{idkey=424b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F1992-professor-dr-earney-f-lasten-phd-kiko-mas-falta-pa-sosode-pa-mike-eman-zink-aruba-completamente%3FItemid%3D101][title=Professor+Dr.+Earney+F.+Lasten+PhD%3A+Kiko+mas+falta+pa+sosode+pa+Mike+Eman+zink+Aruba+completamente%3F][desc=REALIDAD+DI+BIDA%3A+BOSO+GOBERNANTENAN+SA+KIKO+TA+NIFICA+%E2%80%9CGOBERNA%E2%80%9D%3F%26amp%3Bnbsp%3BSegun+Professor+Dr.+Earney+F.+Lasten%26amp%3Bnbsp%3BPermitimi+expresa+mi+opinion+como+un+Arubiano+trahando+y+residencia+den+exterior.%26amp%3Bnbsp%3BMi+ta+sigui+tur+acontecimiento+na+Aruba+di+cerca+tur+dia%2C+pesey+mi+ta+desea+di+duna+mi+opinion+al+respecto.Mi+ta+lamenta+y+preocupa+di+mira+con+nos+dushi+isla+Aruba+poco+poco+ta+perde+mayoria+di+su+autentico+ingredientenan+positivo+di+nos+antepasadonan.Antes+bo+por+a+laga+bo+porta+di+cas+habri%2C+]}
REALIDAD DI BIDA: BOSO GOBERNANTENAN SA KIKO TA NIFICA “GOBERNA”? 

Segun Professor Dr. Earney F. Lasten 

Permitimi expresa mi opinion como un Arubiano trahando y residencia den exterior. 

Mi ta sigui tur acontecimiento na Aruba di cerca tur dia, pesey mi ta desea di duna mi opinion al respecto.

Mi ta lamenta y preocupa di mira con nos dushi isla Aruba poco poco ta perde mayoria di su autentico ingredientenan positivo di nos antepasadonan.

Antes bo por a laga bo porta di cas habri, sin tin miedo di ladron, mientras awe ta fiesta tin den ladronicia.

Antes nos habitantenan ta biba como un famia feliz uni cu otro, mientras awe nos ta biba oprimi, cu miedo di expresa nos opinion.

Antes nos medionan di comunicacion por a pensa y scirbi liber, awe varios di nan a bende nan principio pa interesnan personal.

Antes nos Isla tabata economicamente den top ranking, awe tur hende ta papia di e mega debe cu AVP a crea pa nos.

Desde anja 2009 AVP a bin cu un campanja cu un mercadeo di crea sensacion, caminda populismo ta fiesta di tur dia, es decir cu popularidad ta e esencia pa sobresali y den campanja un manera fuerte pa haya mas voto posibel.

E gobernantenan actual a penetra cuidadosamente den varios sector pa purba silencia esnan cu posiblemente kier a pensa of expresa nan mes libremente.

E gobernantenan a bin cu nan tacticanan y e strategianan pa manipula noticia, esta tur loke nan hasi malo nan ta laba bo cerebro y hinka e noticia fresco aki como algo cu ta positivo pa Aruba y pa bo persona kere cu ta algo positivo pa Aruba.
Tur AVPnan, tanto ministernan como parlamentarionan  y nan coordinadornan ta papia un solo idioma,  como sifuera nan manera di goberna ta ehemplar , sobresaliente y correctamente.
Esaki ta e manera pa indoctrina un pueblo, caminda ya e pueblo no ta pensa mas, sino ta e AVPnan ta pensa pa e pueblo.
Esnan cu ta indoctrina e pueblo  sa masha bon, cu tur loke nan ta menciona ta puro mentira, pero e interes pa nan sigui previligia nan mes tur dia ta asina grandi, cu na nan a bira adicto pa sigui cu nan maldadnan cu nan kier somete na e digno pueblo.

Di otro un banda, e actual gobernantenan ta bagatelisa e ponencia real y veridico di oposicion, den nan medionan di prensa, cu AVP tin den nan gara y e medionan di prensa aki cu ta haya cos, ta baila e tumba manera AVP ta desea.

Varios lider sindicatal cu a bende nan alma pa cos, ta laga e Gobierno actual hasi y deshasi locual nan ta desea.
Varios instancia tin miedo pa represaya, pesey nan ta laga e Gobierno sigui  castiga e pueblo cu medida.
Parlamentarionan cu ta sostene e actual Gobierno di AVP a bira marionetanan cu no tin nodi di usa nan cerebro mas, ta Mike Eman ta pensa y disidi pa nan.

Un Gobierno cu ta traha sin pia sin cabez;

• Un tram fracasá, sin vision cu ta corre pariba y pabou, cu a costa miyones,cu Pueblo, esta nos mester paga pa e tramnan aki, sin a duna un resultado positivo, pa aumenta e benta di e negoshinan den caya principal di Aruba. Varios negoshi den caya principal ta cla pa stop di opera.
  
