{idkey=1480b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2533-rene-herde-avp-areglo-pa-atende-conflicto-mas-serca%3FItemid%3D101][title=Rene+Herd%C3%A9+%28AVP%29%3A+Areglo+pa+atende+conflicto+mas+serca][desc=%E2%80%9CNos+ta+mas+serca+di+crea+un+areglo+legal+pa+atende+cu+conflictonan+entre+paisnan+di+Reino+Hulandes.+E+ta+un+tema+dificil.+E+ta+un+tema+cu+hopi+hende+no+a+haya+necesario%2C+te+ora+cu+a+surgi+problemanan+serio+entre+e+paisnan+di+Reino.+Ta+e+ora+a+bin+realisa+cu+no+tabata+tin+un+forma+corecto+pa+soluciona+diferencianan+di+opinion+of+conflictonan+e+paisnan+di+Reino.+E+urgencia+pa+crea+un+areglo+permanente%2C+imparcial+y+cu+ta+soluciona+problemanan+legal+den+forma+definitivo%2C+a+bira+mas+grandi.+Ta+ese]}
“Nos ta mas serca di crea un areglo legal pa atende cu conflictonan entre paisnan di Reino Hulandes. E ta un tema dificil. E ta un tema cu hopi hende no a haya necesario, te ora cu a surgi problemanan serio entre e paisnan di Reino. Ta e ora a bin realisa cu no tabata tin un forma corecto pa soluciona diferencianan di opinion of conflictonan e paisnan di Reino. E urgencia pa crea un areglo permanente, imparcial y cu ta soluciona problemanan legal den forma definitivo, a bira mas grandi. Ta esey tabata e tema mas pisa durante di e conferencia entre e cuatro paisnan di Reino na Sint Maarten siman pasa. Apesar di e ta un tema dificil cu tin hopi aña den discucion, nos a yega mas serca di crea un bon areglo legal pa Reino.” Esey tabata e prome reaccion di Rene Herdé, presidente di e comision permanente di Asuntonan di Reino Parlamento di Aruba, riba e tema di e areglo pa atende cu conflicto entre paisnan. E asina yama “geschillenregeling”.

AREGLO PA CONFLICTO
Rene Herdé a splica cu ora tin un conflicto of diferencia di opinion entre dos hende y nan no por soluciona esaki nan mes, nan ta bay corte serca un huez, cu ta atende e caso y dicta sentencia. Tur hende ta accepta e sentencia di huez, pasobra e ta dicta a base di e echonan y e ta imparcial. Den Reino Hulandes no tin un corte cu por dicta sentencia ora dos of mas pais di Reino tin un diferencia di opinion of un conflicto. Manera Reino Hulandes ta organisa awor aki, ta Gobierno di Hulanda ta dicta sentencia. E problema ta cu e mes un gobierno ey por ta parti di e conflicto. Esey kier men cu si gobierno Hulandes tin un conflicto cu Aruba, ta gobierno Hulandes cu ta parti di e problema, ta dicidi ken tin rason. Esaki ta un forma masha incorecto y imparcial. Ta cua gobierno ta bay dicidi contra di su propio desicionnan? Un areglo legal pa soluciona of dicta sentencia entre e paisnan di Reino ta loke ta purba crea pa hopi aña caba. Pa hopi aña caba expertonan hurido manera Mito Croes y Arjan van Rijn ta scirbi over di e tema aki y ta boga pa un areglo imparcial, mescos cu un corte di husticia. Na 2010 Juan David Yrausquin y Rene Herdé a entrega un mocion cu a wordo aproba den Parlamento Hulandes pa crea un areglo of corte pa atende cu e conflictonan aki. Apesar di cu Parlamento Hulandes na mas cu un ocasion a sostene e proposicion pa crea un areglo di conflicto asina, te awe esaki no a worde ehecuta. Aña pasa na luna di mei, e parlamentonan a yega na un acuerdo di con e areglo mester ta. Pero e minister di Asuntonan di Reino, sr. Plastrek, te ainda no a cumpli cu acuerdo di e parlamentonan. Hasta un mocion di su propio partido ela neglisha te awor.

SINT MAARTEN 
Durante di e reunionnan entre parlamentonan siman pasa, a tene discucionnan dificil, pero na final a yega na un proceso entre awor y juni e aña aki, pa duna gobierno Hulandes e chens pa presenta un concepto di ley pa crea e areglo di conflicto. Si gobierno Hulandes no haci esey, e proposicion di ley cu e tres paisnan Aruba, Corsow y Sint Maarten a acorda, lo wordo presenta na Parlamento Hulandes pa crea e areglo aki. Den e tempo entre awor y juni 2016, Parlamentonan lo eherce presion riba gobierno pa yega na un areglo cu ta cuadra cu e criterionan cu a acorda entre e parlamentonan. Rene Herdé: ”Nos ta compronde bon cu e ta un tema dificil pa politica Hulandes. Pero den Reino niun gobierno por ta huez di su propio accionnan. Mester tin un huez imparcial. Ta esey nos kier y awor nos ta mas serca di crea e instancia imparcial aki.” 

Expresionnan haci den e articulo aki no necesariamente ta refleha opinion di ArenaPoliti.co