{idkey=1591b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1711-paolo-petrocchi-ora-pastornan-lanta-testimonio-falso%3FItemid%3D101][title=Paolo+Petrocchi%3A+Ora+pastornan+lanta+testimonio+falso][desc=Recientemente+mi+a+tuma+nota+di+un+articulo+cu+a+wordo+publica+den+diferente+medio+di+prensa+bao+e+titulo+%E2%80%9COra+Mayoria+bira+Minoria%E2%80%9D+cu+ta+argumenta+contra+matrimonio+homosexual+y+scirbi+door+di+Pastornan+di+Iglesianan+Cristian+di+Aruba+%28PICA%29.+Na+promer+lugar+mi+kier+a+tuma+e+oportunidad+aki+pa+bisa+un+danki+na+iglesia+catholico+di+Aruba+pa+scirbi+e+articulo+aki.+No+solamente+e+ta+un+topico+social+cu+nos+tin+cu+discuti+na+un+manera+saludabel%2C+pero+e+ta+un+topico+cu+significancia+legal+imens]}Recientemente mi a tuma nota di un articulo cu a wordo publica den diferente medio di prensa bao e titulo “Ora Mayoria bira Minoria” cu ta argumenta contra matrimonio homosexual y scirbi door di Pastornan di Iglesianan Cristian di Aruba (PICA). Na promer lugar mi kier a tuma e oportunidad aki pa bisa un danki na iglesia catholico di Aruba pa scirbi e articulo aki. No solamente e ta un topico social cu nos tin cu discuti na un manera saludabel, pero e ta un topico cu significancia legal imenso, specialmente pa parehanan cu, den bista di ley, ta wordo mira como cuidadanonan di segunda clase. Mi ta haya cu un parti importante di cada debate, ta pa loke cu wordo treci dilanti como hecho (feiten), realmente mester ta hechonan cu tin apoyo di materialnan primario y secundario. E conclusion cu mi por a tuma di e articulo aki, ta cu no solamente ta cambia hechonan na fabor di e argumentacion, pero ta trece diferente argumentonan den e debate cu simplemente ta di un caracter exclusivo.

Como introduccion di e articulo, a wordo cita e caso di Corte Supremo na Merca unda cu e hueznan a vota 5-4 na fabor di matrimonio homosexual. E articulo mes a subraya e idea cu gobierno di Aruba, incluyendo nos Parlamento, mester vota contra matrimonio homosexual, paso un mayoria na Aruba no ta na fabor di matrimonionan di mesun sexo. En general, mi lo ta di acuerdo cu e punto di bista cu un gobierno y Parlamento mester por representa e hendenan cu nan ta goberna, pero esaki no kiermeen cu mayoria semper ta correcto. Ya cu PICA a huza e caso di Merca, mi kier a mustra con na aña 1954 e Corte Supremo di Merca tambe e declara, den e caso Brown v. Board of Education, cu segregacion ta un ideologia social cu no ta pertenece den un mundo unda cu cada un di nos tin e derecho di wordo trata igual, ni si un mayoria den e sur di Merca tabata apoya segregacion.

PICA a bay asina leu cu nan a fabrica hechonan pa purba na sostene nan punto di bista door di scirbi cu “5 di e 9 huesnan di Corte Supremo a legalisa deseo di un minoria di pueblo Mericano.” Esaki absolutamente no ta cuadra cu berdad. PewResearchCenter1 ta mustra cu na 2015, 55% di Mericanonan ta na fabor di matrimonio homosexual. Gallup Poll2 a mustra cu na mei 2015 60% di Mericanonan tabata di e mesun opinion. Mi no ta un experto den bijbel, pero mi ta casi sigur cu un di e diez mandamentonan ta cu bo no mag di lanta falso testimonio. Mi ta un tiki desapunta pa mira cu e organo na Aruba cu mester tey pa proteha e idealnan biblico ta e mesun organo cu ta viola e leynan aki.

