{idkey=3108b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5637-booshi-wever-upp-director-di-refineria-di-aruba-den-tono-arogante-ta-haci-mofa-di-instancia-y-politiconan-mientras-ta-keda-hunga-populista-cu-e-blender-na-san-nicolas%3FItemid%3D101][title=Booshi+Wever+%28UPP%29%3A+Director+di+Refineria+di+Aruba+den+tono+arogante+ta+haci+mofa+di+instancia-+y+politiconan%2C+mientras+ta+keda+hunga+populista+cu+e+%E2%80%9Cblender%E2%80%9D+na+San+Nicolas][desc=+Dia+9+di+maart+ultimo+UPP+a+saca+un+comunicado+di+prensa+relaciona+cu+cierto+aspecto+di+e+contrato+firma+entre+Gobierno+di+Aruba+y+PDVSA%2FCITGO.+Nos+a+mustra+cu+den+e+contrato%2C+cu+ciegamente+20+parlamentario+a+bay+di+acuerdo%2C+ta+duna+PDVSA%2FCitgo+e+prerogativa+pa+duna+ken+cu+e+kier+trabou%2C+for+di+unda+cu+e+kier%2C+cu+e+salario+cu+e+kier+y+paga+e+trahador+na+e+pais+cu+kier.+Sin+kita+afor+cu+e+por+kita+hende+for+di+trabou+na+su+santo+antoho.Tempo+cu+a+negocia+e+contracto+cu+Coastal+esaki+a+bai+den]}

Dia 9 di maart ultimo UPP a saca un comunicado di prensa relaciona cu cierto aspecto di e contrato firma entre Gobierno di Aruba y PDVSA/CITGO. Nos a mustra cu den e contrato, cu ciegamente 20 parlamentario a bay di acuerdo, ta duna PDVSA/Citgo e prerogativa pa duna ken cu e kier trabou, for di unda cu e kier, cu e salario cu e kier y paga e trahador na e pais cu kier. Sin kita afor cu e por kita hende for di trabou na su santo antoho.
Tempo cu a negocia e contracto cu Coastal esaki a bai den un forma transparente y diligente. E tempo ey nos yuinan di tera a haya e oportunidad di por a haya trabou cu un bon pago y nan no mester a pasa den e situacion na unda e compania Coastal por a "hire & fire" na nan antoho manera ta e caso awor aki. E tempo ey tampoco tabata tin tanto incertidumbre y badabada manera ta e caso awor. Pero nos por mira cu gobierno y algun parlamentarionan keto bay ta sali pa defende Citgo y e bendita contrato. Mientras cu ta sali noticia cu no tin full confianza mas den loke a keda acorda pa apertura di e blender, nos por scucha cu e director di compania Refineria di Aruba ta sali defende Citgo, bagatelisando tanto instancianan manera Banco Central y incluso parlamentarionan di pais Aruba, bisando cu nan mester stop di specula y basa loke nan ta bisa, riba hecho. Esta loke e ta bisanan. Ningun documento ta wordo entrega pa substancia loke e director ta bisa y lo no entrega ningun documentonan tampoco pasobra toch ningun hende ta compronde . Un arogancia espectacular.

Enbes cu nos a spera cu nos parlamentarionan por a duna e claridad necesario, nos ta haya parlamentario di mesun partido ta diferencia di opinion. Esta cu uno ta bisa di tin duda den loke ta e situacion di e refineria aki na Aruba y e probabilidad di su exito, y di otro banda nos ta haya un otro cu ta sali totalmente na defensa di Citgo, a base di loke su amigonan Venezolano a bis'e of confi'e. E parlamentario ta bay hasta asina lew di fulmina contra tur esnan cu lo ta contra di Citgo. E parlamentario sinembargo ta ignora e hecho cu no ta di awor cu tin instancianan of otro expertonan a duna nan opinionnan riba e cifranan dudoso cu a wordo presenta. Manera UPP por a compronde tin otro situacionnan cu a empeora y haci cu a bira dificil pa haya placa pa por start e “blender” na San Nicolas.
E mesun parlamentario cu ta trankilo di dje pa e noticia cu e tin di Venezuela, ta bisa cu e ta haci esaki pa e tantisimo empleadonan di Aruba cu mester haya trabou den e refineria. Pero e tempo ey UPP a cita partinan di contrato cu nos a logra haya y cu ta bisa cu Citgo of su companianan contrata por dicidi unilateralmente di tuma hende di afo, apesar cu tin Arubiano pa haci e trabou y gobierno ta OBLIGA di permiti nan haci esaki. Pa ser exacto articulo 9.4 y articulo 12.2(b)(iv) di e contracto aproba dor di 20 parlamentario.

E consecuencia di e “wurg contract” devastador aki ta cu nos hobennan Arubiano no tin e oportunidad tampoco pa haya un trabou decente y cu un bon salario den e compania aki. Pregunta ta dicon tin minister y parlamentarionan ainda ta defende esaki cu alma y cuerpo? Tin algo ey bou mas cu e derecho di trahadornan Arubiano, cu pa colmo no tin garantia pa tuma nan na trabou, dor di contrato negosha dor di gobierno y acepta dor di 20 parlamentario? Den partidonan di oposicion den Parlamento nos por mira tambe e ambivalencia aki, ora cu un ta critico riba e contrato of e situacion di e refineria, mientras cu tin otronan cu ta sostene esaki ciegamente.

UPP desde 2013 a boga pa un otro tipo di industria riba e tereno di refineria. Na 2015 nos a bisa cu lo por biba cu un reapertura di e refineria, pero mas bien como un forma pa nos yuda mitiga e peso riba e lomba di pueblo pa e desastre financiero cu gobierno di Mike Eman a hinca nos pueblo aden. Pero esaki no a nifica tampoco cu mester a vota pa vota na fabor di e proyecto, anto awor bin grita cu kier defende e cuponan di trabou pa Arubianonan. Mescos tambe cu nos por scucha un parlamentario papia cu mester bin cu un ley ambiental, mientras cu den contrato di Citgo tin para cu Aruba no por impone ningun tipo di regla of ley ambiental riba Citgo, ya cu esaki por ta motibo pa e bandona Aruba y haciendo uzo di su derecho riba garantia.

Remarkabel den e declaracion di sr. Koolman ta, cu nos por a constata un fenomeno nobo den mundo di negoshi. Ta exonera Valero di tur cos, ta firma y acorda cu Citgo un contracto fenomenal y lucrativo y pa despues bay determina e balor, pa mira si por haya e fondonan necesario pa "refurbish" e ex-refineria aki? Ta ken ta cumpra algo y despues ta bai determina su balor? Who is fooling who?
Ta p'esey Nelson English no tabata mag di ta den e grupo, pasobra e si lo a mustra cu e deal ta uno cu al final lo horca nos pueblo? Kico ta pasa si bin resulta cu e balor ta hopi abou? Den e caso ey ta ken lo mester bai furni e placa pa e trabow pa pone e "blender" funciona? Si no haya financiamento, ata Aruba cu un cantidad di hero bieuw y sin e "blender". E amigonan di Venezuela lo bin yuda e ora ey?
Ni cuanto e ministernan, parlamentarionan, e director y Citgo trata di defende e contract estrangulante aki, nos mester constata cu ta algun hende individual na Aruba y un gobierno marxista lo bai benificia di e deal desastroso aki. Tanto gobierno di Aruba, como nos Parlamento definitivamente a faya barbaramente den esaki.

19 di mei 2017

Booshi Wever
Lider UPP
Brazil 163

Expresionnan haci den e articulo aki no necesariamente ta refleha opinion di ArenaPoliti.co