{idkey=2857b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1437-minister-oduber-insel-air-aruba-un-partner-valioso-pa-nos-industria-turistico%3FItemid%3D101][title=Minister+Oduber%3A+Insel+Air+Aruba+un+partner+valioso+pa+nos+industria+turistico][desc=Diaranzon+mainta+Insel+Air+Aruba+a+haci+inauguracion+di+su+di+13+ruta.+Ta+trata+aki+di+e+ruta+pa+Santo+Domingo.+Minister+Otmar+Oduber+cu+tin+un+relasion+estrecho+cu+Insell+Air+tabata+presente+y+a+hiba+palabra+na+e+acto+oficial.+%E2%80%9CE+ta+un+plan+di+casi+4+a%C3%B1a%2C+unda+awe+ta+asina+leu+cu+Insel+Air+Arubatin+un+flota+di+7+avion+unda+cu+pa+otro+a%C3%B1a+lo+extende+cu+10%2C+y+tin+mas+cu+150+empleado.+Un+empresa+stabil+cu+a+conoce+crecemento+rapido+den+e+ultimo+lunanan.+Awe+nos+ta+yama+pabien+na+Insel+Air+Arub]}
Diaranzon mainta Insel Air Aruba a haci inauguracion di su di 13 ruta. Ta trata aki di e ruta pa Santo Domingo. Minister Otmar Oduber cu tin un relasion estrecho cu Insell Air tabata presente y a hiba palabra na e acto oficial.

“E ta un plan di casi 4 aña, unda awe ta asina leu cu Insel Air Arubatin un flota di 7 avion unda cu pa otro aña lo extende cu 10, y tin mas cu 150 empleado. Un empresa stabil cu a conoce crecemento rapido den e ultimo lunanan. Awe nos ta yama pabien na Insel Air Aruba cu nan buelo inaugural pa Santo Domingo cu porcierto ta completamente yen.” e mandatario ta comenta.

Sr. Oduber ta reitera cu ta trata aki di un proceso unda hunto cu e partnernan manera ta Aeropuerto di Aruba, oficina di turismo di Aruba, Ministerio y tur e partnernan cu ta sostene un di e aerolinia cu ta di Aruba, un aerolinia cu nos por concidera nacional, cu ta habri un otro mercado awe.

Minister Oduber ta bisa:“E ta un mometo special paso e ta parti di un plan integral cu na momento cu Gabinete Mike Eman a sinta, nos a sinta cu Sr. Hackman na Hulanda y despues di biaha a yama tur partido entre otro Insel Air Aruba, Aruba Airlines cu tabata prepara pa lanta e tempo ey, y Tiarra. Nos a bisa cu como Gobierno nos lo duna e sosten te caminda cu nos por pa segura cu Aruba no ta bira solamente un hup, pero e ta bira tambe e centro di distribucion den e trafico aereo den Caribe, Centro America, Latino America y Estados Unidos.”

E mandatario ta sigui bisando cu poco poco ta logrando esaki unda Insel Air Aruba ta contribui, ta sigui contribui pasobra rutanan no ta caba aki. “Ya caba tin peticion pa mas ruta. Siman pasa a inaugura Puerto Rico prome cu esey Medallin y Miami, mas e otro rutanan cu ya caba nan ta encaminando. Esaki ta un muestra palpabel di e confiansa cu tin den e industria turistico, e ta un confiansa den transporte aereo.” Minister ta bisa.

E ta mustra tambe e compromiso cu partnernan manera Aeropuerto di Aruba. Un aeropuerto cu a wordo renoba pa por maneha 3 miyon usuario y awor ta atende cu 3.5 miyon caba y cu tin intencionan serio pa sigui acomoda e expansion manera Insel Air Aruba ta haci na e momentonan aki.

E ta finalisa bisando “Pabien Insel Air Aruba, esaki ta un muestra cu boso ta un partner valioso pa e industria di turismo pa nos isla.”

Expresionnan haci den e articulo aki no necesariamente ta refleha opinion di ArenaPoliti.co