{idkey=7958b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2974-gerick-croes-mep-formacion-di-nos-comunidad-mester-tin-contenido-real-y-duradero-sin-exclui%3FItemid%3D101][title=Gerick+Croes+%28MEP%29%3A+Formacion+di+nos+comunidad+mester+tin+contenido+real+y+duradero+sin+exclui%21][desc=Pueblo+mester+realisa+cu+nos+tin+un+problema+social+grandi+cu+ta+afectando+nos+pais+y+si+nos+no+frena+esaki+na+tempo+door+di+brinda+oportunidad+na+nos+hobennan+pa+tin+un+futuro+stabil+e+lo+por+sali+pueblo+di+Aruba+caro+den+tur+sentido.+Pa+splica+mas+di+e+problema+aki+ta+bon+pa+pueblo+sa+cu+e+ta+consisti+di+diferente+componentenan+entre+otro+a%29+perspectivanan+di+educacion+y+empleo+pa+hubentud+a+fracasa+na+Aruba%2C+b%29+aansluiting+di+ense%C3%B1ansa+y+mercado+laboral+nunca+no+a+funciona+na+Aruba%2C+c%29+emple]}
Pueblo mester realisa cu nos tin un problema social grandi cu ta afectando nos pais y si nos no frena esaki na tempo door di brinda oportunidad na nos hobennan pa tin un futuro stabil e lo por sali pueblo di Aruba caro den tur sentido. Pa splica mas di e problema aki ta bon pa pueblo sa cu e ta consisti di diferente componentenan entre otro a) perspectivanan di educacion y empleo pa hubentud a fracasa na Aruba, b) aansluiting di enseñansa y mercado laboral nunca no a funciona na Aruba, c) empleo di e ser femenino ta un capitulo neglisha, d) maneho actual di bijstandtrekkers nunca no a conoce un "aanpak" adecua, pa conclui e) maneho social na Aruba no ta parando un aumento di drop-outs cu ta keda subi na Aruba. Esakinan hunto ta forma un problema gigantesco y cu consecuencia riba termino largo pa e desaroyo social y economico di nos pais.

Apesar cu tin programanan manera formacion social esaki no ta brinda un solucion structural y duradero. Na promer lugar un programa asina
NO mester exclui tampoco limita participacion di hobennan. E programa ta valido pa esnan entre 18-24 aña excluyendo hobennan cu ta dropout entre edadnan di 14-17 aña. Den caso asina warda pa haya un oportunidad pa wordo forma no ta un opcion realistico. Ademas e hobennan femenino no por tuma parti den e programa aki siendo cu hopi ta dropout pa diferente motibo y ta na cas sin un second chance pa sobresali.

Loke mester ta prioridad pa cualkier gobierno ta e recapacitacion di e ser humano. Logicamente ora di recapacita bo ta invertiendo den e futuro economico di nos pais tambe pasobra bo lo reduci structuralmente desempleo y na su lugar fortificando fondonan sociaal (aov,azv), y tin un economia cu lo crece. Realidad ta cu Aruba no tin un "sociale vangnet" cu por duna e persona un di dos chens cu mas perspectiva. Den e caso specifico di Aruba algo cu lo por hasi un diferencia ta un Centro di Recapacitacion ( om-bij-herscholing) en particular pa hoben riba edad di 16, cu a pega cu scol of trabou y ta sin rumbo. Logicamente e ser femenino cu ta na cas y cu kier siña un abilidat y bai traha tambe lo por bai e centro aki. E centro lo mester tin un rol activo como un intermedio pa trabou, pa facilita e hobennan yega na un trabou, ofrece cursonan pa bijstandtrekkers pa asina bira mas apto pa drenta mercado laboral y tambe pa empresanan cu kier manda trahador ( nivel LBO ) pa bijscholing. Logicamente e cursonan cu lo wordo duna lo bai wordo basa riba necesidadnan di e mercado laboral.

Projecto Ban Traha ta uno sin contenido y solamente dirigi riba medidanan pa pone hende bai traha y spaar gobierno placa di bijstand distanciando su mes di un rol activo sociaal pa e persona por desaroyo su mes manera debe ser. E projectonan cu ta andando di Minister Paul Croes mas bien por wordo considera como lollipop pa pueblo nificando cu nan ta sin contenido, adhoc, superficial y manipulativo! Pasobra mientras ta sigui cu projectonan superficial e problema gigantesco social-educativo-laboral-economico no ta wordu soluciona pero empeora via un debe nacional desproporcional cu consecuencianan pa presepuesto y pa pueblo via medidanan inhusto. Pesei un centro di recapacitacion lo ta importante pa considera ya cu su rol ta un complimentacion banda di educacion, e maneho social y un maneho Laboral no optimal cu mester haya un restructuracion total mas pronto posibel. Inverti den e ser humano mester ta e top di prioridadnan di un gobierno cu supuestamente ta propaganda sostenibilidad. Laga nos enfatisa cu enseñansa ta e yabi pa un desaroyo duradero pa nos pais!

Expresionnan haci den e articulo aki no necesariamente ta refleha opinion di ArenaPoliti.co