autobus y nan pesonan financiero. Eman: "Tur hende cu tin un eenmanszaak sigur den caso di taxi y autobus, ta hay'e confronta cu cierto retonan."

Prome Minister Eman a splica cu hunto cu su colega nan a scucha tur e deseonan di e gruponan aki y algun punto tabata urgente cu mester a wordo atendi cu urgencia. Un di nan ta e MB cu e minister anterior a firma den cual e ta tuma e decision pa hala aden e derecho adkeri historicamente di traspaso di vergunning ora un taxista fayece cu un miembro di su famia por haya e vergunning pa core e taxi. No solamente ora un hende fayece, pero tambe ora un taxista yega cierto edad y kier traspasa e vergunning pa un yiu por ehempel cu esaki tabata posibel door di e derecho adkeri den transcurso di añanan. "E MB firma door di e minister anterior a trece hopi duda den e derechonan adkeri aki. Tabatin hopi preocupacion bou di taxistanan pa e cambio den e MB. Ya cu e tabata limita e derechonan adkeri y ta hala mas poder na e Minister cu e ta dicidi kico ta pasa cu e vergunning. Esaki kier men cu no automaticamente e vergunning tabata wordo pasa na un familiar manera tabata semper e custumber." E taxistanan kier a mira un cambio den esaki.

Minister de Meza a dicidi cu e lo honra e peticion di e taxistanan y el a firma diamars mainta e MB nobo y ta hala aden esun anterior unda e minister anterior a trece duda cerca taxistanan. E MB nobo ta sigura continuidad tambe di locual nan a construi pa hopi aña. Eman: "Pesey mes cu nos a tuma e decision pa haci taxistanan y esnan cu ta core autobus doñonan di nan vergunning pa esaki haya un base legal mas fuerte." Awor tur hende tin e siguranza cu si un dia nan kier traspasa e vergunning cu nan tin mas di diez aña pa un familiar of otro persona, esaki ta posibel. E siguranza ey ta bin den e ley (MB) nobo tambe.

Un otro punto importante cu a bin dilanti durante e reunionnan ta e calculacion cu taxistanan tin cu haci ora di cobra BBO. "E ta mas un 'rompslomp' administrativo cu ta varia hopi y ta pone un peso administrativo desproporcional compara cu e entrada cu gobierno ta haya di esaki", Eman a bisa. "Nos a consulta den Conseho di Minister y despues di diferente consulta a yega na e conclusion cu ta importante pa elimina esaki di transporte publico pa asina no tin e rompslomp aki. Un tiki alivio financiero, pero sigur un alivio grandi di e parti administrativo cu esaki ta causa."

Expresionnan haci den e articulo aki no necesariamente ta refleha opinion di ArenaPoliti.co