{idkey=4851b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2542-ministerio-di-cultura-plaza-padu-un-inversion-di-riba-3-miyon-florin-cu-lo-mester-finalisa-pa-e-celebracion-di-18-di-maart-2016%3FItemid%3D101][title=Ministerio+di+Cultura%3A+Plaza+Padu+un+inversion+di+riba+3+miyon+florin+cu+lo+mester+finalisa+pa+e+celebracion+di+18+di+maart+2016][desc=Trabounan+grandi+andando+den+conexion+cu+celebracion+grandi+di+e+a%C3%B1a+aki+30+a%C3%B1a+di+Status+Aparte+40+a%C3%B1a+di+Himno+y+Bandera.+Ministerio+di+Cultura+ta+pushando+pa+completa+renobacion+di+Plaza+Betico%2C+pero+banda+di+esaki%2C+tin+un+otro+proyecto+cu+tambe+mester+keda+concretisa+prome+cu+18+di+maart+e+a%C3%B1a+aki+cual+ta+Plaza+Padu.+Durante+un+bishita+di+inspeccion+Minister+Otmar+Oduber+a+splica+cu+ya+caba+por+aprecia+e+prome+fase+cu+ta+completa.+E+di+dos+fase+lo+continua+patras+di+e+edificio+di+Cocolis]}
Trabounan grandi andando den conexion cu celebracion grandi di e aña aki 30 aña di Status Aparte 40 aña di Himno y Bandera. Ministerio di Cultura ta pushando pa completa renobacion di Plaza Betico, pero banda di esaki, tin un otro proyecto cu tambe mester keda concretisa prome cu 18 di maart e aña aki cual ta Plaza Padu. Durante un bishita di inspeccion Minister Otmar Oduber a splica cu ya caba por aprecia e prome fase cu ta completa. E di dos fase lo continua patras di e edificio di Cocolishi y lo ta un plaza habri, unda lo ubica tambe e escultura di Padu cu su co-compositornan di nos Himno Nacional. E arte ta financia pa e fondo di TPEF, mientras e proyecto di Plaza Padu ta un di e proyectonan financia pa oficina di turismo enfocando riba embeyeciendo Producto Aruba.  Sra. Ronella Tjin Asjoe-Croes director di ATA tambe a forma parti di e recorido na Plaza Padu. E ta comenta cu e plaza ta complementa e area asina importante pa ATA, unda cu e lo brinda nos turistanan naturalmente e infrastructura bunita pero lo crea tambe esfera di por socialisa mas lihe cu nos localnan, sin laga afo e aspecto di por comparti un tiki di nos historia y cultura. "E desaroyo den e area unda awor tin Cosecha y tambe un restaurant nobo, ta netamente trece dilanti e aspectonan aki padilanti, den forma di historia, experiencia y arte local mas cerca di nos bishitantenan." E director di ATA ta entusiasma pa comunica e tipo di proyectonan aki cerca nos bishitantenan y invita nan pa bin mira e plaza y pa incorpora esaki den nan experiencia na Aruba. Mientras cu Albo Aruba a percura pa e prome fase, diahuebs awor lo contratista van Kessel lo continua cu fase B y C. E reto ta pa completa esaki na tempo y na un momento asina importante pa Aruba unda nos rindi homenahe na baluartenan di nos cultura y historia di Aruba. DOW ta encarga pa maneha henter e proyecto cual ta consisti di un plaza, e aspecto di landscaping, espacio pa e bishitantenan por relaha y disfruta di e plaza. Ya caba a haci e trabounan di preparacion pa asina e contratistanan por sigui cu nan trabou. Ta trata di inversion di riba 3 miyon florin. Minister Oduber ta di opinion cu e moral di e tipo di proyecto nan aki ta pa trece hunto historia pa por comparti con nos e lucha di status aparte a tuma luga. Ta importante awor pa mantene plazanan cu ta dedica na un momento specifico. E mandatario ta bisa: "E siguiente plaza cu lo ricibi su atencion ta e monumento di 18 di maart, percurando pa prome cu 18 di maart venidero e ricibi su atencion necesario. Asina aki nos ta trece hunto y eleva e historia durante e celebracion grandi di e aña aki. Dia prome di Januari nos a drenta e aña cu ta celebra 30 aña di Status Aparte 40 aña di Himno y Bandera, nos a percura pa leynan ta na nan luga pa locual ta trata standarisacion di color di bandera, identificacion pa locual nos ta para p'e, combina cu e plazanan aki, por uni nos comunidad bou di un solo causa." E mandatario ta referi na realisacion cu e raiznan y e lucha di nos grandinan, ta wordo reconoci pa e generacion aki y ta wordo manteni y conserva pa pasa esaki pa e futuro generacionnan unda nan na nan turno lo sa di e lucha grandi cu tabata tin. Sr. Oduber a finalisa cu un peticion na henter nos comunidad pa ta participe na un celebracion asina importante manera ta 30 aña di Status Aparte 40 aña di Himno y Bandera. Luna di maart lo bira nos luna cultural.

Expresionnan haci den e articulo aki no necesariamente ta refleha opinion di ArenaPoliti.co