{idkey=1164b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2253-evelyn-wever-croes-mep-caft-a-confirma-cu-gabinete-eman-a-bolbe-fracasa%3FItemid%3D101][title=Evelyn+Wever-Croes+%28MEP%29%3A+CAFT+a+confirma+cu+gabinete+Eman+a+bolbe+fracasa][desc=PRESUPUESTO+2016+NO+TA+REALISTICO%E2%80%A6..+ATROBE%21%26amp%3Bnbsp%3B+%26amp%3Bnbsp%3B+ORANJESTAD+%E2%80%93+CAFT+e+siman+aki+a+publica+su+rapport+riba+e+presupuesto+2016+di+Gobierno%2C+cu+ainda+mester+yega+Parlamento.+E+rapport+aki+ta+a+base+di+e+ley+di+CFT+cu+gabinete+Mike+Eman+a+traha+y+cu+e+13+parlamentarionan+di+AVP+a+aproba+dia+27+di+augustus+2015.+CAFT+den+su+rapport+no+ta+tene+piedad+cu+e+presupuesto.+Den+un+palabra+nan+ta+considera+e+presupuesto+irealistico%2C+y+ta+remarca+cu+atrobe+e+Gobierno+no+a+entrega+esaki+na+tempo]}

PRESUPUESTO 2016 NO TA REALISTICO….. ATROBE!

ORANJESTAD – CAFT e siman aki a publica su rapport riba e presupuesto 2016 di Gobierno, cu ainda mester yega Parlamento. E rapport aki ta a base di e ley di CFT cu gabinete Mike Eman a traha y cu e 13 parlamentarionan di AVP a aproba dia 27 di augustus 2015.

CAFT den su rapport no ta tene piedad cu e presupuesto. Den un palabra nan ta considera e presupuesto irealistico, y ta remarca cu atrobe e Gobierno no a entrega esaki na tempo.

E presupuesto 2016 cu pueblo mes no por a tuma nota di dje, y cu Mike Eman tin bon scondi, ta papia di un otro pakete di medida nobo, pero cu asina mes no ta suficiente. Peset CAFT ta insisti pa gabinete Mike Eman introdusi e belasting nobo ABB mas pronto cu ta posibel, e anja aki ainda, pa asina logra cobra 50 miyon florin extra di pueblo otro anja.

CAFT ta basa e conclusion aki riba 7 punto:

Cresemento economico: gabinete Mike Eman ta conta cu cresemento di 3.8%, cual segun CAFT ta demasiado favorable, y CAFT ta insisti cu mester baha esaki na 3.5%

Entrada di gobierno: gobierno ta premira cu pa 2016 e por cobra 82 miyon florin na belasting atrasa di cuidadanonan di Aruba, pero CAFT no ta mira esaki realistico pasobra ta dos anja caba cu gobierno ta cobrando belasting atrasa y esaki ta birando menos y menos; ademas no a duna un splicacion debido con ta bai logra e meta aki, pues CAFT no ta kere cu e meta aki ta realistico.

Gastonan di gobierno: gobierno ta premira cu den 2016 su gastonan lo aumenta; CAFT ta bisa cu esaki ta contrario na e meta di e propio gobierno di percura pa gastonan no subi mas. Ademas CAFT ta bisa cu gobierno a compromete pa baha su gastonan di personal  cu 90 miyon florin, y awor no ta tene su mes na su palabracion. Gobierno a bai asina leew di fiha un maneho nobo, y lo no corta at all den gasto di personal. Dicon Mike Eman a priminti esey anto? Dicon ela firma cantidad di protocol anto?

Rebaho di deficit: Gabinete Mike Eman a compromete su mes cu Hulanda di baha e deficit di 2016 na 2%; hasta nan a pone esey den e ley di CFT cu e parlamentarionan di AVP a aproba. CAFT ta di opinion cu e presupuesto no ta logra e meta aki, cu e presupuesto NO ta realistico. CAFT ta yena na un deficit mas realistico di 2.9%, pero door cu esaki ta mas halto cu e 2% cu Eman a compromete su mes, CAFT ta bisa cu mester baha gasto mas ainda, of bin cu mas medida ainda.

                        

Interes y fiansa: Aruba ta pagando actualmente 210 miyon florin na interes, cu ta 16% di e gastonan total. Tempo di gobierno di MEP tabata ni mitar di e suma ey! Pensa kiko tur Aruba por a hasi cu e 210 miyon ey si gabinete Mike Eman no a endeuda nos pais di e forma aki! Lo pueblo por a hala rosea pasobra e medidanan lo no tabata necesario. CAFT ta remarca cu pa Aruba fia via Hulanda y paga menos interes, Aruba mester pone finansas na orden, pero di e forma aki, sigur bo no por bisa cu ta poniendo finansas na orde.

MEDIDA: Gobierno a cambia su lista di 24 medida, y remplasa esaki cu un lista di 7 medida, di cual un ABB cu mester cuminsa dia 1 di januari proximo y cu mester trese den caha di gobierno145 miyon florin, cu ta equivalente na un BBO di casi 6%. Esaki mester tin su efecto tambe den e planning di 2017-2020. Pero pa loke ta trata e entradanan premira, CAFT no ta kere cu nan lo wordo realisa y ta conseha pa baha esaki. Y pa loke ta trata e bahamento di gasto, tampoco ta realistico, y awor ta parse cu ta mucho poco gasto lo wordo corta.

Companianan estatal: e companianan cu tin perdida y no a entrega cuenta annual, manera Post NV, Arubus NV y Freezone Aruba NV, ta un riesgo grandi pa finansas di Aruba. Gobierno a reacciona cu nan no ta mira problema, pero CAFT ta insisti cu mester traha un fondo pa imprevisto di 1%.

Pa loke ta trata e proyectonan PPP, CAFT a remacrca cu e tipo di proyectonan aki ta forma un riesgo pa presupuestonan futuro di pais Aruba, mientras cu te ainda no ta tene cuenta cu nan pa determina e deficit ni e debe di pais Aruba (‘off balance’). CAFT pronto lo duna un conseho riba con mester atende cu e proyectonan aki. Y finalmente CAFT ta remarca cu ainda gobierno no tin su maneho y control na ordo, y CAFT ta bolbe urgi pa regla esaki y si mester cu technische bijstand, combina cu cursonan pa prepara e personal.

E rapport di CAFT ta uno hopi negativo. Gobierno a haya esaki 3 siman pasa caba, y mester a incorpora e cambionan sugeri pa CAFT. Gobierno mester a contesta e rapport aki caba, y Raad van Advies na e momentonan aki ta trahando nan contesta, y lo indica si Gobierno a cumpli cu sugerencia y consehonan di CAFT. Nos lo haya sa esey na momento cu e presupuesto 2016 yega Parlamento. Si gobierno no cumpli cu e consehonan di CAFT, e por bolbe haya un KB. E pregunta ta si Mike Eman lo bolbe laga e situacion sali asina tanto for di control.

Expresionnan haci den e articulo aki no necesariamente ta refleha opinion di ArenaPoliti.co