{idkey=2891b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2752-prome-minister-mike-eman-cu-un-crisis-economico-mundial-y-ciere-di-refineria-aruba-a-sa-di-soluciona-e-crisis-sin-algun-ayudo-externo%3FItemid%3D101][title=Prome+Minister+Mike+Eman%3A+Cu+un+Crisis+Economico+Mundial+y+ciere+di+Refineria%2C+Aruba+a+sa+di+soluciona+e+crisis+sin+algun+ayudo+externo][desc=A+inverti+pa+supera+crisis+prome+cu+pidi+pueblo+pa+ayudo%26amp%3Bnbsp%3BORANJESTAD+%E2%80%93+Den+un+declaracion+duna+recientemente+den+Parlamento+Prome+Minister+Mike+Eman+a+expresa+cu+no+mester+lubida+e+crisis+cu+Aruba+a+pasa+aden+y+cu+tabata+andando+na+momento+cu+el+a+drenta+gobernacion+na+2009.+Un+crisis+cu+a+come+casi+un+kwart+di+e+entradanan+di+pais+Aruba%2C+pero+cu+trahando+duro+y+riba+propio+forsa+Aruba+ta+saliendo+di+esaki.+E+mandatario+a+expresa+cu+e+ta+liderando+su+di+dos+Gobernacion+y+ta+hopi+orguyoso+d]}
A inverti pa supera crisis prome cu pidi pueblo pa ayudo 

ORANJESTAD – Den un declaracion duna recientemente den Parlamento Prome Minister Mike Eman a expresa cu no mester lubida e crisis cu Aruba a pasa aden y cu tabata andando na momento cu el a drenta gobernacion na 2009. Un crisis cu a come casi un kwart di e entradanan di pais Aruba, pero cu trahando duro y riba propio forsa Aruba ta saliendo di esaki.

E mandatario a expresa cu e ta liderando su di dos Gobernacion y ta hopi orguyoso di loke a wordo haci den e prome y e trabou cu ta haciendo actualmente. Den Parlamento e mandatario a expresa cu “mi ta sigur cu den e sala aki lo no tin unanimidad cu nos a hacie bon” y a splica cu e trabou tabata asina grandi cu nunca por a finalisa esaki den un solo periodo. Pesey a bay urna electoral na 2013 bisando “Bon trabou, ainda falta”. E mandatario a splica hopi amplio na e ocasion ey y cu palabranan cla cu su Gobernacion ta basa riba e pensamento pa “sirbi e pais aki”. E ta un motibo tambe pa cual e mandatario a bisa di ta orguyoso di Presupuesto 2016 cu a keda aproba, y firma e siman aki door di Gobernador Fredis Refunjol, pasobra e ta un refleho di e dedicacion y compromiso cu a haci di loke “ainda falta”. “Na momento cu nos a drenta gobernacion, nos tabatin un reto economico, reto social y un reto financiero. E reto economico tabata mustra un pais cu a cay 15% den su entrada pa motibo di entre otro ncrisis mundial y cierre di refineria,” El a sigui splica cu, “Na 2008 Aruba su GDP tabata 4.8 biyon florin y na 2010 e tabata 4.2 biyon. Nos a cay cu casi un biyon florin den entrada, pues casi un kwart di entrada di e pais no tabatey ...”

E situacion describi ariba menciona, a pone e gobernacion di Gabinete Mike Eman I dilanti dos escogencia. E Gobernacion cu el a lidera, el a bisa, a scoge pa carga e pais y sake for di e crisis. Perdiendo 250 miyon florin na entrada, “nos por a tuma e decision pa reduci tur gasto pa tapa e 250 miyon, cual lo a nifica cu casi 1000 persona lo a perde nan trabou. Of por busca e 250 miyon cerca pueblo, cu no tabata responsabel pa cierre di refineria ni e crisis mundial.... E ora lo no a haya e situacion cu den e presupuestonan di 2013, 2014, 2015 y 2016 nos a core cu deficit cu nos a financia pa crea prosperidad nobo pa Aruba. Nos a scoge pa no pasa e peso di un incidente mundial y cierre di refineria pa e pueblo pasobra no tabatin caminda pa pidi nan mes, manera Alemania unda tin tur sorto di toeslagnan. Nan ta grandi y por haci un yamada na e ciudadano pero no un pais unda cu ya caba tin sufrimento, unda pa 8 aña no a ahusta salario y tampoco a percura pa mehora poder di compra di pensionado, ni a drecha barionan cu a deteriora,” e mandatario a expresa mustrando di e forma aki cu e bienestar di e pueblo ta bini na prome luga. Y a agrega cu pesey su Gobierno a tuma e decision pa inverti pa supera e crisis prome cu por haci un apelacion na tur ciudadanonan pa yuda mehora finanza publico.

Contradiciendo expresionnan opositor cu gastonan no ta wordo baha suficiente, Prome Minister Eman a gradici su coleganan kendenan cada uno ta contribui pa “haci lo imposibel posibel na Aruba”. Ehempel di esaki tabata con a baha un presupuesto cu tabatin un deficit di 9.4%, na 3.7% y e aña’ki pa 2 porciento. “Tur esaki riba nos propio forsa y sin placa di ningun hende, ni Hulanda, IMF of World Bank, pero basa riba nos propio forsa, basa riba nos inteligencia, capacidad y devocion pa sirbi e pais aki. Pesey tur den Parlamento mester sinti nan mes orguyoso di e pais aki, cu nos no a bay na rudia di ningun hende pa por a reduci deficit di 9.4% te na 2 porciento. E ta demostra cu ora nos a asumi responsabilidad, como generacion nobo pa guia e pais aki, nos a tuma e encargo di exito y logronan di nos antepasadonan hopi na serio. Nos a sinti cu nos no mag di haci menos pa locual nan a soña cu un dia e pais aki lo ta ... Mas bunita ta cu nos ta hacie riba propio forsa pasobra no tabatin schuldsanering di 4 biyon door di Hulanda y tampoco fiansa di IMF y World Bank cu a yuda hopi pais sali di crisis ...,” cu voz yena di emocion y orguyo e mandatario a trece dilanti. Y a agrega cu “awor cu tin perspectiva ta antende cu e aspecto di finanza.”

Expresionnan haci den e articulo aki no necesariamente ta refleha opinion di ArenaPoliti.co