Diaranson Aruba a celebra dia internacional di turismo. PA e ocasion special aki a tuma luga un evento special dedica na e partnernan strategico di e industria importante aki.  Durante e celebracion den e ballroom di Marriott, Minister di Turismo, Transporte, Sector Primario y Cultura, Sr. Otmar Oduber, a hiba palabra.

E mandatario a inicia su discurso dunando un palabra di pabien na cada un persona cu ta forma parti di e pilar economico mas importante di nos isla, cual ta turismo. Sr. Oduber ta bisa "Mirando e rol importante cu turismo tin riba nos isla, cada un miembro di nos comunidad ta forma parti di e industria dinamico aki sea directamente of indirectamente. Na 2014, turismo internacional a alcansa e record di 1.133 biyon turista mientras cu Aruba a alcansa nos propio record di 1 miyon bishitante. Esaki tabata un esfuerso conhunto di cada un di e partnernan y nos comunidad en general. E ta posibel danki na boso dedicacion y trabou duro cu nos ta gosa di un turismo asina prospero y ta e hospitalidad y amabilidad ta locual ta haci nos bishitantenan sinti na cas riba nos One Happy Island."

Minister Oduber ta comparti cu pa Augustus 2015 e cifranan di stay-over a aumenta cu 14.8%. E Year to Date di e mercado Mericano tambe a aumenta cu 8.5% y e mercado Venezolano a aumenta cu 49.9%. E Minister di turismo a remarca cu mester reconoce cu e mercado Mericano, cual ta un di nos mercadonan principal, a conoce un aumento apesar di e situacion actual di nos pais bisiña cu sigur tin su impacto riba e cifra di YTD pa e luna di Augustus.

Pa locual ta trata turismo crucero nos a yega e cifranan di mas halto den historia cual ta 688.472 bishitante na aña 2013. Den 2014 nos a experencia un caida y nos ta spera cu pa 2015 nos cera cu un caida di 9%. Minister Oduber a sigui bisa: "Mientrastanto pa 2016 nos ta mira un aña prominente y pa prome biaha nos lo por kibra e record alcansando 700.000 turista di barco crucero, un aumento di 14.8% compara cu 2015. Ansiosamente nos den espera di esaki."

E strategia di Aruba a conoce un cambio den transcurso di e ultimo añanan manera nos tur sa, unda activamente ta enfocando riba e turista mas afluente. Cu esaki ta poniendo atencion specifico riba Aruba como producto cu esfuerso y inversionnan di ATA y TPEF. Actualmente tin un cantidad grandi di proyectonan infrastructural cu ta den proceso den cuadro di mehoracion di Producto Aruba y ofreciendo nos bishitantenan un miho calidad di experiencia completo.

Minister Oduber a termina bisando: "Mi ta sigur cu Aruba tin hopi di ofrece como un destinacion turistico y nos tin hopi oportunidad cu nos por explora ainda. Mi ta orguyoso di nos industria turistico y con leu nos a logra yega den e ultimo 6 decadanan. Mi ta agradecido di por tin e oportunidad como Minister di Turismo, di por forma parti di Aruba su trayecto como destinacion, producto turistico y como nos hogar. Danki na cada un di boso cu ta haci Aruba un experiencia inolvidabel pa tur cu ta bishita nos y un biaha mas pabien riba e dia tan special aki."