{idkey=1482b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1654-parlamentario-mr-xiomara-maduro-minister-eman-a-logra-haci-di-nos-pueblo-cuidadano-di-segunda-clase%3FItemid%3D101][title=Parlamentario+mr.+Xiomara+Maduro%3A+Minister+Eman+a+logra+haci+di+nos+Pueblo+cuidadano+di+segunda+clase][desc=Pa+hopi+decada+nos+Pais+a+hiba+un+lucha+pa+autonomia%2C+e+derecho+pa+nos+mes+dicidi+nos+destino.+Pero+cu+e+ley+di+supervicion+financiero+di+CFT%2C+nos+Pais+a+bay+bek+decadas+atras.+Awor+ta+otro+lo+bolbe+dicidi+pa+nos.+Desde+awor+ya+nos+no+tin+e+autonomia+mas+pa+dicidi+con+nos+ta+gasta+nos+propio+florin.+E+palabra+final+awor+ta+bek+den+man+di+Hulanda+via+e+supervicion+financiero+di+CFT.+Cu+e+supervicion+aki+Minister+Eman+a+logra+di+haci+di+nos+Pueblo+cuidadano+di+segunda+clase%2C+cu+nan+bienestar+ta+wo]}
Pa hopi decada nos Pais a hiba un lucha pa autonomia, e derecho pa nos mes dicidi nos destino. Pero cu e ley di supervicion financiero di CFT, nos Pais a bay bek decadas atras. Awor ta otro lo bolbe dicidi pa nos. Desde awor ya nos no tin e autonomia mas pa dicidi con nos ta gasta nos propio florin. E palabra final awor ta bek den man di Hulanda via e supervicion financiero di CFT. Cu e supervicion aki Minister Eman a logra di haci di nos Pueblo cuidadano di segunda clase, cu nan bienestar ta wordo laga na merced di otro pa dicidi riba dje.

For di 2010 ta entregando
Ya for di 2010 Minister Eman a bin ta prepara y ehecuta e entrega di autonomia di nos Pais. No ta pornada cu na 2010 Minister Eman a firma e Protocol di Cooperacion cu e Minister Donner di Hulanda. Eyden a pone e fundeshi pa e entrega. Na ocacion di 10-10-10 tambe Minister Eman a mustra su cara di entreguista na momento cu ela bay di acuerdo pa Hulanda cambia articulo 27 di nos Statuut entregando derecho na Hulanda pa nan traha leynan pa Aruba. Despues a sigi e Protocol di Diahuebs Santo den cual Minister Eman a firma pa e supervicion financiero di CFT pa nos Pais. Pero como cu tabata den vispera di eleccion 2013, Minister Eman no tabata tin curashi pa bisa esaki. Enves di ta sincero cu Pueblo, a bende e Protocol aki como un gran logro pa haya fianza na interes reduci di Hulanda pa asina por baha e Megadebe. Pero Gabinete Eman no por a saca su som cu e prespuesto di nos Pais y Hulanda a pone precion pa Minister Eman cumpli cu su entrega di autonomia. No ta pornada a bin e carta di ‘geen bezwaar’ di Minister Yrausquin sigi pa e KB, e welga di hamber falso, e tantisimo rapport di CFT y e Protocol di 2 di mei 2015. Minister Eman a priminti e entrega di autonomia y e mester a cumpli cu Hulanda.

Cuidadano di segunda clase
E ley di supervicion financiero di CFT a pone cu no ta e representantenan di nos Pais sino esnan di Hulanda lo tin e ultimo palabra riba nos cartera. Den e situacion aki nos no por spera cu e bienestar di nos Pais lo ta na promer lugar ora mester tuma decicion. Pasobra si tabata asina for di hopi tempo caba Hulanda mester a kita e pen for di Minister Eman pa e stop di hinca e Pais aki den mas debe y pa e stop di gasta placa den proyecto descabeya. Paso asina mes cu di 2014 caba nos Pais tabata bou curatela, asina mes e Gobierno aki a haci un free for all cu fondo publico sin cu Hulanda a pare. Awor e consecuencia no ta pa Minister Eman, despues di tur e disaster cu ela haci, toch ela keda sinta dushi riba su stul y hasta ta haya snoepreisje pa representa Reino na Naciones Unidas. E castigo ta pa Pueblo, kende cu lo wordo suta y castiga cu medida pa por drecha e desaster di Gabinete Eman y riba dje sin cu nan tin algo di bisa via nan representante di Pueblo. Di e manera aki Minister Eman a logra haci di nos Pueblo cuidadanonan di segunda clase laga na merced di otro pa dicidi riba nan bienestar.

30 augustus 2015

Expresionnan haci den e articulo aki no necesariamente ta refleha opinion di ArenaPoliti.co