{idkey=2161b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1660-minister-bermudez-caft-ta-un-ley-di-caracter-instrumental-y-no-un-ley-di-maneho%3FItemid%3D101][title=Minister+Bermudez%3A+CAFT+ta+un+ley+di+caracter+instrumental+y+no+un+ley+di+maneho][desc=ORANJESTAD+-+Cu+e+aprobacion+di+e+ley+di+CAFT+den+Parlamento+siman+pasa+a%26amp%3Bnbsp%3Bsurgi+un+ola+di+comentario+y+di+diferente+tipo+di+interpretacion+pa+cu+e+ley+aki%2C+cu+na+mes+momento+a+crea+mas%26amp%3Bnbsp%3Bconfusion+den+nos+comunidad.Consecuentemente+Minister+di+Finanzas%2C+Angel+Bermudez+ta%26amp%3Bnbsp%3Bhaci%26amp%3Bnbsp%3Benfasis+y+clarifica+cu+e+ley+di+CAFT+ta+un+ley+instrumental+y+no+un+ley+di+maneho%2C+pues+e+no+ta+contene+ningun%26amp%3Bnbsp%3Btipo+di+%E2%80%98medida%E2%80%99+ni%26amp%3Bnbsp%3Btampoco+ta+trata+of+toca+aspectonan+manera+%E2%80%98indexering%E2%80%99+]}
ORANJESTAD - Cu e aprobacion di e ley di CAFT den Parlamento siman pasa a surgi un ola di comentario y di diferente tipo di interpretacion pa cu e ley aki, cu na mes momento a crea mas confusion den nos comunidad.

Consecuentemente Minister di Finanzas, Angel Bermudez ta haci enfasis y clarifica cu e ley di CAFT ta un ley instrumental y no un ley di maneho, pues e no ta contene ningun tipo di ‘medida’ ni tampoco ta trata of toca aspectonan manera ‘indexering’ of ‘vakantie uitkering’ den e contenido di e ley.

Segun splicacion di e mandatario e ley aki di CAFT ta basicamente un refuerso di e ley di contabilidad di aña 1989 cu su sancionnan adicional. Minister Bermudez ta sigui splica cu e ley aki ta contene hopi formalidad y ta aporta un disciplina pa entrega tur tipo di informacion necesario pa facilita e trabou di Parlamento.

“Articulo 1 di e ley ta defini cu unicamente e Minister di Finanzas ta suheto y alabes responsabel pa cu e ley aki di CAFT y ta exigi na e Minister concerni pa entrega informenan regular, reportahenan periodico y cuentanan anual por ehempel cu ta trece cun’e hopi mas transparencia den ehecucion di e presupuesto" asina Minister Bermudez a sigura.

E mandatario a indica cu awendia institutonan di supervision no ta un fenomeno desconoci rond mundo, pues mas pais a incorpora esaki den nan maneho di finanzas publico. “Den tur e diferente posicionnan cu mi a eherce den mi carera profesional semper mi a traha bou un tipo di supervision, pues esaki no ta nada straño”, Minister a bisa.

Ademas Minister Bermudez a clarifica cu e debenan cu Pais Aruba tin acumula desde aña 1986 a hiba nos unda cu nos ta awo, “E falta di responsabilidad y cumplimento pa cu impuestonan, pago di prestamonan di estudio y e suma grandi cu Gobierno a duna na subsidio durante añanan largo sin cu a wordo duna cuenta, ta haci cu e necesidad pa nos incorpora un instituto di supervision actualmente ta mas grandi cu nunca”.

Structuralmente e cuentanan anual a demostra cu Gobiernonan no a keda den e cuadro di nan presupuesto manera aproba y cu e deficitnan aki mester a wordo kubri cu fianzanan, cu awe tambe ta forma nos debe nacional.

E mandatario di Finanzas, ta confirma cu en berdad e ley di CAFT ta temporal, pues lo keda na vigor te ora Aruba su presupuesto no tin deficit mas. Asina cu Aruba su presupuesto ta uno balansa e colegio CAFT lo wordo reemplasa cu un ‘Fiscal Council’, pues e ley ta temporal pero e supervision mester ta permanente.

Finalmente e Minister Bermudez ta lamenta cu e debate durante e tratamento di e ley den Parlamento casi no tabatin contenido, pero mas bien un avalancha di emocion, insulto y difamacion, ademas cu na cierto momento e tabata sinti’e mas bien den un gayero cu den e instituto mas prestigioso di nos democracia, cual ta nos Parlamento.

Expresionnan haci den e articulo aki no necesariamente ta refleha opinion di ArenaPoliti.co