{idkey=8512b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2089-minister-otmar-oduber-celebracion-di-60-ana-di-nos-escudo-ta-un-inicio-di-celebracion-y-reflexion-di-e-importancia-di-simbolonan-aki-pa-nos-tur%3FItemid%3D101][title=Minister+Otmar+Oduber%3A+Celebracion+di+60+a%C3%B1a+di+nos+Escudo+ta+un+inicio+di+celebracion+y+reflexion+di+e+importancia+di+simbolonan+aki+pa+nos+tur][desc=Aruba+ta+di+fiesta+mirando+cu+otro+a%C3%B1a+nos+ta+celebra+30+a%C3%B1a+di+nos+status+aparte+y+tambe+40+a%C3%B1a+di+nos+Himno+y+Bandera%2C+pero+dia+15+di+november+Aruba+ta+celebra+60+a%C3%B1a+di+existencia+di+e+simbolo+di+nos+identidad%2C+cual+ta+nos+Escudo.+E+tabata+un+proceso+cu+a+inicia+dia+27+di+maart+1953+unda+e+tempo+ey+Gobierno+a+anuncia+un+concurso+pa+yega+na+e+escudo+di+Aruba.+A+dura+2+a%C3%B1a+y+mey+pa+por+a+yega+na+e+dise%C3%B1o+aki+unda+15+di+november+1955+Aruba+a+conoce+oficialmente+su+escudo.Minister+Otmar+Odu]}
Aruba ta di fiesta mirando cu otro aña nos ta celebra 30 aña di nos status aparte y tambe 40 aña di nos Himno y Bandera, pero dia 15 di november Aruba ta celebra 60 aña di existencia di e simbolo di nos identidad, cual ta nos Escudo. E tabata un proceso cu a inicia dia 27 di maart 1953 unda e tempo ey Gobierno a anuncia un concurso pa yega na e escudo di Aruba. A dura 2 aña y mey pa por a yega na e diseño aki unda 15 di november 1955 Aruba a conoce oficialmente su escudo.

Minister Otmar Oduber den su encuentro semanal cu prensa a habri un siman positivo y a comenta cu esaki ta un bon momento pa nos tur cu ta biba riba e pida baranca aki pa realisa e importancia di e identidad nan aki cu ta uni nos como nacion, cu ta haci nos como un isla chikito, fuerte, unda den mundo nos ta reconoci pa e exitonan grandi cosecha. E mandatario ta bisa: "Esaki ta posibel a base di principionan y descendencia fuerte cu nos tin cu Aruba a sa di traspasa di generacion pa generacion por medio di e simbolonan importante aki."

Kier duna nos Escudo e balor cu e merece y a percura pa un concurso cu ya caba ta tumando luga na scolnan basico tur rond di nos isla. E concurso aki ta duna nos hobennan e oportunidad pa cera conoci cu cada un di e significacionnan cu tin integra den nos Escudo pero tambe na mes momento celebra e existencia di e simbolo importante aki. Minister Oduber ta agrega: "Hopi biaha a traves di nos hobennan nos ta yega na e mayornan tambe. E ta brinda un oportunidad pa e interaccion cu ta asina necesario entre mayor y yiu, y asina educa di e forma aki hopi di esunnan cu ta biba riba nos isla, cu no necesariamente ta esunnan cu a nace na Aruba pero cu a integra den e ultimo añanan den nos comunidad. Awor nan tambe ta conoce a traves di nan yiu y e lesnan cu nan ta haya na scol, e simbolonan asina importante cu cada un nos como Arubiano a nace y lanta cu ne."

Minister Oduber ta sigui comenta cu esaki ta un inicio di celebracion di un di e balornan principal cu nos como ciudadano mester sinti den nos curason ora nos ta papia di dje. Sr. Oduber ta termina bisando: "Celebracion di 60 aña di nos escudo combina cu celebracion di 30 aña di nos status aparte y tambe 40 aña di nos Himno y Bandera ta hinca nos den un periodo di celebracion hopi importante pero mas cu tur tambe di reflexion y conscientisacion di con importante e simbolonan aki ta pa cada un di nos cu ta biba riba e pida baranca aki."

Expresionnan haci den e articulo aki no necesariamente ta refleha opinion di ArenaPoliti.co