Ban papia di inmoralidad; aparentemente PICA ta establece un coneccion entre homosexualidad y inmoralidad. Mi pregunta ta, con amor entre dos adulto por ta inmoral? E argumento cu ta wordo huza ta wordo basa riba, por ehempel, Levitiko 18:22 cu ta bisa cu “homber no drumi cu homber manera ta drumi cu muher; ta un abominashon.” Mi ta accepta cu esaki ta un ley den bijbel. Pero si mi sigui lesa Levitiko 11:10, e ta bisa “Ma tur loke tin den laman y den riu cu no tin ni hala ni skama entre tur loke ta move den awa y entre tur bestia bibo cu tin den awa, eseynan ta cosnan abominabel pa boso.” Esaki kiermeen cu comemento di lobster, cangreu, y cocolishi TAMBE ta actonan abominabel. E pregunta pa PICA ta bira e ora, pakico mester ta asina inconsistente den implementacion di e leynan cu boso kier aplica pa pueblo di Aruba? Acaso nos como cuidadanonan por escohe cua parti di nos leynan nos por sigui y cua nos por benta un banda?

Cu personanan di mesun sexo no a forma parti di e institucion di matrimonio antes, no kiermeen cu nan no mester tuma parti di dje awor tampoco. E ideologia di matrimonio ta uno cu constantemente a cambia; nos a adapt’e pa kita aspectonan descriminatorio di dje. Un di e hueznan den e caso di e Corte Supremo na Merca, Ruth Bader Ginsburg, a argumenta cu parehanan homosexual no lo a opta pa drenta enlace matrimonial si e institucion tabata e mesun cos cu e tabata antes, “esta un relacion di un dominante y subordinario.”3 Esaki ta paso e institucion di matrimonio tabata basa su mes cu e ser femenino tabata propediad di e ser masculino. Den nos tempo moderno esaki no ta caso mas. Matrimonio ta basa mas riba igualdad, y ta e igualdad den bista di ley di un pais ta lo cual parehanan homosexual ta busca.

Den e articulo di PICA, e sigiente a wordo trec’i dilant: “Solamente Cristo por y ta pordona pica (Efesionan 1:7).” Mi pregunta ta, kico ta para di esnan cu no ta comparti e religion Cristian? Nos ta biba na Aruba. Nos bandera tin un strea riba dje cu ta simbolisa e cuatro direccionnan di cua paisnan nos hendenan ta origina, cada un cu nan mesun religion. Nos ta un pais multicultural. Nos ta un pais cu a acepta hende di tur rasa, color, y religion pa mustra cu nos no ta “La Isla Inútil.” Y awe PICA kier trece descordia den nos comunidad pa exclui un parti di nos rubianonan cu tambe ta paga belasting, cu tambe ta aporta na AZV y pension, y cu tambe ta traha pa hiba nos isla dilanti den temponan dificil. Hendenan homosexual no ta pidi pa wordo mira igual pa iglesia cristian na Aruba. Homosexualnan ta pidi pa wordo mira como igual den bista di leynan constitucional di Aruba. Y aki ta unda nos Parlamento mester interveni y proteha e derechonan di un minoria pa scapa abuso di un mayoria.

E ta di lamenta cu religion y bijbel ta wordo huza, no pa uni pero pa trece desunion den nos comunidad. Nos mester siña acepta cu condicionnan social y humano ta cambia. Nos a siña cu no paso bijbel ta hustifica esclabitut, nos tin cu acepta e condicion social eynan tambe den siglo 21. Kico ta e principio fundamental di e Testament Nobo? E ta uno di amor universal y amor pa bo prohimo. Si nos bira obsesiona cu un definicion en particular den forma di sexualidad, nos lo perde e centralidad di loke e evangelio personal, e evangelio spiritual y e evangelio social kier siña nos.



¹http://www.pewforum.org/2015/07/29/graphics-slideshow-changing-attitudes-on-gay-marriage/

²http://www.gallup.com/poll/117328/marriage.aspx

³http://thinkprogress.org/justice/2015/04/29/3652468/justice-ginsburg-eviscerates-case-marriage-equality-just-five-sentences/

Expresionnan haci den e articulo aki no necesariamente ta refleha opinion di ArenaPoliti.co