{idkey=1479b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1947-gerick-croes-mep-cambio-den-cobransa-di-motorrijtuigenbelasting-lo-ta-devastador-pa-pueblo%3FItemid%3D101][title=Gerick+Croes+%28MEP%29%3A+Cambio+den+cobransa+di+motorrijtuigenbelasting+lo+ta+devastador+pa+pueblo%21][desc=Siman+pasa+a+wordo+anuncia+cu+Gabinete+Eman+lo+bai+entrega+un+concepto+di+ley+consistiendo+di+un+cambio+cual+lo+bai+elimina+e+manera+con+motorrijtuigenbelasting+ta+wordo+cobra+actualmente.+E+cambio+ta+encera+cu%26amp%3Bnbsp%3Bna+2016+lo+bai+over+pa+cobra+motorrijtuigenbelasting+ora+di+cumpra+gasoline+of+diesel+enbes%26amp%3Bnbsp%3Bcu+bo+ta+paga+pabo+nummerplaat.+Nificando%26amp%3Bnbsp%3Bcu+e+lo+wordo+calcula+y+cobra+den+e%26amp%3Bnbsp%3Baccijns+di+gasolin+y+diesel.E+sistematica+aki+ta+mustra+un+biaha+mas+con+golos+y+determina+Gabinete]}
Siman pasa a wordo anuncia cu Gabinete Eman lo bai entrega un concepto di ley consistiendo di un cambio cual lo bai elimina e manera con motorrijtuigenbelasting ta wordo cobra actualmente. E cambio ta encera cu na 2016 lo bai over pa cobra motorrijtuigenbelasting ora di cumpra gasoline of diesel enbes cu bo ta paga pabo nummerplaat. Nificando cu e lo wordo calcula y cobra den e accijns di gasolin y diesel.

E sistematica aki ta mustra un biaha mas con golos y determina Gabinete Eman ta pa sigui chica delaster un cent for di pueblo y no ta importe con. Ironico ta e hecho cu e mandatario tin durf di bisa cu e cambio aki lo ta budget neutral esta cu lo no bai paga mas di loke ta pagando. Dado caso ta surgi e pregunta : con nan ta bai bereken 270 of 320 florin pa aña den bo gasoline sin cu e lo subi? Wel un manera ta absorba y esei nan no ta loke Gabinete Eman tin pensa di hasi! Pero den mesun rosea e minister ta declara cu "segun bo ta tank bo ta pague". Kiko esaki ta nifica e ora ey? Just think about it si bo ta biba pariba di brug of simplemente circumstancia di bida ta pone cubo ta core hopi lo nifica (mas kilometers cori) automaticamente cu bo lo bishita pompstation varios biaha y bo lo bai paga mas! Logicamente e posibilidad tey cu bo lo end up ta paga hopi mas di loke bo ta custumbra di paga na nummerplaat! Si esei no ta e caso laga Minister presenta e berekening y mustra pueblo cu no ta asina. Ademas pa tin transparencia e ta fair pa pueblo haya un splicacion den extenso con ta bai combina e calculacion di accijns cu e cobransa di motorrijtuigenbelasting. 

Pa purba hustifica e cambio a trece dilanti como argumento 1) e sistema actual ta causa hopi trabou y incomodidad 2) cu awor si e ta posibel cu tur hende lo ta pagando na tempo. Pa loke ta trata argumento # 1 mester remarca cu unico incomodidad ta e structura cu Servicio di impuesto mes tin pa cu otorgamento di nummerplaat. Si lo a concentra riba eficiencia e storia lo ta uno diferente. E hecho cu no ta tur persona ta paga nummerplaat lo no mester bira tampoco un issue cu ta bai castiga full pueblo. Es mas lo mester a pone enfasis riba un proceso di incasso mas estricto pa por cobra esnan cu no a cumpli. Apesar cu kier purba hasi como sifuera ta pa simplifica e sistema no mester kita atencion cu e motibo number #1 cu Gabinete Eman kier implementa e cambio aki ta pa ranca placa mas placa for di pueblo ! Sin worry si esaki ta afecta of no e cartera of sistema di biba di e cuidadano. 

Si yega asina leu pa ehecuta e medida aki manera nan tin pensa esaki lo ta devastador pa e poder di compra! Ta importante pa pueblo realisa cu hopi cos ta draai rond di transporte. Cual riba su turno ta opera cu gasoline of diesel. E producto cubo ta cumpra den un supermercado por ehempel ta un truck a hibe eynan pa finalmente e wordo poni den reki. Dus e medida aki ta bai pone tur producto nan prijs bai laira pasobra gasto di transporte lo bai subi drasticamente. Esaki kiermeen cu cambio den cobransa di motorrijtuigenbelasting lo ta devastador pa pueblo! 

Pa termina e ta bisto cu Gabinete Eman nunca kier mustra di ta e ehempel door di corta vet den propio seno sino ta scoge pa suta pueblo cu acumulacion di medida afectando poder di compra di tur cuidadano. E ta tristo cu gobierno di Mike Eman (Avp) deliberadamente ta sigui hinca man den bo saco abusando di pueblo sin cu te dia di awe a demostra un cambio significativo den nan maneho!

Expresionnan haci den e articulo aki no necesariamente ta refleha opinion di ArenaPoliti.co