{idkey=2613b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2216-parlamentario-mr-xiomara-maduro-mep-gobierno-y-aruparking-ta-stroba-ara-di-por-haci-nan-trabou-adecuadamente-perhudicando-parlamento-di-aruba-tambe%3FItemid%3D101][title=Parlamentario+mr.+Xiomara+Maduro+%28MEP%29%3A+Gobierno+y+Aruparking+ta+stroba+ARA+di+por+haci+nan+trabou+adecuadamente+perhudicando+Parlamento+di+Aruba+tambe][desc=No+ta+solamente+Pueblo+y+e+comerciantenan+concentra+den+Centro+di+Oranjestad+ta+wordo+perhudica+pa+e+introduccion+di+parkeermeters+di+Aruparking.+Awor+empleadonan+di+Colegionan+Halto+di+Estado+manera+Parlamento+y+Algemene+Rekenkamer+Aruba+%28ARA%29+tambe+ta+wordo+perhudica+pa+por+cumpli+cu+nan+trabou+ya+cu+desde+cu+Aruparking+a+bin+cu+parkeermeters%2C+nan+no+ta+dispone+mas+di+un+lugar+pa+por+para+nan+auto.+Sigur+awor+cu+a+sera+un+gran+parti+di+e+caminda+pa+por+traha+riba+Plaza+Padu%2C+e+trahadornan+ta+w]}
No ta solamente Pueblo y e comerciantenan concentra den Centro di Oranjestad ta wordo perhudica pa e introduccion di parkeermeters di Aruparking. Awor empleadonan di Colegionan Halto di Estado manera Parlamento y Algemene Rekenkamer Aruba (ARA) tambe ta wordo perhudica pa por cumpli cu nan trabou ya cu desde cu Aruparking a bin cu parkeermeters, nan no ta dispone mas di un lugar pa por para nan auto. Sigur awor cu a sera un gran parti di e caminda pa por traha riba Plaza Padu, e trahadornan ta wordo mas perhudica. Pa e trahadornan di Parlamento e siman aki a yega na un semi-solucion, nan a haya un espacio entre Parlamento y Cocolishi pa staciona nan auto. Pero e trahadornan di e otro Colegio Halto di Estado, ARA, si Gobierno no a percura pa un solucion y esaki ta pone cu e trahadornan di ARA no por funciona debidamente pa por haci na trabou di controla Gobierno.

Mal planning di Ministernan
E ta bira cada bes mas bisto cu Gabinete Eman ta traha hopi bruha y cu un mal planning. Ta parce cu e Gobierno aki ta bin cu proyecto sin cu nan ta cuadra e trabounan cu otro. Pasobra Minister Sevinger ta bin traha Plaza Padu y ta laga sera tur caminda den vecindario incluso e parkeo priva di ARA. Minister Otmar ta bin cu su Aruparking y parkeermeters y ta kita tur parkeo den vecindario di ARA. Y Minister Eman mes cu ta e minister responsabel pa ARA ta keda keto y haci manera cu e problema aki lo resolve su mes sin cu e mester haci nada. Pero kizas e Ministernan aki no ta mira e problema cu nan mal planning ta causando e trahadornan, como cu tur Minister si tin parkeo priva, safe, gratis y dos stap lew di Cocolishi.

Aruparking no ta coopera
Nos a tuma nota cu e empleadonan di ARA correctamente a manda un carta pa e Ministernan concerni pa splica kiko tur nan a haci pro-activamente pa por a yega na un vergunning di Aruparking pa nan por parkeer den vecindario di nan trabou. Pero Aruparking no ta coopera cu ARA y a manda nan bay para na Arubus. Tambe a nenga e trahadornan di ARA pa para den e parkeo banda di ex Tivoli y den e parkeo di Renaissance dilanti Bestuurskantoor. Y awor Aruparking a djies pone nan den e lista di mas di 200 hende cu ta wardando riba un vergunning pa por para nan auto den Centro di Cuidad.

Mester busca un solucion
E ta hopi lamentabel y e ta di condena cu Aruparking y tur e ministernan conceri ta trata e trahadornan di ARA di e manera aki. Ta trahadornan di un Colegio Halto di nos Pais cu ta haci trabounan importante di control riba Gobierno y den esaki ta un sosten importante pa e trabou Parlamentario di nos Pais. Si e trahadornan di ARA no por haci nan trabou adecuadamente, esaki ta perhudica Parlamento di Aruba tambe. Pesey e apelacion fuerte ta bay na Minister Eman, Minister Sevinger y specialmente na Minister Oduber pa pone ordo y instrui Aruparking pa bin cu un solucion pronto pa e trahadonan di ARA por haya un parkeo sigur y serca di nan trabou. Pasobra no por ta asina cu Gobierno y Aruparking ta stroba ARA di haci nan trabou adecuadamente perhudicando Parlamento di Aruba tambe.

13 november 2015

Expresionnan haci den e articulo aki no necesariamente ta refleha opinion di ArenaPoliti.co