  
• Nos promer ministro presidente di Aruba, Mike Eman ta hasi propaganda na Aruba y den exterior, cu Aruba lo ta 100% green na anja 2020, esta aki 5 anja. Manera semper Mike Eman a costumbra di tuma su pueblo hasi, manera e ta hanja ta bon, con tal e keda na poder. Otro mentira di Mike Eman.

• Su welo ta un ehempel, Shon Henny Eman a menciona e tempo nan di pasado: laga nos tuma nan hasi, pasobra toch ora di eleccion e pueblo a lubida y ta bolbe vota pa nos di Eman. Nos di AVP ta hende sabi y e Indianan di Aruba ta hendenan humilde y bobo. Facil pa bo bendenan un 6 pa un 9.
• Mike Eman a laga sa, cu si e sigui braza e hendenan di Aruba, e ta sigui gana nan confianza y nos pueblo ta bolbe vota pa Mike Eman keda ministro presidente. Y e gobernacion malo caminda AVP a crea un mega debe ta ser lubida y perdona, pasobra Mike Eman sa hopi bon con pa papia bunita pone hende kere un cos pa otro.  Abo lo kier cai den su trampa un biaha mas ?

• En vez di a rebaha BBO, AVP a subi BBO te cu 3.5% y awor nan ta bay colga nos Pueblo pronto aumentando BBO te cu 8%. AVP ta sinonimo di “medida”.
• Awor nos tin cu parkeer auto pagando Fls.2.00 pa ora, sino fono, nan ta klem bo auto, touw bo auto bay cune y bo mester paga Fls.200.00 pa hanja bo auto bek. Negoshinan no ta bende manera custumber, lugarnan pa parkeer ta mescos cu un desierto. Un fracaso total e forma con AVP a introduci parkeermeternan.

• Cu e 24 medidanan cu AVP ta bay introduci ainda y e medidanan cu ya nan a introduci, Aruba lo bira asina costoso, cu e mayoria di nos Pueblo mester buska ayudo extra pa sobrevivi of muda y laga pais Aruba pa Mike Eman y su previligiadonan.
  
  
• Dor cu Aruba lo bira asina costoso, automaticamente criminalidad lo aumenta drasticamente y esey nos por a nota caba.
  
  
• Gabinete Mike Eman no ta rebaha su gastonan di gobernacion, nan no ta rebaha nan 200 plus coordinadornan cu ta gana placa di nos pueblo sin traha.
  
  
• Nos autonomia financiero cu tanto nos Libertador Betico Croes q.e.p.d. a lucha pe, awe a ser entrega bek na Hulanda. CAFT y of Hulanda tin ultimo palabra den tuma decision pa Aruba.
  
  
• Dia 27 di augustus 2015 ta un dia scur pa Aruba, ta un dia cu ta bay den historia; Esaki ta e dia cu husticia a laga sera un paar di hende cu a hasi desorden dilanti di parlamento, mientras esnan di AVP, tanto Mike Eman himself como su ministernan y su parlamentarionan cu a distrui Aruba cu medida, si ta cana rond manera nada no a pasa. Esaki ta nos husticia real? Esaki ta loke nos pueblo kier pa nos digno pueblo di Aruba?

• Si e Gobierno di Mike Eman tabata goberna bon manera mester ta, si e ministernan tabata hende drechi manera mester ta, pakiko Hulanda a pone anto e gobierno di AVP bau curatela? Un “Koninglijk Besluit” cu ni si bo kier no por ser desmenti y of elimina e cicatriz. Di awor padilanti ta Hulanda tin e ultimo palabra encuanto gastamento di nos placa segun presupuesto! 

Mescos cu nos mayornan ta prohibi nos jioenan menor di edad pa tuma un decision, asina E Gobierno di AVP a bira, nan a bira menor di edad, hende bobo, incapacita pa tuma decision den nan propio cas.
Asina leeuw e Gobierno di Aruba a contribui pa nan propio mal maneho.  
Un gobierno di AVP cu no tin cuero di cara y a perde tur nan credibilidad.
Mike Eman cu su previligiadonan ta bay den historia caminda nos jioenan y jioenan di nos jioenan lo siña na skol con malo e gobierno di Mike Eman tabata durante anja 2009 te cu 2015.
Ainda boso por tuma boso retiro y laga esnan cu sa kiko ta goberna, drecha locual boso a destrui.

Mi pregunta na e digno pueblo di Aruba:
“Cuanto di boso votador ta stima nos dushi Aruba” ?
“Cuanto di boso votador ainda ta pro e gobernacion di AVP” ?  
Ta existi “Vox Populi Vox Dei”?

Expresionnan haci den e articulo aki no necesariamente ta refleha opinion di ArenaPoliti.co