{idkey=9668b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5726-parlamentario-mr-juan-e-thijsen-mep-fraccion-di-avp-votando-contra-amienda-thijsen-mep-ta-confirma-e-hecho-cu-nan-ta-para-pa-corupcion-soborno-y-labamento-di-placa%3FItemid%3D101][title=Parlamentario+mr.+Juan+E.+Thijsen+%28MEP%29%3A+Fraccion+di+AVP+votando+contra+amienda+Thijsen%2FMEP+ta+confirma+e+hecho+cu+nan+ta+para+pa+corupcion%2C+soborno+y+labamento+di+placa][desc=]}
Segun Parlamentario mr. Juan E. Thijsen den e reunion publico tocante e ley di integridad Fraccion di AVP votando contra amienda Thijsen/MEP ta confirma e hecho cu nan ta para pa corrupcion, soborno y labamento di placa. Ta asina ki cu e tema di integridad tin hopi atencion tanto na Aruba como den Reino. Nos por mira con Hulanda ta bai asina leu di exigi pa Sint Maarten introduci un integriteitskamer. Diaranzon 31 di mei 2017 tabata asina leu cu Parlamento di Aruba a trata un ley di iniciativa di Parlamentario di AVP senjor Marlon Sneek pa cu e tema di integridad. Segun Parlamentario mr. Juan E. Thijsen e ley manera presenta na prome instante pa Marlon Sneek tabata mustra simpatico den terminologia parlamentario. Sinembargo Marlon Sneek a cuminsa e reunion entregando cambionan cu a kita tur djente di e ley. Ta bisto cu e sucesonan den ultimo tempo na unda e credibilidad y integredidad di miembronan di AVP ta te na suela sigur a pone presion riba Marlon Sneek pa no complica bida di su diferente companjeronan di partido cu ta den problema. Parlamentario mr. Juan E. Thijsen ta lamenta esaki pasobra un oportunidad di pasa un bon ley ta bai perdi. Es mas ni un amienda presenta pa Parlamentario mr. Juan E. Thijsen den nomber di Fraccion di MEP tampoco no a yuda. Al contrario Marlon Sneek a bin cu un cambio den e ley cu awor a bruha e situacion mas ainda. Central di e discucionan tabata e pregunta kiko bo ta haci ora un Ministro wordo declara como sospechoso den un caso penal. Manera ta conoci Ministro di Labor, Asuntonan Social y Hubentud ta poni riba non activo sin cartera pero cu pago locual segun constitucion di Aruba no por. Marlon Sneek bao presion di AVP a busca un caminda pa hustifica esaki den e ley di integridad. Akinan nan kier acomoda un colega di partido locual cu no ta husto compara cu otro personanan den comunidad. Por ehemplo un funcionario publico si ta wordo retira asina cu e ser declara sospechoso den un caso penal. Ta resalta cu Marlon Sneek a copia su proposicion di ley for di esun di Corsou y deliberadamente a laga e articulo afo cu ta bisa cu den un caso asina e Ministro mester retira. Parlamentario mr. Juan E. Thijsen a presenta un amienda pa coregi e proposicion di ley di integridad di Marlon Sneek y regla cu e Minister tin cu retira ora di ser declara sospechoso den un caso penal. Akinan ta unda Marlon Sneek a haciele pio. Marlon Sneek a propone pa si den caso e Ministro sospechoso worde deteni si e ta wordo retira. Esaki segun Parlamentario mr. Juan E. Thijsen den practica e ta bai trece problema por ehemplo si e Ministro worde deteni pa algun ora of dia y despues ser laga liber te ora su caso bin dilanti. Un otro aspecto di e ley cu tambe a ser adapta na ultimo momento pa Marlon Sneek bao presion di su partido ta pa acomoda Minister Schwengle pa e por sigui haci dos trabao. Segun Parlamentario mr. Juan E. Thijsen ainda ta fresco den nos memoria cu gobierno di AVP pa medio di AZV y Salubridad Publico a forsa Dr. Maikel Kelly parlamentario di MEP pa escoge entre politica y su profesion. Awor si ta acomoda Alex Schwengle mientras Dr. Kelly finalmente mester a laga politica. Segun Parlamentario mr. Juan E. Thijsen integridad bo no ta midi cu solamente bin cu un ley di integridad y vota pro. Ta full bo comportacion como politico ta conta. Parlamentarionan di AVP a permiti Gabinetenan di Mike Eman actua contra nos constitucion, contra leynan y contra principionan di bon gobernacion. Tin hasta veredictonan di hueznan contra Ministronan di Gabinete di Mike Eman cu ta confirma esey. E pueblo merece representantenan integro tanto den funcion legislativo como ehecutivo. Parlamentario mr. Juan E. Thijsen ta spera cu pueblo den e ultimo 8 anjanan por a mira ken ta ken y percura pa un parlamento y gobierno di hendenan drechi. Hunto p'e cambio sin miedo. 

Expresionnan haci den e articulo aki no necesariamente ta refleha opinion di ArenaPoliti.co