{idkey=8314b0[url=https%3A%2F%2Farenapoliti.co%2Fcomponent%2Fcontent%2Farticle%2F11-comunicado%2F2851-andin-bikker-pdr-apelacion-pa-personanan-cu-ta-hayando-side-effects-door-di-remedi-generico%3FItemid%3D101][title=Andin+Bikker+%28PDR%29%3A+Apelacion+pa+personanan+cu+ta+hayando+side+effects+door+di+remedi+generico][desc=Den+rueda+di+prensa+di+PDR%2C+su+lider+Andin+Bikker%2C+a+haci+un+apelacion+na+personanan+cu+a+wordo+forza+pa+AZV+pa+bay+over+pa+remedi+generico%2C+por+ehemplo+pa+presion+halto%2C+y+cu+ta+hayando+side+effects.+Bikker+por+a+compronde+cu+tin+mas+di+400+persona+cu+ta+bay+keha+cu+nan+a+wordo+nenga+pa+AZV+pa+nan+haya+remedi+cu+nan+ta+usando+pa+a%C3%B1as+caba%2C+por+ehemplo+pa+presion+halto%2C+y+cu+di+un+dia+pa+otro+AZV+a+bisa+nan+pa+start+over+pa+remedi+generico+so.No+ta+casonan+isola+sino+ta+centenares+di+persona+cu]}
Den rueda di prensa di PDR, su lider Andin Bikker, a haci un apelacion na personanan cu a wordo forza pa AZV pa bay over pa remedi generico, por ehemplo pa presion halto, y cu ta hayando side effects.

Bikker por a compronde cu tin mas di 400 persona cu ta bay keha cu nan a wordo nenga pa AZV pa nan haya remedi cu nan ta usando pa añas caba, por ehemplo pa presion halto, y cu di un dia pa otro AZV a bisa nan pa start over pa remedi generico so.

No ta casonan isola sino ta centenares di persona cu a haya nan forza na usa e remedinan generico y cu ta sintiendo side effects.

E side effects aki ta mesun cu tin advertencia pa nan riba e papel di indicacion cu ta bin paden di e caha di e remedinan generico.

Fundacion pro Husticia ta yudando hopi di nan formula nan bezwaarschrift contra e decision aki di AZV y Andin Bikker ta haciendo un apelacion na personanan cu ta den e mesun situacion aki pa nan por haci un inventarizacion di esnan cu a entrega e bezwaarschrift, pasobra cu si tin asina tanto hende cu tin keho Fundacion pro Husticia pa nan por haci un test case.

Bikker a bisa cu no por ta asina cu si pa añanan AZV ta dunando un persona su remedi normal, diripiente tin su start over pa generico. Tin pacientnan cu a haya un tiki mas tempo, pero esaki ta trece cerca nan, inseguridad.

Andin Bikker ta haya cu Aruba ta e unico pais na mundo cu tin un BBO di cual e parti mas grandi ta bay pa salubridad y e otro parti pa demas gasto algemene. E ta splica cu bao di e capa di salubridad y contribucion na AZV, a bin cu otro tipo di BAZV cu ta un porcentahe ta mas halto cu e propio BBO mes.

E ta cuestiona cu si den un pais ta aloca tanto fondo pa salubridad, ta suppose di tin e mihor salubridad na mundo y mester ta riba e lista cu poco dia pasa a wordo publica caminda Hulanda tin un lugar masha halto mes, pero akinan nos por wak cu hasta remedi generico nan ta pushabo cune.

Bikker a bisa cu e ta insisti riba e efectonan secundario y cu a para bira cu cada bes un hende bira malo tin recaudamento di fondo cada pasa tres siman of cada dos luna, y hendenan ta kere cu nos no tin un seguro general pa casonan di salubridad.

Nos hendenan ta opta pa fia na banco of spaar placa pa nan bay busca nan salud den exterior, pasobra nan no ta contento cu e nivel di cuido cu tin akinan.

Bikker a expresa cu nos mester para keto un rato y ningun hende mester sinti su mes infringi of fastioso, pasobra e por ripara cu cada bez cu pueblo, cu ta esun cu ta pagando BAZV, y contribuyendo tur luna for di nan salario cu primanan, ora cu nan reclama tampoco ta bon.

E ta haya cu esakinan ta criticanan constructivo, y si asina tanto placa di nos presupuesto nacional cada 15 di luna ta bay na e fondo di AZV, anto nos pueblo tin derecho, y ta mantene su derecho di sigui cuestiona y para ariba, cu e nivel di cuido mester ta na un nivel aceptable, y no cu cada bez cu bo haya bo mes cu algo serio tin cu bay banco haci fianza pa bay afo. Ironicamente  ni un di e tres ministernan di salubridad cu nos tabatin tras di otro a cambia di opinion riba e punto segun concepto di PDR.

Pa nan ta Hulanda y docternan di Hulanda so ta conta, y na final di dia nos pueblo ta busca su salud y ta haye tambe ta den nos region, por ehemplo na Costa Rica, Colombia of Venezuela.

Biniendo bek riba e punto, Bikker a bolbe bisa  cu personanan cu a wordo forza pa AZV pa bay over riba remedi generico cu ta causando side effect serio riba  nan salud, acerca Fundacion Pro Husticia pa nan evalua un test case, mirando cu esaki no por sigui asina y e no ta kere den e argumento cu remedi generico no tin side effects y cu ta mesun cos cu esun cu tin marca riba dje. El a bisa na final cu PDR tin rapportnan cientifico pa comproba esey, pasobra nan a haci nan research

Expresionnan haci den e articulo aki no necesariamente ta refleha opinion di ArenaPoliti.co