{idkey=2432b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2104-mep-e-exito-di-mas-grandi-di-avp-den-6-ana-ta-di-manda-pais-aruba-un-biaha-mas-den-bancarota-parti-2%3FItemid%3D101][title=MEP%3A+E+exito+di+mas+grandi+di+AVP+den+6+a%C3%B1a+ta+di+manda+pais+Aruba+un+biaha+mas+den+bancarota%21+%28parti+2%29][desc=Den+su+ultimo+comunicado+sr.+Rene+Herde+kier+sigui+manipula+mente+di+pueblo+y+esaki+door+di+pinta+su+gobierno+di+AVP+como+uno+cu+a+traha+hopi+duro+pa+bienestar+di+un+y+tur+den+e+pais+aki.+Sinembargo+nada+di+e+storia+y+novelanan+aki+ta+berdad+y+ta+pesey+MEP+un+biaha+mas+ta+haya+su+mes+obliga+di+desenmascara+e+mentiranan+di+Rene+Herde.Crecemento+economico%3A+Ya+ta+na+varios+ocasion+caba+cu+Rene+Herde+kier+sigui+manipula+mente+di+pueblo+bisando+cu+e+crecemento+economico+cu+AVP+a+hereda+for+di+Gabinet]}
Den su ultimo comunicado sr. Rene Herde kier sigui manipula mente di pueblo y esaki door di pinta su gobierno di AVP como uno cu a traha hopi duro pa bienestar di un y tur den e pais aki. Sinembargo nada di e storia y novelanan aki ta berdad y ta pesey MEP un biaha mas ta haya su mes obliga di desenmascara e mentiranan di Rene Herde.

Crecemento economico: Ya ta na varios ocasion caba cu Rene Herde kier sigui manipula mente di pueblo bisando cu e crecemento economico cu AVP a hereda for di Gabinete Oduber na 2009 tabata -15%. Sinembargo segun e cifranan oficial di Banco Central e crecemento economico, esta e “Real GDP growth” na 2009 tabata -11.3% (3210-3620/3620*100) y no e cifra mentiroso di -15% inventa pa Herde. Alavez un otro mentira di Herde ta cu e crecemento economico na 2014 tabata 2%, pero realidad ta cu esaki tabata solamente 1.2%.

Un otro mentira ta ora cu Rene Herde menciona cu durante e ultimo 6 añanan nos economia a crece den total cu 17%. Sinembargo cifranan di Banco Central ta mustra cu esaki tabata en total solamente 4.5% den 5 aña! Alavez locual Rene Herde no ta splica pueblo ta cu e caida drastico den nos economia na 2009 tabata debi na factornan externo, esta e crisis financiero mundial cu a afecta tur pais na mundo y cu esaki absolutamente no tin nada di haber cu e maneho hiba pa Gabinete Oduber. Hecho ta cu na 2001 Gabinete Oduber tambe a hereda for di AVP un caida den nos economia cu -3% y riba dje debenan gigantesco pa paga, pero cu trabaonan duro e gobierno di MEP a logra crece nos economia positivamente den e añanan siguiente y te hasta cu na 2004 nos pais a conoce un crecemento economico espectacular di 7.9%. Hecho ta cu te ainda e gobierno di AVP no a logra kibra e record di GDP (nominal y real) cu a ser registra na 2008 bao di Gabinete Oduber!

Desempleo: Un otro mentira flagrante di Rene Herde ta cu e cifra di desempleo bao di gobierno di AVP a ser reduci di 11% te 7.5%, pero den e mesun rosea e no ta splica pueblo e motibo dicon e cantidad di esnan cu ta cobra onderstand a aumenta den forma astronomico for di 1846 na 2009 te cu mas cu 2700 na 2015, un aumento cu casi 50%!. Hecho ta cu pa gran parti e grupo aki ta consisti di esnan cu a perde trabao durante e ultimo 6 añanan.

Energia sostenibel: Practicamente tur loke cu a ser realisa te cu awor riba e tereno di energia sostenibel ta data for di prome cu 2009, caminda gobierno di MEP a realisa e Parke di molina na Vader Piet y tambe e plantanan di Reverse Osmosis y RECIP. Lo unico cu Gabinete Eman a logra te cu awor ta e Solar Park na Aeropuerto cu ta aporta solamente cu 3.4 Mhw na energia sostenibel. Alavez lo ta bon pa Rene Herde splica pueblo con a para cu e Parke di Molina fantasma na Urirama, tambe e proyecto fantasma di casnan di Smart Community na Kibaima y tambe e fracaso total di e bus electrico. Y pa no papia mes di e conferencianan berde cu a produci net nada na energia sostenibel pa nos pueblo.

Centro di ciudad: Den apenas 6 aña Gobierno di AVP a logra converti Oranjestad den un area caminda a core cu tur cliente for di e ciudad aki, aunke cu a hinca mas cu 80 miyon florin na embeyecimento, den e proyecto di locura di tram y finalmente tambe e parkeermeters cu a caba di mata e centro aki hunto cu e gran cantidad di drogadictonan cu a podera di henter Playa y cu a trece insiguridad, tanto pa e turistanan como e hendenan local.

Forsa di compra: E ultimo persona na Aruba cu por papia di forsa di compra cu a bay atras ta Rene Herde, ya cu ta su persona so te ainda no ta mira con e medidanan cruel di su gobierno ta golpiando pueblo malamente tur dia, manera entre otro aumento di e primanan di AOV, AZV, BAZV, pago pa recoge sushi, aumento di prijs di coriente, parkeermeters, vastrecht riba recibo di coriente, aumento grondbelasting, koers marge tax etc. Y riba dje Gabinete Eman ta nenga redondamente pa aumenta e salario minimo, algo cu nan a haci solamente un vez den 6 aña.

E 5 puntonan aki ta reaccion riba un parti di tur e barbaridadnan cu Rene Herde a trece padilanti den su ultimo comunicado y ta rekeri partido MEP un articulo mas pa desbarata tur e mentira y manipulacionnan di Rene Herde. Ta poco poco MEP lo sigui scama e pisca ladronchi aki!

Expresionnan haci den e articulo aki no necesariamente ta refleha opinion di ArenaPoliti.co