{idkey=7433b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2125-gabinete-me-ii-sector-publico-y-priva-ademas-di-gremio-sindical-ta-sostene-creacion-di-e-centre-of-excellence%3FItemid%3D101][title=Gabinete+ME+II%3A+Sector+publico+y+priva+ademas+di+gremio+sindical+ta+sostene+creacion+di+e+Centre+of+Excellence][desc=ORANJESTAD+%E2%80%93+Manera+a+keda+anuncia%2C+Gobierno+di+Aruba%2C+den+colaboracion+cu+e+Programa+di+Desaroyo+di+Nacionnan+Uni+%28UNDP%29%2C+a+lansa+un+Centro+di+Excelencia+pa+Desaroyo+Sostenibel+di+Islanan+Chikito+den+Desaroyo+%28SIDS%29.+Esaki+ta+un+iniciativa+cu+Prome+Minister+Mike+Eman+tin+ya+algun+luna+trahando+riba+dje+hunto+cu+Nacionnan+Uni+y+Hulanda.+Gremionan+di+Aruba+a+haya+presentacion+di+e+27+Meta+di+Desaroyo+Sostenibel+%28SDG%29+cu+Nacionnan+Uni+a+establece+y+for+di+a+eynan+a+tuma+nota+cu%2C+en+berdad+Aruba+]}
ORANJESTAD – Manera a keda anuncia, Gobierno di Aruba, den colaboracion cu e Programa di Desaroyo di Nacionnan Uni (UNDP), a lansa un Centro di Excelencia pa Desaroyo Sostenibel di Islanan Chikito den Desaroyo (SIDS). Esaki ta un iniciativa cu Prome Minister Mike Eman tin ya algun luna trahando riba dje hunto cu Nacionnan Uni y Hulanda. Gremionan di Aruba a haya presentacion di e 27 Meta di Desaroyo Sostenibel (SDG) cu Nacionnan Uni a establece y for di a eynan a tuma nota cu, en berdad Aruba ta e miho luga pa e centro di excelencia, ya cu varios di e SDG ta cosnan cu Aruba a logra of ta trahando actualmente riba dje.
E centro ta busca pa reenforsa innovacion y fortalesa den SIDS—den Caribe y mas leu tambe. E ta bay ofrece un plataforma pa intercambio di conocemento y experiencia entre paisnan den desaroyo, incluyendo riba topiconan manera energia renovabel, resistencia na clima, aliansanan publico-priva, maneho di awa, turismo, medio ambiente y salud publico. E acuerdo pa e institucion di e centro a conta cu firma di Prome Minister Mike Eman, Kees Rade di Gobierno Hulandes y Richard Blewitt di UNDP.
“Aruba ta trahando duro pa logra su vision di sostenibilidad y prosperidad comparti, y den esaki a construi un ‘know how’ den hopi area. Nos ta en berdad honra cu UNDP a scoge Aruba pa solidiica e conocemento aki yuda comparti experiencianan cu otro SIDS, fomendanto tambe e cooperacion Sur-Sur” asina Minister President Mike Eman a expresa, añadiendo cu “Tambe nos ta gradici Hulanda pa nan apoyo na Nacionnan Uni y nan comprension di con e proyecto aki lo beneficio SIDS rond mundo.”
Prome cu e firma di e acuerdo diaranson mainta durante e Green Aruba Conference, diamars atardi, Blewitt a duna un presentacion na diferente gremio di nos isla. Representante di sector publico, comercial y sindical, entre otro pa presencia con pa prome biaha, e bandera di Nacionnan Uni a bay halto na sede di Dr. Edward Cheung Center for Innovation na Sasaki.
President di SEPPA, Magaly Brito a atende e presentacion aki y na salida a comenta riba e SDG cu e “ta kere cu den futuro, como comunidad, nos mester sigui desaroya nan apesar di ki gobierno y ki signatura bo tin; pero como pais bo ta tuma nan y traha riba nan paso na final e ta bienestar di un comunidad.”
President di ATIA tambe tabatin comentario positivo pa cu e creacion di e centro y e proposito su tras. “Como Arubiano nos mester ta hopi orguyoso di wak con hopi di e cosnan ey nos a logra y surpasa e rekisitonan; claro nos tin hopi caminda pa cana,” tabata e palabranan di Michelle Henriquez. Tambe a expresa cu el a sali for di e presentacion cu e sensacion cu nos ta riba e bon caminda. “Hopi di e cosnan aki nos a haci caba of nos ta haciendo of tin plan pa haci. E ta duna bo un orguyo como Arubiano haciendo e cosnan aki.”
Pa Jim Hepple, e reto ta uno masha cla. Mirando cu e metanan ta fiha riba un termino di 15 aña, te 2030, Aruba mester bin un proceso den cual gobiernonan mester pensa mas leu cu nan termino di mando. “El a yega di wordo haci na Aruba. Nos tur ta corda e documento ‘Nos Aruba’ cu a keda produci algun aña atras basa riba e establecimento di un consenso entre e poblacion riba e tipo di Aruba cu tur hende kier.”
Lider di Fraccion di AVP de Parlamento, Rene Herde tambe ta kere cu esaki ta posibel. E ta sumamente encantan cu Aruba ta bay haya instrumentonan dirigi riba temanan, no cu nan kier pero cu nos propio temanan, ademas di sosten y ayudo pa nos  realisa nan. El a recorda cu ultimo biaha cu nos isla a haci algo asina tabata e proyecto di 2025 cu cual nos a logra hopi den formula y trece hende hunto. “Loke UN ta presente ta un paso mas leu,” e Parlamentario a indica.
Den un comunicado di prensa emiti pa Nacionnan Uni, ta describi e seleccion di Aruba como sede di e centro, di e siguiente forma: “E Centre of Excellence ta basa riba Aruba su experiencia den e uzo di practicanan di desaroyo sostenibel. Durante añanan, e pais a desaroya unr eputacion pa maneha e temanan aki cu proyectonan ambicioso, manera e obhetivo pa depende solamente di energia renovabel pa 2020.”

Expresionnan haci den e articulo aki no necesariamente ta refleha opinion di ArenaPoliti.co