{idkey=3214b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F140-booshi-wever-upp-no-tin-potencial-bou-yiunan-di-tera-pa-eherce-funcionnan-riba-nivel-ehecutivo-halto-of-pa-haya-contractnan%3FItemid%3D101][title=Booshi+Wever+%28UPP%29%3A+No+tin+potencial+bou+yiunan+di+tera+pa+eherce+funcionnan+riba+nivel+ehecutivo+halto+of+pa+haya+contractnan%3F][desc=Ultimamente+polarisacion+na+Aruba+ta+na+ordo+di+dia.+Nos+ta+ripara+esaki+den+e+arena+politico+local+mes%2C+pero+tambe+den+e+relacion+entre+e+partnernan+den+Reino+na+unda+miembro+di+VVD+sr.+Bosman+kier+introduci+un+ley+discriminatorio+pa+habitantenan+di+e+islanan+hulandes+den+Caribe.+Loke+sinembargo+ta+captando+mi+atencion+mas+y+mas%2C+ta+e+tendencia+na+Aruba+pa+scohe+personanan%2C+cu+sea+no+ta+radica+na+nos+isla%2C+of+cu+ta+recientemente+a+bin+biba+aki%2C+pa+funcionnan+ehecutivo+halto+of+cu+ta+haya+contra]}

Ultimamente polarisacion na Aruba ta na ordo di dia.
Nos ta ripara esaki den e arena politico local mes, pero tambe den e relacion entre e partnernan den Reino na unda miembro di VVD sr. Bosman kier introduci un ley discriminatorio pa habitantenan di e islanan hulandes den Caribe.
Loke sinembargo ta captando mi atencion mas y mas, ta e tendencia na Aruba pa scohe personanan, cu sea no ta radica na nos isla, of cu ta recientemente a bin biba aki, pa funcionnan ehecutivo halto of cu ta haya contractnan miyonario. Ta crea asina e impresion cu nos hendenan local no ta capacita pa eherce e tipo di funcionnan aki of no por cumpli cu contractonan.
E Landsverordening Toelating en Uitzetting (LTU) a wordo introduci pa reglamenta entrada y salida di personanan cu no ta residencia permanentemente riba nos isla. Esaki ta conta tambe pa e Hulandes Europeo . E regla aki pa e Hulandes Europeo ta data desde e periodo prome cu Statuut, y tabata tin como meta entre otro pa evita entrada di personanan cu cualificacion halto for di Hulanda cu lo stroba nombracion di personanan local. Corda bon, e regla aki a wordo diseña door di mandatarionan hulandes di e tempo ey, pero recientemente ‘Hoge Raad’ na Hulanda tambe a señala cu LTU no ta discriminatorio (Matos-arrest november 2000) pa e Hulandes Europeo.
Den pasado a reglamenta entrada di e Hulandes Europeo cu kier a bin yuda desaroya nos isla, manera religiosonan, maestronan, huristanan, mediconan, y tambe empleadonan publico. Mayoria di nan sinembargo a bolbe nan pais natal, pero e ultimo decadanan nos por a ripara un cambio den interes cerca e Hulandesnan Europeo pa bin establece nan mes riba un di nos islanan. Nos islanan a bira mas ‘in’ cerca e Hulandesnan Europeo, y sigur desde cu e islanan BES a cay directamente bou di custodia di Hulanda na 10-10-10.
Obviamente nan ta mas cu bonbini riba nos isla, pero kiko e consecuencia di esaki lo por tin pa e cuponan di trabou, y principalmente pa nos propio yiu di tera cu ta anhela pa eherce funcionnan ehecutivo riba un nivel halto?
Aruba tin mas di 60 aña ta mandando su yiunan di tera bay den exterior pa sigui estudionan avansa riba tur tereno. Ta mas cu claro cu no ta tur hende cu regresa, lo por spera di haña e trabou cu nan a studia p’e, principalmente pasobra nan no a haña e oportunidad pa extende nan experiencia di trabou trahando na e pais (sea Hulanda of Merca) unda nan a termina nan estudio. E limitacion aki ta haci cu nan ta wordo nenga cierto trabou a base di falta di experiencia, y consecuentemente mester wak cu e funcion ta cay den man di personanan for di exterior cu si ta cumpli cu tur rekisito.
E tendencia aki nos por a ripara na Aruba, na unda a nombra un director hulandes na un compania di telecomunicacion, parke Arikok y un persona procedente di Merca na nos airport. Pero no ban lubida tambe nombracion di (general) managernan den nos hotelnan y sigur no ban lubida e ‘dealnan’ cu e gobierno aki a bin ta firma cu companianan hulandes den e tan famoso hub entre Europa (bisa Hulanda) y Latino-America y Caribe. Den casi tur ocasion nos a bin ta ripara cu e dealnan aki ta parce di lo ta mas bentahoso pa e companiannan cu a bin establece nan mes aki, manera Arbo Unie, Pfixx, AFAS, ISKES, Philips y tambe un compania di Canada pa LED light.
Si nos no watch out, anto nos lo termina mescos cu loke lamentablemente ta tumando lugar na nos hermana isla Boneiro, na unda e Boneriano legitimo a cuminsa sintie un extranhero riba su propio isla, y na unda e gobierno hulandes parce di ya ta considera e Boneriano un ‘derderangsburger’ riba su propio isla.

Mi kier alerta gobierno y principalmente esnan responsabel pa ehecucion di e leynan vigente (LTU), pa no permiti cu nos yiunan di tera wordo exclui for di funcionnan halto den nos sociedad, ni tampoco mag di wordo permiti pa nos propio companianan chikito local wordo exclui for di proyectonan riba nos isla, cu por ser wordo ehecuta door di companianan di localnan y tambe por cumpli cu e contracto, por ehempel e contracto pa entrega LED-lights y e contractnan pa instalacion di e panelnan solar, cu tin suficiente experticio entre nos propio yiunan di tera.

Den nomber di Union Patriotico Progresista – U.P.P.
Candelario – Booshi – Wever
Brazil, november 2, 2014

Expresionnan haci den e articulo aki no necesariamente ta refleha opinion di ArenaPoliti.co