{idkey=7635b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1562-francis-jacobs-di-mep-pueblo-di-aruba-abo-por-ta-decepciona-y-rabia-cu-gobierno-pero-hamas-tira-e-lucha-un-banda%3FItemid%3D101][title=Francis+Jacobs+di+MEP%3A+Pueblo+di+Aruba%2C+abo+por+ta+decepciona+y+rabia+cu+Gobierno%2C+pero+hamas+tira+e+lucha+un+banda][desc=+Canando+den+bario+y+combersando+cu+hopi+persona+den+comunidad+por+sinti+e+disgusto+cu+ta+reina+den+pueblo%2C+e+rabia+y+mas+ainda+e+dolor+di+tur+e+medidanan+cu+e+Gobierno+di+AVP+a+pone+riba+lomba+di+nos+comunidad+djis+pa+complace+nan+propio+deseo+y+deseonan+di+nan+hendenan%2C+sin+pone+interes+di+nos+pueblo+como+prioridad.+E+situacion+aki+tin+hopi+hende+hopi+disgusta+y+nan+ta+sinti+nan+manera+e+dicho+ta+bisa+%E2%80%9Centre+la+espada+y+la+pared%E2%80%9D.+Y+mas+ainda+e+disgusto+y+e+rabia+cu+pueblo+tin+ta+cu+Parlam]}
Canando den bario y combersando cu hopi persona den comunidad por sinti e disgusto cu ta reina den pueblo, e rabia y mas ainda e dolor di tur e medidanan cu e Gobierno di AVP a pone riba lomba di nos comunidad djis pa complace nan propio deseo y deseonan di nan hendenan, sin pone interes di nos pueblo como prioridad. E situacion aki tin hopi hende hopi disgusta y nan ta sinti nan manera e dicho ta bisa “entre la espada y la pared”. Y mas ainda e disgusto y e rabia cu pueblo tin ta cu Parlamento no por pone un paro riba tur derochamento di placa pasobra e Gobierno - enbes di wordo cuestiona di nan mal maneho – ta sigui goza di e sosten di nan 12 parlamentarionan cu e unico cos cu nan sa ta di grita “VOOR”.

Un pueblo den dolor
Esaki tin e pueblo tur fada y riba dje hopi ta esnan cu a cay den e manipulacion y mentiranan di AVP durante e eleccion di 2009. Mentiranan manera cu lo elimina BBO y cu a sigui despues durante e eleccion di 2013 cu “Ainda Falta” y awe hopi ta sinti nan hopi arepenti di esaki y ta expresa nan disgusto y cu nan no por mas y ta dispuesto pa tira e  lucha un banda mirando tur e medidanan cu practicamente nan no por mantene nan cabes mas riba awa. Pensionadonan no sa mas con cremencha pa sobrevivi, placa no ta yega mas pa paga nan obligacionnan di tur luna y pa por tin un tiki cuminda den nan boca tur dia. Mayornan ta preocupa, pasobra nan no sa mas con pa haci pa cria nan yiunan y peor awor cu school ta bay habri no tin ni placa pa cumpra uniform, carson of saya, tas y ni materialnan pa school mucho menos pa cria nan criaturanan pa nan por cuminsa school bon comi. Tur e situacionnan aki ta duro, hopi duro y ta haci hopi dolor, nan tin nos pueblo ta sangra y sclama cu ya nan no tin forsa mas y ta sinti cu nan Aruba a bay perdi. Tur e situacion aki ta e plan cu semper AVP tabata tin den su campaña y maneho, di tin un Aruba cu solamente un grupito di hendenan rico y e resto di e pueblo lo ta hendenan pober p’asina nan por keda cu e poder y por sigui biba na grandi cu placa di pueblo.

Salba e futuro di nos pais
Sinembargo nos no por acepta esaki. Aruba ta di nos, esta di e homber y muhernan balente cu a sa di lucha pa nos pueblo. Awor no ta e momento di doblega, awor no ta importa color politico, rasa ni religion. Awor e pueblo mester ta mas uni cu nunca y para mas firme pa e lucha cu nos grandinan a hiba pa nos libertad. Awor mas cu nunca nos yiu y yiu di nos yiunan mester di nos pa salba nan futuro. No doblega y lanta para, tene fe den nos Señor cu lo guia nos y cu e momento ta cerca, pasobra,“SOLO EL PUEBLO SALVA AL PUEBLO”. Muy pronto e momento lo yega cu tur gremio lo dicidi hunto cu e pueblo aki, cu TA BASTA, ya cu e situacion aki no por sigui mas. Mi ta spera cu e gremionan lo pone man na nan curason y tuma e decision pa sali na vanguardia di nos pueblo, pasobra nos pueblo ta cla y nos no ta bay acepta e situacion aki mas. Pueblo di Aruba, abo por ta decepciona y rabia cu e Gobierno aki, pero hamas tira e lucha un banda. Solo el Pueblo salva al Pueblo!

Expresionnan haci den e articulo aki no necesariamente ta refleha opinion di ArenaPoliti.co