{idkey=3948b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1796-mep-financial-transaction-tax-y-abb-lo-mata-nos-economia-y-haci-nos-bida-mas-caro-y-imposibel%3FItemid%3D101][title=MEP%3A+Financial+Transaction+Tax+y+ABB+lo+mata+nos+economia+y+haci+nos+bida+mas+caro+y+imposibel][desc=Medidanan+cruel+di+Gabinete+Eman+ta+na+caminda%21%26amp%3Bnbsp%3BHamas+den+historia+di+nos+pais+un+gobierno+a+yega+di+tuma+asina+tanto+medida+manera+Gabinete+Eman.+Den+6+a%C3%B1a+ya+nan+tin+mas+cu+2+biyon+florin+tuma+na+medida%21+Nan+no+a+caba+di+drenta+gobierno+na+final+di+2009+cu+ya+nan+a+aumenta+room+tax+cu+58%25+y+cobra+tambe+riba+cambernan+di+time+sharing+y+condominio.+A+aumenta+prijs+di+bebida%2C+cigaria+y+ciga+cu+a+bira+inpagabel+debi+na+aumento+drastico+di+accijnzen+y+invoerrechten.+Plus+a+aumenta+drasticamen]}
Medidanan cruel di Gabinete Eman ta na caminda! 

Hamas den historia di nos pais un gobierno a yega di tuma asina tanto medida manera Gabinete Eman. Den 6 aña ya nan tin mas cu 2 biyon florin tuma na medida! Nan no a caba di drenta gobierno na final di 2009 cu ya nan a aumenta room tax cu 58% y cobra tambe riba cambernan di time sharing y condominio. A aumenta prijs di bebida, cigaria y ciga cu a bira inpagabel debi na aumento drastico di accijnzen y invoerrechten. Plus a aumenta drasticamente service charge na Aeropuerto y ta bay cobra mas na e hafnan di Oranjestad y Barcadera. Cu esaki e producto turistico a bira hopi caro mes.

Medidanan cruel
Na e momento aki Aruba – debi na tur e aumentonan drastico di prijs - ta saca su mes for di e mercado y cu e competencia di Republica Dominicana y Cuba, ta un cuestion di muri sin cu bo sa. Gremionan ta den coma y AVP ta sigui suta pueblo tur dia cu medidanan cruel y ta sigui ranca placa bay. Si bo mira desde fin di 2009 pa awe, cuanto medida AVP a suta nos pueblo caba, unda a introduci un BBO di plus 2% bao di capa di BAZV, unda turistanan ta yama gobierno di Aruba pa ladron den dia cla, ya cu nan ta paga pa AZV y nan no ta sigura aki na Aruba. E ambtenaarnan so a contribui cu mas di 300 miyon florin na e fondo di APFA, unda nan tin cu paga mas prima, haya franchise, middelloonregeling y e contribucion di gobierno relaciona cu e Duurtetoeslag a baha di 36.1% te na 17.7% cu ta un reduccion di mas cu 50 miyon florin pa aña y ora no tin placa mas pa paga e Duurtetoeslag pa bo pensioen, e mayoria di sindicatonan a firma pa sigui baha esaki drasticamente for di bo pensioen. Como trahador bo ta paga loonbelasting, inkomstenbelasting, prima di AOV, AWW, AZV, 2% extra di BAZV, 27 florin pa recoge sushi, mas na grondbelasting, tarifa di awa, tarifa di coriente a subi cu 15%, gasolin etc.

Financial Transaction Tax
Despues cu bo a duna Gabinete Eman casi tur bo entrada na e medidanan cruel aki, awor nan kier sigui hinca man riba locual a resta y cu bo tin na banco, despues cu ya bo a contribui caba cu caha di gobierno, nan lo bay introduci un Financial Transaction Tax, esta cada vez cu bo swipe di bo mesun placa na banco, Mike Eman kier horta for di bo un parti di locual bo a resta, unda hopi caba ta den cora. Siguramente cu esaki no por! Tin pais cu a purba e crimen aki y banconan a cera y economia a kibra. Bo mester ta loco, iresponsabel y cu un mentalidad di burdugo, criminal y abusado pa bin cu e medida aki pa ranca 200 pa 300 miyon florin pa aña y riba placa cu ya bo a paga belasting riba dje.

Algemene Bestedingsbelasting (ABB)
Pero ya cu e medida aki no ta suficiente, e gobierno burdugo aki ta den tramite pa introduci un otro medida di impuesto na cuminsamento di otro aña, esta e Algemene Bestedingsbelasting (ABB) cu lo bay ta entre 8 pa 12%. Hecho ta cu henter comunidad lo bay sinti e efectonan negativo di e medida aki y siguramente costo di bida lo bay kibra tur record otro aña cu introduccion di e belasting nobo aki.
Hecho ta cu si durante campaña na 2013 Mike Eman tabata grita “Pueblo, wanta bo cartera, wanta bo cartera”, awor pueblo mes den carni propio lo bay sinti kico e grito di Mike Eman ta nifica pa nan cartera. Ta pesey e momento a yega pa nos uni awe pa para e abuso aki, pasobra mayan lo ta laat, pero hopi laat mes.

Expresionnan haci den e articulo aki no necesariamente ta refleha opinion di ArenaPoliti.co