{idkey=5919b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F120-gabinete-me-ii-ipa-ta-bay-entrena-e-guianan-pa-traimerdia-scolnan-secundario-riba-cuido-y-desaroyo-sano-di-hobennan%3FItemid%3D101][title=Gabinete+ME+II%3A+IPA+ta+bay+entrena+e+guianan+pa+Traimerdia+Scolnan+Secundario+riba+cuido+y+desaroyo+sano+di+hobennan][desc=Instituto+Pedagogico+Arubano%2C+IPA+tambe+ta+uni+na+e+preparacionnan+pa+e+introduccion+di+un+Traimerdia+Scolnan+Secundario+riba+nos+isla.+%E2%80%9CE+cuido+di+e+hobennan+ta+cay+den+man+di+un+grupo+di+profesional+cu+no+necesariamente+tin+experiencia+cu+guia+di+hoben%2C%E2%80%9D+asina+Bart+Kool%2C+coordinador+di+e+proyecto+a+bisa.+A+scoge+pa+haci+uzo+di+empleadonan+publico+den+servicio+di+Pais+Aruba.+Esey+tin+un+meta+dobel.+Na+prome+luga%2C+e+empleadonan+publico+ta+haya+e+oportunidad+pa+haci+algo+diferente.+%E2%80%9CMi+ta+k]}

Instituto Pedagogico Arubano, IPA tambe ta uni na e preparacionnan pa e introduccion di un Traimerdia Scolnan Secundario riba nos isla. “E cuido di e hobennan ta cay den man di un grupo di profesional cu no necesariamente tin experiencia cu guia di hoben,” asina Bart Kool, coordinador di e proyecto a bisa. A scoge pa haci uzo di empleadonan publico den servicio di Pais Aruba. Esey tin un meta dobel. Na prome luga, e empleadonan publico ta haya e oportunidad pa haci algo diferente. “Mi ta kere cu nos tur kier haya un poco di variedad. Asina nos por recarga nos mes. Y dor cu nos ta haya nos mes ta organisa cosnan miho, e productividad ta aumenta,” segun Bart Kool. Di otro banda, no ta bin gastonan acerca pasobra e personanan aki ya ta ricibiendo un salario. “Nos ta busca coleganan cualifica y motiva cu kier asumi e responsabilidad. E coleganan ey por bin di e diferente departamentonan y cu diferente conocemento.” Pa prepara nan bon pa nan funcion y responsabilidad nobo, a busca un cooperacion cu IPA. IPA ta e Instituto Pedagogico Arubano cu pa añanan largo ta produciendo docente y ta duna guia general na e sector di enseñansa. IPA tin un servicio amplio y ta conta cu e conocemento adecua pa entrena e futuro guianan y sostene nan den nan trabou.

Den e comision cu a prepara e rapport riba ‘Traimerdia, Scolnan Secundario’ ta sinta Sr. Jose Fernandes Perna. Sr. Fernandes Perna tin hopi aña ta traha cu IPA y ta un pedagogo cu un trayectoria resaltante. El a apunta e programa di entrenamento y consecuentemente a cera e contacto cu IPA pa desaroya e programa. “For di cuminsamento tin un bon contacto cu Sra. Ava Thodé, director di IPA, y IPA tambe ta para completamente tras di e proyecto di ‘Traimerdia, Scolnan Secundario’,” asina Bart Kool a bisa. Finalmente tin un programa solido caminda ta percura pa e avance den experticio di e guianan riba diferente tereno. Den e entrenamento ta pone atencion riba, entre otro, e cooperacion mutuo entre e guia na e diferente localidadnan; kico ta e tarea y responsabilidadnan; con e organisacion di ‘Traimerdia, Scolnan Secundario’ ta hinca den otro; con nos ta bay ahusta na otro y con nos ta bay traha hunto. Den e parti aki tambe ta pone enfasis riba e manera con e guianan por entrena otro na nan trabou.

Banda di tur esaki tin cierto capacidadnan di e guianan cu ta bay wordo desaroya y profundisa. Kico ta e tareanan pedagogico y con ta planea e actividadnan, kico ta e tareanan social educativo y specifico como guia y mentor. Particularmente, riba e ultimo parti aki, IPA ta bay pone un di su expertonan disponibel den e persona di Leontine Merkies. E ta conoci caba cu e proyecto di Traimerdia y a yega di duna e entrenamento aki varios biaha caba. E ta pone atencion riba e desaroyo di e adolescente y reconocemento tempran di problemanan di conducta. Como cu reconocemento so no ta suficiente, tambe ta tira bista riba referencia na conocemento di e area social di cuido y salud di hubentud. Otro experto ta meneer Earl Euson. E ta maneha diferente aspecto manera: comunicacion y interaccion cu e grupo, tecnicanan di combersacion y dinamica di grupo. Meneer Jose Fernandes Perna adicionalmente lo pone atencion extra na e caracteristicanan specifico di e participantenan di e Traimerdia Scolnan Secundario. Loke popularmente ta wordo yama “un edad emocionante” por wordo refleha miho for di diferente angulo: con e clima di crianza ta mustra na cas; kico ta e structura di famia; kico ta e clima di enseñansa; e cultura di contacto entre hobennan di mesun edad y e influencia di media. Pa un parti, IPA ta conta cu un arsenal comproba di curso y pa otro parti IPA ta bay haci uzo di un metodo “evidence based’, completamente nobo: ‘Positive Action’. E parti aki ta den man di señoranan Roke Hoen y Diane Goedhoop. Esaki ta bira e base pedagogico den e entrenamento di e guianan. Den dje ta bin aspectonan manera desaroyo di e salud mental, emocional y moral di adolescentenan. “Nos ta bay duna un comprondemento di e desaroyo di identidad di hobennan y un idea metodico di e desaroyo di caracter y formacion di persona,” segun Roke Hoen.

Ta bay trata cu ta bay siña con “Doing the right thing” ta traha y con e “Thought-Action-Feeling cycle” ta traha. Tur esaki, den cuadro di instrui y desaroya e capacidadnan di entrenamento di e hobennan dor di e guianan.

Tin algun parti mas cu ta wordo finalisa manera e programacion di un rooster y e formacion di gruponan. Asina cu e procedura di seleccion di e guianan ta tras di lomba, ta cuminsa cu e entrenamento. “Nos ta bay cuminsa diaranson,” Bart Kool a indica. Asina e guianan por wordo bon prepara pa tuma e trabou ya cu no ta trata di un accion di un solo biaha. Entrenamento y preparacion di e guianan tambe ta wordo completa. Un responsabilidad grandi ta cu mayornan y otro envolvi tin confiansa den e calidad di e guianan. Mi ta kere cu, hunto cu coperacion di IPA nos ta bay logra esaki,” Kool a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co