{idkey=1432b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2109-parlamentario-chris-romero-mep-gobierno-ta-atracando-pueblo-cu-aumento-di-accijns%3FItemid%3D101][title=Parlamentario+Chris+Romero+%28MEP%29%3A+Gobierno+ta+atracando+pueblo+cu+aumento+di+accijns][desc=Entrante+1+di+january+2016+probablemente+nos+lo+bay+paga+24+cent+extra+pa+liter+di+gasolin+%26amp%3Bnbsp%3BSiman+pasa+Minister+Angel+Bermudez+a+anuncia+cu+e+aumento+di+accijns+cu+lo+cubri+e+motorrijtuigbelasting%2C+lo+ta+entre+10%2F15+cent+pa+28+cent+pa+cada+liter+di+gasolin.+Y+segun+informacion+cu+nos+a+haya%2C+e+aumento+lo+ta+di+24+cent+pa+cada+liter+di+gasolin.Manera+a+bira+custumber+caba%2C+Gobierno+di+AVP+ta+duna+informacion+na+mitar+pa+asina+purba+mantene+nos+cumunidad+ignorante+di+e+manera+cu+nan+ta+mal+ga]}
Entrante 1 di january 2016 probablemente nos lo bay paga 24 cent extra pa liter di gasolin  

Siman pasa Minister Angel Bermudez a anuncia cu e aumento di accijns cu lo cubri e motorrijtuigbelasting, lo ta entre 10/15 cent pa 28 cent pa cada liter di gasolin. Y segun informacion cu nos a haya, e aumento lo ta di 24 cent pa cada liter di gasolin.

Manera a bira custumber caba, Gobierno di AVP ta duna informacion na mitar pa asina purba mantene nos cumunidad ignorante di e manera cu nan ta mal gastando nos placa.
Den e caso di e implementacion di motorrijtuigbelasting den accijns, Minister Bermudez a falta pa duna un splicacion detaya di e calculacion pa e aumento aki.

E entrada cu e motorrijtuigbelasting ta genera anualmente pa Gobierno ta di mas o menos 22 miyon florin pa aña. Gobierno su argumento pa cambia e sistema di cobra motorrijtuigbelasting ta cu no ta tur hende ta bay paga nan number di auto manera mester ta, y implementando esaki den accijns tur hende lo cumpli cu nan deber.
Minister Bermudez a papia di un suma minimo di 10 cent pa liter cu lo pone como accijns adicional. Si Gobierno dicidi di cobra e 10 cent extra pa liter, lo ta sigur di lo por cubri e 22 miyon cu Gobierno lo mester genera anualmente for di motorrijtuigbelasting. No solamente e 10 cent aki lo cubri e 22 miyon, pero te hasta lo tin un margen di ganashi extra cun'e. Considerando e factor aki, cobrando mas cu 10 cent adicional riba accijns ta nifica cu pueblo lo ta pagando mas di loke cu normalmente lo a paga na plachi di number pa auto.

Hasiendo un simpel calculacion di con cada ciudadano lo por yega na cubri e AWG 320,- cu ta paga normalmente na motorrijtuigbelasting, nos por mira claramente cu cualkier suma riba 10 cent ta un abuso caba di parti di Gobierno.
Por ehempel, si un persona gasta AWG 40,- pa siman na gasolin, cu ta mas o menos 20 liter di gasolin, na final di aña ya caba el a cubri su AWG 320,- di contribucion na motorrijtuigbelasting.
Pero si un famia promedio na Aruba gasta mas o menos 50 liter di gasolin pa siman, hasiendo uzo di unicamente 1 auto, y nos calcula esaki cu e suma maximo estima cu lo cobra extra riba accijns, cu ta 28 cent pa liter, e ora nos ta papiando di un pago anual di AWG 728,- na motorrijtuigbelasting.
Aki nos ta mira cu di AWG 320,- cu nos tabata custuma di paga anualmente na number di auto, cu e ley nobo aki hopi di nos lo bay paga AWG 728,- pa aña, of hasta mas! Un aumento drastico di mas o menos AWG 400,- cu nos pueblo lo tin di bay paga danki na e mal maneho di Mike Eman y su consorcio.

Si esaki no ta medida, mi lo kier pa Gobierno di Mike Eman splica pueblo ta kiko esaki ta.
Minister Bermudez a bisa cu na ningun momento lo mishi cu cartera di hende, pero realidad ta cu e ley nobo aki ta un atraco legal riba nos pueblo.
Aki no ta trata mas di hinca man den cartera di pueblo, aki Gobierno di AVP ta hincando e brasa completo den pueblo su cartera.

Expresionnan haci den e articulo aki no necesariamente ta refleha opinion di ArenaPoliti.co