{idkey=7608b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1810-mep-papiando-di-democracia-den-partido-politico-jeffrey-kelly-te-ainda-no-conoce-e-historia-real-di-e-dinastia-y-dictadura-den-su-partido-avp%3FItemid%3D101][title=MEP%3A+Papiando+di+democracia+den+partido+politico%2C+Jeffrey+Kelly+te+ainda+no+conoce+e+historia+real+di+e+dinastia+y+dictadura+den+su+partido+AVP][desc=Un+biaha+mas+a+keda+demostra+con+abusado+e+dirigentenan+di+partido+AVP+ta+y+con+nan+ta+uza+nan+politiconan+di+peso+pluma+pa+ataca+nos+di+MEP.+Den+e+caso+aki+e+parlamentario+cu+menos+di+100+voto%2C+esta+Jeffrey+Kelly+a+haya+ta+bon+di+ataca+MEP+treciendo+padilanti+cu+den+MEP+no+tin+democracia+pa+loke+ta+eleccion+di+lider+di+partido.+Sinembargo+Jeffrey+Kelly+no+conoce+e+statutonan+di+MEP%2C+pues+e+pober+no+sa+kico+ta+come+y+bebe+di+e+procedura+cu+a+ser+hiba+pa+yega+na+e+candidatura+di+sra.+Evelyn+Wever]}
Un biaha mas a keda demostra con abusado e dirigentenan di partido AVP ta y con nan ta uza nan politiconan di peso pluma pa ataca nos di MEP. Den e caso aki e parlamentario cu menos di 100 voto, esta Jeffrey Kelly a haya ta bon di ataca MEP treciendo padilanti cu den MEP no tin democracia pa loke ta eleccion di lider di partido. Sinembargo Jeffrey Kelly no conoce e statutonan di MEP, pues e pober no sa kico ta come y bebe di e procedura cu a ser hiba pa yega na e candidatura di sra. Evelyn Wever Croes pa ta lider di nos partido den e Congreso proximo. Pa cu esaki nos di MEP no tin ningun cuenta di duna na e paracaidista politico Jeffrey Kelly, ya cu escogencia di liderazgo di nos partido ta regarda exclusivamente nos Conseho di partido, Directiva di partido, Directivanan di distritictonan y finalmente nos Congreso di partido.

AVP: un partido di famia
Mescos cu ta e caso tempo cu Jeffrey Kelly a scoge pa drenta politica - basa riba e promesa di Mike Eman cu e sigur lo bira parlamentario si e subi riba lista di AVP - nos di MEP no tin nada di bisa den esey. Solamente cu si Jeffrey Kelly a perde tur principio, honor y dignidad y pa oportunismo politico y hambra pa puesto y poder a bay riba lista di AVP, esey ta su propio consenshi y escogencia. Sinembargo pa e biaha aki lo ta bon pa Jeffrey Kelly conoce con berdaderamente e eleccion di lider ta ser practica den su partido AVP. Jeffrey mester ta basta ignorante cu te ainda e no ta na altura cu AVP ta pertenece exclusivamente na famia Eman. Un partido cu a cuminsa cu como lider Henny Sr. (Apa) Eman, sigui pa su yiu Shon A Eman, djei pa e yiu di Shon A, esta Henny Eman y despeus pa e otro yiu Mike Eman. Siguramente e dinastia di e Emannan aki lo sigui despues di e epoca di Mike Eman cu un otro Eman, sea ta un otro ruman, un sobrino, un primo of cualkier otro Eman. No mester lubida cu te hasta den Corte na 1971 a ser bisa door di Sieg Eman – riba e pregunta di Huez Fränkel di con Betico Croes no por bira lider di AVP – cu Betico Croes no por bira lider, ya cu e no tin fam Eman. Pues, esaki ta e bunita democracia pa eleccion di lider cu Jeffrey Kelly ta papia di dje?

Eleccion pa lider di AVP
Siguramente den historia di AVP tabata tin tres persona mas di fam Croes (Guzman, Chibi y Tico) cu a yega di fungi y keinta e stoel di lider di AVP pa un periodo cortico, pero semper esaki tabata en espera pa un Eman tuma over e liderazgo di partido. Lo ta bon pa Jeffrey Kelly puntra Henny Eman con su persona a ser “eligi” como lider di AVP na 1976. E tempo ey Henny Eman a caba di yega for di Hulanda y durante un reunion di partijraad di AVP, el a drenta reunion, destitui e lider Chibi for di su posicion y dictatorialmente  a postula su mes como lider di AVP. Alavez den un forma denigrante el a yama Chibi pa un “zwakke schakel” y cu ta pesey e doñonan di partido no tabata kier Chibi mas como lider. Lo ta bon pa Jeffrey Kelly averigua pa su mes tambe di con AVP no conoce Congresonan di partido!

Eleccion pa lider di MEP
Contrario na e dictadura y dinastia di e famia Emannan, den MEP tur candidato tin e oportunidad – segun statutonan di partido - pa postula su mes como candidato pa lider di partido. Esey a ser vocifera tambe pa lider fundador Betico Croes cu a yega di bisa cu den MEP no necesariamente un di su yiunan mester bira lider di partido y cu tur candidato riba lista por bira lider di MEP. Ta den e espirito ey tambe sr. Nelson Oduber a bira lider di MEP na 1987 y cu durante su periodo como lider partido MEP a conoce varios candidato cu a yega di postula nan mes den eleccion pa lider di MEP, esta Rudy Croes, Ady Thijsen, Evelyn Wever-Croes y Carl Giel. Den un forma transparente tanto Nelson Oduber como Evelyn Wever Croes a ser eligi den pasado den Congreso como lider di MEP. Cu e forma democratico y ehemplar di eligi lider ta trece hopi envidia cerca e candidatonan di AVP, esey ta comprendibel, pero nan no por baha nan rabia y frustracion riba nos partido. Pa Jeffrey Kelly si ta sigur cu e nunca lo por yega di pensa mes di un dia bira lider di AVP, ya cu e no ta un Eman, e no ta di Playa y cu e pipita di votonan cu e tin e por keda fungi solamente pa un temporada cortico como pronkstuk riba lista di partido AVP.

Expresionnan haci den e articulo aki no necesariamente ta refleha opinion di ArenaPoliti.co