{idkey=8299b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2354-partido-abo-abo-lo-introduci-e-ley-ambiental-cu-a-wordo-traha-desde-1999-pa-proteha-e-medio-ambiente%3FItemid%3D101][title=Partido+ABO%3A+ABO+lo+introduci+e+ley+ambiental+cu+a+wordo+traha+desde+1999%2C+pa+proteha+e+medio+ambiente][desc=E+siman+aki+a+cuminsa+na+Francia+e+cumbre+internacional+riba+%E2%80%98Climate+Change%E2%80%99+%28COP21%29.+Antes+e+reunion+aki+tabata+wordo+yama+%E2%80%98Global+Warming%E2%80%99.+E+motibo+cu+nan+a+cambia+e+nomber%2C+tabata+cu+durante+e+ultimo+cumbre%2C+a+wordo+comproba+cu+esunnan+encarga+cu+e+tema+importante+aki%2C+a+manipula+cu+e+cifranan+pa+crea+un+scenario+hopi+mas+dramatico+pa+sigui+cu+nan+fiesta+di+conferencia.+Un+scandal+cu+a+debilita+e+atencion+pa+cu+e+medio+ambiente.+Esaki+ta+ilustra+bon+cla+con+e+medio+ambiente+a+bira+]}
E siman aki a cuminsa na Francia e cumbre internacional riba ‘Climate Change’ (COP21). Antes e reunion aki tabata wordo yama ‘Global Warming’. E motibo cu nan a cambia e nomber, tabata cu durante e ultimo cumbre, a wordo comproba cu esunnan encarga cu e tema importante aki, a manipula cu e cifranan pa crea un scenario hopi mas dramatico pa sigui cu nan fiesta di conferencia. Un scandal cu a debilita e atencion pa cu e medio ambiente. Esaki ta ilustra bon cla con e medio ambiente a bira ‘BIG BUSINESS’ pa diferente politico y gremio, sin cu realmente e medio ambiente ta beneficia di tur e bon intencionnan y e fondonan miyonario disponibel.

Algo similar ta pasa aki na Aruba. E gobierno actual tin su boca yen cu e palabra di sostenibilidad y ‘green’, locual ta costa pueblo un dineral na biahenan y conferencianan, mientrastanto cu den practica e medio ambiente ta wordo destrui y neglisha. Pues tambe, hopi palabranan y speechnan bunita pa sigui chica e ‘baca lechera’ ambiental.

Algun ehempel amargo tras di e mentira ‘Green’ di e gobierno actual:

• Mas di 10 km di naturalesa a wordo destrui pa un caminda scur, sin cu tabata tin un estudio ambiental haci;
• Hopi mangel tambe a wordo destrui pa construi un brug, sin un estudio ambiental apropia;
• Tin plannan pa destrui mas mangel na Savaneta, cu e construccion di un ‘eco-hotel’ den lama;
• Tin acuerdonan pa construi un hotel den un zona costal cu semper tabata un area proteha;
• Tin acuerdonan pa construi mas molina di biento den un zona costal, sin cu atrobe tin un estudio ambiental haci y te cu awendia e pueblo no a sinti ningun efecto positivo den nan cuenta di coriente;
• A pesar cu tin un concepto di ley ambiental cla desde 1999, conscientemente esaki a wordo boycott. Di e forma aki e politiconan por sigui haci y deshaci cu e medio ambiente manera nan kier, scondiendo tras di leynan anticua;
• Door di un maneho descontrola di migracion, tin un presion enorme riba e naturalesa, tin mas polucion, tin mas desperdicio, tin mas consumo di electricidad y tin mas molester di zonido den tur bario.

Dus e pregunta ta: Ki bon noticia ambiental e gobierno actual lo bay presenta na e conferencia mundial? E fabula cu Aruba caba ta genera hopi electricidad sostenibel, no ta beneficia e pueblo y tampoco e medio ambiente. E unico cu ta beneficia di dje ta e doño di e molina di biento cu su contract lucrativo. E otro fabula cu Aruba lo ta ‘100% fossil fuel free’ na 2018, ta pone hasta un mucha hari. E prueba pa cu esaki: Haci e Santo ‘Green’ e pregunta kico e tin pensa pa haci cu e autonan cu si ta core riba gasolin na 2018? Gobierno lo bay regala tur doño di auto un auto nobo cu ta core riba coriente? Nan lo bay bin cu un otro triki scondi manera nan kier a haci cu e autonan cu stuur na banda drechi? Si paisnan manera Hulanda y Merca ya caba a anuncia cu nan lo no yega 25%, con creibel e ta pa kere Aruba cu ta bancarota si por logra 100% den apenas 2 aña.

Posicion di partido ABO:

Lo bay introduci e ley ambiental y percura pa tin un maneho realistico y alcansabel. Lo bay duna un contenido berdadero na zonificacion y lo percura cu e medio ambiente haya su luga mereci. Tambe lo bin cu un maneho realistico y balansa entre economia y cuido ambiental. E no por ta cu e medio ambiente sigui wordo uza manera e ‘baca lechera’ pa algun politico tradicional cu ta beneficia nan mes e esunnan rond di nan. E medio ambiente tambe ta di e futuro generacion y nos no por sigui ‘viola’ e medio ambiente manera a wordo haci cu e fondonan publico y segun algun politico cu nan tambe.


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co