{idkey=8642b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F3746-gilbert-webb-abo-nos-hobennan-tambe-kier-tin-un-futuro-digno-riba-nos-propio-isla%3FItemid%3D101][title=Gilbert+Webb+%28ABO%29%3A+Nos+hobennan+tambe+kier+tin+un+futuro+digno+riba+nos+propio+isla][desc=Dentro+di+algun+dia%2C+hopi+di+nos+hobennan+lo+bay+biaha+atrobe+pa+exterior+pa+sigui+un+estudio+mas+avansa.+Pa+hopi+mayor+ta+un+momento+emocional+y+dificil.+Paso+e+momento+ey%2C+e+ora+a+yega+pa+despedi+di+nan+yiu+y+nan+unico+consuelo+lo+ta+pa+confia+cu+nan+yiu+cu+lo+pone+den+practica+tur+e+bon+cu+e+la+si%C3%B1a+di+nan.+A+pesar+cu+awendia+nos+tur+ta+bibando+den+un+mundo+moderno+unda+tin+social+media+cu+por+suavisa+e+despedida+y+reduci+e+distancia+entre+e+sernan+keri%2C+e+ta+keda+un+aspecto+emocional.+E+des]}
Dentro di algun dia, hopi di nos hobennan lo bay biaha atrobe pa exterior pa sigui un estudio mas avansa. Pa hopi mayor ta un momento emocional y dificil. Paso e momento ey, e ora a yega pa despedi di nan yiu y nan unico consuelo lo ta pa confia cu nan yiu cu lo pone den practica tur e bon cu e la siña di nan. A pesar cu awendia nos tur ta bibando den un mundo moderno unda tin social media cu por suavisa e despedida y reduci e distancia entre e sernan keri, e ta keda un aspecto emocional. E despedida anual no solamente tin un impacto riba esunnan envolvi, pero tambe riba e sociedad. Cada aña e sociedad ta manda mas di 100 hoben pa exterior, sin sa si un dia nan lo bolbe bek Aruba. E grupo aki no solamente ta representa un parti di e futuro generacion, pero tambe e ta representa e fraccion mas inteligente di e sociedad na Aruba. Pues si cada aña mas di e inteligencia di e sociedad ta migra bay pa exterior pero ta poco ta regresa despues di nan estudio, anto e ora ta obvio cu e capacidad intelectual di sociedad, ta degenerando.

E desaroyo aki, ta wordo confirma pa oficina di estadistica. Segun nan cifranan, ta tiki hende den nos sociedad tin un estudio avansa. Esaki ta nifica cu si e maneho di no percura pa tin suficiente trabou na nivel pa nos inteligencia bolbe ora nan caba di studia den exterior, anto gradualmente nos sociedad lo bira mas dom. Of otro bisa, nos sociedad lo bira mas dependiente di otro nacionalidadnan pa su desaroyo. E maneho activo di diferente gobiernonan pa trece mas hende for di exterior pa bin traha na Aruba, solamente ta acelerando e proceso di degeneracion intelectual. Paso mayoria di e migrante cu ta bini Aruba, tin menos educacion y formacion cu e hende local. Hasta banda di esaki, e migrante, ta cambiando e clima laboral structural y permanente na nan fabor. Awendia e fenomeno di ‘Cheap Labor’ y trabou temporal, ta algo normal na Aruba. Awendia e ta casi imposibel pa un hende local por haya un trabou duradero y bon paga. Si antes ainda algun hende local por a haya un trabou den gobierno, awendia esey tambe ta pasado. Awendia solamente esunnan super leal na e partido na mando (Friends & Family), por haya un trabou den gobierno via contract y via e porta atras ‘sneaky y scondi’.

Pues e pregunta ta keda dicon gobierno ta manda tanto mucha bay studia den exterior cada aña, mientras nada ta wordo haci pa crea un ambiente laboral bon y duradero pa ricibi nan despues cu nan a caba di gradua y kier regresa nan pais bek? Hasta pa añanan largo, gobierno mes ta hiba un maneho di discriminacion contra su mesun yiunan di tera, cu e la manda den region pa studia medicina. Gobierno a pone tur sorto di barera pa stroba e hobennan aki bin eherce nan profesion medico na nan isla natal. Esaki no ta logico ni husto, si mira cuanto miyones AZV (gobierno) ta paga mediconan di paisnan bisiña cu tambe a studia medicina den region, pa tratamento medico. E maneho di gobierno di Aruba  pa exporta nos inteligencia pa exterior pa despues cera porta pa nan, pasobra gobierno kier privilegia otro nacionalidadnan, tin cu cambia. Ningun hende di un otro pais por stima y traha mas duro pa Aruba, cu su mesun hendenan. Mester stop di tuma nos haci y ban para e degeneracion intelectual y e rumbo destructivo di nos sociedad, cultura y identidad. E futuro di Aruba ta di nos hobennan y awor mas cu nunca, nos tin cu lucha locual ta di nos!   

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co