{idkey=4842b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F5868-julie-de-cuba-red-red-ta-senala-cu-pa-bringa-corupcion-e-prome-stap-ta-di-vota-conciente-y-no-vota-pa-partidonan-tradicional%3FItemid%3D101][title=Julie+de+Cuba+%28ReD%29%3A+ReD+ta+se%C3%B1ala+cu+pa+bringa+corupcion+e+prome+stap+ta+di+vota+conciente+y+NO+vota+pa+partidonan+tradicional][desc=]}
Partidonan tradicional tin mal fama. Desde comienso di nos Status Aparte nan a practica corupcion. E ta simpel bisa sinembargo e ta un hecho. Cu ReD den gobernacion lo cuminsa un guera contra corupcion. Corupcion politico nifica e mal uso di poder gubernamental dor di mandatarionan of funcionarionan publico den funcion pa beneficio personal.

Na momento cu un gobernante (Minister) haci su mes culpabel na actonan di corupcion, esaki  ta toca finanzas publico  cu ta placa di pueblo. E ta toca e credibilidad di nos pais. E acto coruptivo di e mandatario al final ta afecta e cartera di e pagador di belasting. Pues tin dos consecuencia: 1. placa no ta bai unda e mester bai 2. e gobernante corupto ta stroba pueblo di haya locual e ta paga belasting pe, pues no tin placa pa mehora educacion, cuido medico, seguridad, onderstand etc. 
Un inversionista di afo hopi liher lo ripara cu si e paga un funcionario publico placa bao man e proceso pa establece un negoshi akinan ta bai mucho mas rapido. E funcionario publico cu ta tuma e placa mientras ya pueblo ta pagando su salario pe haci su trabao ta haciendo su mes culpabel na corupcion di dia cla. 
Corupcion mayoria bes ta sosode concientemente. E ta pasa caminda no tin control y ta wordo fomenta pa buraconan den ley. Tin ora  necesidad di personanan ta conduci na corupcion. No pesey e ta bira menos condenabel. E situación, esta cu Aruba ta den gara di corupcion ta alarmante. Ela bira algo asina normal cu mandatarionan ta tribi di saca probecho, ya cu na Aruba e acto di corupcion ta practica di tur dia, y cu no ta strobanan den nan funcion.

Un minister den funcion cu en bes di entrega su retiro ta sali dilanti, proclama su mes 100% inocente di cargonan serio di parti di instancianan hudicial, e.o. Ministerio Publico, ta demonstra un falta TOTAL di consenshi y di respet pa nos sistema hudicial. Tambe e ta falta respet pa e pueblo votador pasobra e ta tribi di pidi mi mi voto y esun di bo, esey no ta algo totalmente condenabel? Unda e repudio di pueblo a keda pa un acto cu ta mina autoridad di husticia? Ta husticia so por declar’e inocente. E tin cu sinta warda riba e uitspraak. Tur lo demas cu ta ser papia ta “wishful thinking” y ta pa traha riba sentimento di e Arubiano.
Necesidad tambe ta tera fertil pa corupcion. Si e doño di un snack truck cu ta traha duro tur dia di siman pa cria su famia ta ripara cu e por cobra un turista e prijs cu e tin stipula na florin, na dollar e ta haci'e. Y e ta “get away” pasobra no tin control y e tin necesidad.
Hasta partidonan politico cu ta cumpra candidatonan pa subi lista cu promesa di duna nan puesto di minister of director etc. den un proximo gobernacion ta corupto y punto.
Un candidato politico cu subi un lista pasobra e partido ta grandi y tin placa, tin den mente cu esey ta facilita su entrada y progreso riba e arena politico. Sin puntra su mes di unda e partido ta haya placa y sin evalua kico e partido ta para pe. Hopi doloroso pa bisa pero berdad ta cu e persona aki ya a ser corumpi. E ta wak e placa y su posibilidadnan so y no ta interesa mucho den metanan di e partido cu e ta join. For di e momento ey caba pueblo tin suficiente informacion pa evalua su eventual potencial pa comete actonan di corupcion.
Pa Partido ReD Democratico un candidato mester ta integro prome cu tur cos, e mester tin un nivel di pensa cu ta inclui normanan moral y social, e mester funciona a base di su consenshi y tambe e mester tin un compromiso sincero cu pueblo pa bai guera contra corupcion. Partido ReD Democratico no por y nunca lo priminti nada na ningun candidato. Ta na nos como candidato pa mustra cu nos tin weso di lomba y ta para pa integridad y transparencia. Ta na nos pa convence pueblo cu nos partido ta realmente diferente y cu individualmente cada un di nos ta sincero den nos meta pa sirbi Aruba. Nos sa cu tin un grupo hopi grandi di ciudadanonan eyfo cu ta hartá di campañanan miyionario cu sticker y bandera, insulto y pleito. ReD ta enfoca riba e hecho cu bo voto ta un arma poderoso pa bringa corupcion y inhusticia. Pues eherce bo derecho di vota den silencio y di un forma digno manera ta ser spera di un ciudadano di un pais educá. Sea orguyoso cu abo ta diferente y ta respeta bo mes y cu abo ta compronde e nificacion berdadero di biba cu dignidad den un pais democratico cu ta respeta ley. Y hunto nos ta bai ataca corupcion na su raiz.

Julie de Cuba – Candidata pa ReD Democratico – Eleccion 2017

Expresionnan haci den e articulo aki no necesariamente ta refleha opinion di ArenaPoliti.co