{idkey=3383b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1668-gabinete-me-ii-representantenan-di-atia-a-reuni-cu-presidente-di-parlamento-y-prome-minister-di-aruba%3FItemid%3D101][title=Gabinete+ME+II%3A+Representantenan+di+ATIA+a+reuni+cu+Presidente+di+Parlamento+y+Prome+Minister+di+Aruba][desc=+ORANJESTAD+%E2%80%93+Representantenan+di+Aruba+Trade+%26amp%3Bamp%3B+Industry+Association+%28ATIA%29+tabata+na+Parlamento+di+Aruba+dialuna+atardi+pa+un+reunion+cu+Presidente+di+Parlamento%2C+Sra.+Marisol+Lopez-Tromp+y+Prome+Minister+Mike+Eman.+Na+salida+for+di+e+reunion%2C+presidente+di+ATIA%2C+Michel+Henriquez%2C+a+splica+cu+e+reunion+tabata+tin+como+meta+pa+nan+haya+informacion+tocante+di+e+ley+di+CAft.+E+presidente+di+e+asociacion+cu+ta+promove+y+defende+interesnan+di+industria+y+comercio+na+Aruba%2C+a+bisa+cu+nan+a+disc]}
ORANJESTAD – Representantenan di Aruba Trade & Industry Association (ATIA) tabata na Parlamento di Aruba dialuna atardi pa un reunion cu Presidente di Parlamento, Sra. Marisol Lopez-Tromp y Prome Minister Mike Eman. Na salida for di e reunion, presidente di ATIA, Michel Henriquez, a splica cu e reunion tabata tin como meta pa nan haya informacion tocante di e ley di CAft. E presidente di e asociacion cu ta promove y defende interesnan di industria y comercio na Aruba, a bisa cu nan a discuti tambe e acontecimentonan durante y despues di e reunion den Parlamento diahuebs ultimo.

E presidente di ATIA a mustra riba e hecho cu aunke e no por duna un declaracion tocante con nan ta mira e ley di CAft, e ta spera si, “awor cu e ta aproba, ta sigui cu ne y, cu manera Prome Minister a bisa, ora cu yega na loke e ley ta acorda pa e presupuesto di Aruba, e ley no t’ey mas, nos por bin na Aruba cu nos mesun begrotingskamer. Y e ora tur cos ta bek den cas di Aruba y nos mes por handle nos finansas completamente asina tambe.”

Un otro preocupacion cu ATIA tin ta cu durante añanan, tur gobierno, a laga gastonan crece. “Nos ta spera cu algo asina cu bo por tin un balanced budget, unda cu den pasado nos a papia riba dje, den Dialogo Social y cu e biaha aki si e wordo manteni y nos por yega na un balanced budget mas lihe cu ta posibel, unda cu tanto e entradanan por wordo garantisa, pero e gastonan tambe por wordo reduci of mengua of teni bou control. Mi ta kere cu e ta e parti mas importante.”

Na final di su entrevista, Sr. Henriquez a bisa cu a sigui e desaroyonan violento rond di e topico aki y aunke cu e ta kere cu “tur hende tin un derecho pa manifesta, tur hende tin e derecho democratico pa haci esey, di otro banda, mi no ta kere cu nos tin e derecho pa destrui propiedad publico of priva tampoco. Mi ta kere cu si bo kier haci’e, manifesta, tene decente, tene trankilo y no tin ningun motibo pa den un rato di ora asina aki daña imagen di pais cu e acontecimentonan cu a pasa e dia anochi.”

Cu daño na imagen di Aruba, Sr. Henriquez a referi na un preocupacion cu nan a haya di un hotel na Aruba na unda representantenan di un grupo grandi cu kier haci un convencion na Aruba a presencia e disturbionan diahuebs ultimo. “E Hotel mester a haci hopi ‘damage control’ riba esey pa mantene nan. Paso corda bon, por ta na Aruba e cos aki ta pasa cada un aña, pero cu e ‘social media’ di awendia, sensacionalismo cu tin rond di dje, algo asina por a daña imagen di Aruba masha lihe mes.”

“Aruba ta conoci pa ta un luga sigur, cu tur hende por cana rond, no tin problema, no tin disturbio. Pero si nan bay wak cu Aruba ta mescos cu ta pasa na paisnan grandi cu tin kimamento y destruccion, esey por daña un imagen di un pais hopi lihe,” Sr. Henriquez a enfatisa.

“Turista cu ta debati entre bin Aruba, Cancun of Cuba, si e wak esakinan, e ‘challenge’ ta basta grandi pa bin Aruba. Dus nos mester ta hopi cauteloso ora nos haci nos cosnan pa nos no bay expresa nos desatisfaccion cu algo, daña full un imagen di un pais. Mi ta kere cu eynan, berdad bo tin bo derecho, nos ta respeta esey, bo no ta di acuerdo cu decision di gobierno of parlamento, pero ora bo haci’e, haci’e di tal manera cu no ta bay haci daño na full e poblacion di Aruba.”

Expresionnan haci den e articulo aki no necesariamente ta refleha opinion di ArenaPoliti.co